ئه‌راچه‌ دیمۆكراسییش جوور كۆمۆنیزم له‌ خوه‌رهه‌ڵات شكه‌ست هاورد؟

شفق نيوز

 

له‌یره‌ ماركسیزم ده‌ركه‌فت و له‌ خوه‌رهه‌ڵات جوور مه‌زه‌ویگ سیاسى شكه‌ست هاورد، ئه‌وانه‌ك ماركسیزم كردنه‌ به‌رنامه‌یگ ئه‌را كار سیاسى چ له‌وه‌ڕیه‌وبردن ده‌وڵه‌ت چ له‌پرووژه‌ى رزگارى چینایه‌تى و نه‌ته‌وه‌یى، له‌ ده‌رسه‌یل سه‌ره‌تایى ئه‌و فكره‌ نه‌ڕه‌سوینه‌وه‌و له‌ شوونه‌یلیگیش وه‌ زوور و حوكم گورز و ئاسن په‌یڕه‌وى كردیان و له‌شوونه‌یلیگیش وه‌ل هێزه‌یل تر سازش كردیان له‌بان بنه‌مایه‌یل ماركسیزم، یه‌یش له‌وه‌ختیگ خود ماركس هه‌میشه‌ له‌وه‌ر خاتر وه‌دیهاوردن ئه‌و جه‌هانه‌ ك خوازیارى بوى قسه‌ له‌بان ژێرخان و هه‌ل و مه‌رج و جێگیركردن مێژوو چینه‌یل و یاسایه‌یل بنه‌ڕه‌تى ماركسیزم جوور زانست كردیاد.

ئمجا دیموكراسییش هه‌ر له‌ ئه‌وروپا سه‌وز كرد و ره‌سیه‌ ئه‌و مه‌رزه‌یله‌ ك بڕێگ له‌ فكرمه‌نه‌یل وه‌پیان له‌یواسه‌ ئى فۆرمه‌ دویا فۆرم گه‌شه‌ى هونه‌ره‌یل وه‌یه‌كه‌و ژیان و ئداره‌كردنه‌، وه‌لى له‌ خوه‌رهه‌ڵات و ده‌وڵه‌ته‌یلى ئابڕویى چییه‌و دى وه‌گشت چشتیگ ئویشن دیمۆكراسى!، سه‌دام حسێن خوه‌ى وه‌ دیمۆكرات زانستیادو ئه‌سه‌د و به‌شار و موبارك و مالكى و جه‌عفه‌رییش وه‌ هه‌مان شێوه‌. دیموكراسى له‌ تاریف خوه‌رهه‌ڵات ته‌نیا له‌ سندووق و ڕز ده‌نگداین و لیست ساخته‌كارى و چشته‌یلیگ خوه‌ى دیه‌سه‌و، دى ئه‌وه‌ نازانن ك دیمۆكراسى سیستمیگ نرخدار و ره‌فتارى بێ كێشه‌و گرفته‌، ك نه‌ك تائیسه‌ ئیمه‌ هووكاره‌ى پیاده‌كردنى نه‌ویمنه‌، به‌ڵكوو له‌لى نه‌فامستیمه‌.

ئى چه‌مكه‌ له‌ ئه‌ده‌بیات و باوه‌ته‌یل لاى خوه‌مان وه‌ ئاسان چووده‌ ناو گشت نویساننیگ و هه‌ر لایه‌نیگیش وه‌ ئاره‌زوو خوه‌ى شیه‌وكردن ئه‌راى ئه‌كا. دێوى ئویشێد: دیمۆكراسى رێكخریاگیگ تۆكمه‌ى ره‌فتارى و هه‌ڵسووكه‌فته‌، هه‌ر له‌وه‌ر ئه‌وه‌یش هویچ چشتیگ چه‌نه‌ دیمۆكراسى په‌یوه‌س نییه‌ وه‌ واقعه‌و.

شكه‌ست دیمۆكراسى له‌ خوه‌رهه‌ڵات وه‌گشتى و له‌ عراق وه‌تایبه‌ت ئه‌و هسه‌ له‌لامان دروس ئه‌كا ك سایكۆلۆجیه‌ت تاكه‌یلمان تا ئیسه‌ ئه‌وقه‌ره‌ وه‌ل ته‌كڕه‌وه‌یل جفته‌ ئه‌وه‌نه‌ خوه‌شى له‌ دیمۆكراسى نیاێدو شایه‌دیش به‌شێگ له‌وانه‌ك له‌ڕوى فكریه‌و له‌ دیمۆكراسى فامستنه‌ هویر له‌وه‌ بكه‌ن جنگ دیمۆكراسى وه‌ وه‌ریان نه‌كاو نه‌زانن وه‌ل ئاست گه‌شه‌كردن ئه‌قڵى و فكرى مه‌ردم بگونجننه‌ى و دویاخریش ئه‌وه‌ك دیریمنه‌ى له‌ده‌سمان ده‌رچوود، ئمجا بیلا گشتمان وه‌یه‌كه‌و دوعا ئه‌را دیمۆكراسى بكه‌یم!! تا وه‌ یه‌كجارى جوور كۆمۆنیزم وه‌پى ناێد، دى ئیجاره‌ ئه‌گه‌ر هاته‌و بیلا وه‌ خاسى ئمایه‌تى بكه‌یم تا دى له‌ماڵ خوه‌ى گوم نه‌ودو هه‌میشه‌ له‌هه‌ر شوونیگ هه‌وه‌جه‌ وه‌پێ داشتیم ئاماده‌ بوود.

محه‌مه‌د ته‌ها

ج . أ