قه‌سه‌م وه‌ملله‌ت عراق.. وه‌مره‌كه‌و خامه‌ى بڕیار ده‌ریانكه‌یم

شفق نيوز

ئه‌وان دوینن؟ جوور ئیمه‌ ئاده‌میزادن و په‌نج هس دیرن؟ یا هسه‌یلیان له‌ سته‌م و دزى و گه‌ناته‌كارى هاوردنه‌سه‌ كار؟  ئومیدمان فه‌وتانن و خوسه‌دارمان كردن و وڵات شیوانن و ملله‌ت خستنه‌ مه‌ینه‌ت.

 

ئه‌وان راسى ئنتمابوین نازانن چوینه‌و له‌ماناى ملله‌ت نیه‌ڕه‌سنه‌و، دویرن له‌پیرووزى و خوه‌شه‌ویسى عراق ك هه‌قیقه‌ت سۆمه‌ر و ئاشوور و بابله‌،، ئیمه‌یش روى وه‌ڕوى ئه‌و نه‌فامى ئه‌وانه‌ بویمنه‌وه‌و له‌وه‌رانوه‌ر سته‌میان وسیه‌یم، چوینكه‌ ئیمه‌ مینیم و ئه‌وان چن، مه‌حاڵه‌ ئه‌وانه‌ زه‌رده‌خه‌نه‌یگ بخه‌نه‌ روخسار بیتاوانه‌یل و مناڵه‌یل، ئه‌وان گیر خواردنه‌ له‌ناو ته‌وق ئاگر و ده‌رخستن دروشمه‌یل دروكانى و فه‌ن وفیڵ و به‌دكارى.

 

هه‌ر له‌وه‌ر ئه‌وه‌یش مه‌حاڵه‌ ئه‌گه‌ر بتویه‌نن وه‌ ئاسایى بژیه‌ن وه‌بى كیشمه‌كیش، ئه‌وان هه‌یوان له‌وه‌رده‌م هاوار مناڵه‌یل عراقى و زه‌رده‌مه‌نن له‌وه‌رده‌م راپه‌ڕین مه‌ردم و ڕه‌ته‌وكردن، ئنجا قه‌وڵ وه‌پیان ده‌یم ك رووژیگ تیه‌ێد بڕه‌سنه‌ سزاى خوه‌یان و ئیمه‌یش وه‌ باوه‌ڕه‌و چه‌وه‌ڕى ئه‌و رووژه‌ ئه‌كه‌یم له‌عراق تازه‌.

 

ئیمه‌ ڕى ئاینده‌ گریمنه‌ وه‌ر ئه‌را وه‌دیكردن رووژ روشنایگ ، ئه‌را كووتاییهاتن به‌دكاره‌یل و ئه‌را وه‌دیكردن چاره‌نویس، چوینكه‌ ئه‌وان بى خه‌وه‌رن له‌وه‌ك وڵات ئیهانه‌ت كریه‌ێد وه‌ ئیهانه‌ى پیاوه‌یلیگ ك نازانن ماناى پیاوه‌تى چه‌س، هه‌ر له‌وه‌ر ئه‌وه‌یش گوزه‌یشت خوه‌یان خه‌یمنه‌ هویریان ك چوین گه‌مه‌ وه‌ چاره‌نویس بیتاوانه‌یل كردن له‌بان ته‌حت ده‌سڵات و له‌هه‌مان وه‌خت وه‌ زوڵم و سته‌م و گه‌ناته‌كارى و كار ترۆریستى ژیان له‌ فه‌قیره‌یل شیوانن ك هویچ مانایگ ئه‌را دیموكراسى و ئازادى نه‌یشتنه‌، ئنجا وه‌ پاى ورسگى ئازاریان ده‌یم یا وه‌ مره‌كه‌و خامه‌ى بڕیار لویته‌و زوڵمیان له‌ناو به‌یم و گشت خه‌م و كینه‌تیگ نه‌یمنه‌ كنار، دى با چه‌وه‌ڕى بكه‌ن تا سوو ك چوین وه‌رگ به‌دبه‌ختى له‌وه‌ر كه‌نیم و سزاى ئه‌وانه‌ دوینیمنه‌ چه‌و.

 

چه‌ له‌بان ئیمه‌ ئویشن؟ ئه‌و قسه‌یله‌ ئویشن ك سته‌مكاره‌یل وه‌رجه‌ خوه‌یان وتنه‌ى و دویا سته‌مكاریانیش ده‌سڵات به‌عس تاوانبار بوى ك چوین له‌ناو بریاو له‌وجوود نه‌مه‌ند، ئیمه‌ ملله‌تیگیم نیه‌توایم سه‌ر بچه‌منیم ئه‌را سته‌مكار و سه‌رمان جوور جه‌وه‌ڵ به‌رزه‌و ئیمه‌ تاریخیم ئیمه‌ ئه‌كه‌دیم ئیمه‌ سۆمه‌ریم ئیمه‌ عراقیم.

 

مه‌له‌یلمان وه‌ باڵه‌فڕه‌ تیه‌نه‌و ئه‌را ئاسمان به‌غداو ئیمه‌یش سه‌بر فره‌یگ داشتیم و دڵسووزى و وه‌فادارى ئه‌را ئى خاكه‌دیریم ك شوون و ماواى په‌یامبه‌ره‌یله‌و ئومیدو ئاره‌زووه‌یلمان له‌تى گوم نیه‌ودو به‌غدایش سه‌رله‌نوو خه‌نێد له‌ژیر ساى یه‌كێتى و برایه‌تى و ئاشتى و خوه‌ر ئازادى له‌تى ئه‌ڵاێد.

 

ئنجا وه‌ خوه‌شه‌ویسى ده‌س بخه‌یمنه‌ ده‌س یه‌كترى و گه‌ناته‌كاره‌یل و كینه‌تداره‌یل و دروسكه‌ره‌یل چینایه‌تى له‌تى ده‌ركه‌یم و به‌ڵى ئه‌را هه‌قه‌یل ئاده‌میزاد و به‌ڵى ئه‌را دادگه‌رى و خه‌یر و كشتوكاڵ و بنیاتناین عراق.

 

عه‌لى عه‌بد داود زه‌كى

ج