جياوازى ناونى بارودوخ به‌سره‌ و كه‌ركوك

موئه‌يد عه‌بدولستار

شه‌فه‌ق نيوز/ ئوميد و ئاره‌زوو عراقيه‌يل دوياى رميان رژيم چه‌ته‌گه‌رێ سه‌دام، دامه‌زرانن ده‌سڵاتيگ مه‌ده‌نى بوى ك بنه‌مايه‌يل سه‌ره‌كيى قورتاركردن عراق و ملله‌ت عراق له‌ ده‌رئه‌نجامه‌يل دوياه‌فتگه‌يل ديكتاتۆريه‌ت دابنه‌ێد، ئه‌و ديكتاتۆريه‌ته‌ ك هه‌ر له‌ وه‌خت دامه‌زرانن ده‌وڵه‌ت تازه‌ى عراقه‌و وه‌ دڕندانه‌ترين رژيم حوكمڕانى، خوه‌ى له‌بان عراقيه‌يل چه‌سپاندوێد.

 

ملله‌ت عراق وه‌ هيزه‌و به‌شدارى له‌ هه‌ڵوژاردنه‌يل كرد، ئه‌ويش وه‌و ئوميده‌ كه‌سه‌يليگ هه‌ڵوژريه‌ێد تا خێرێگ له‌لى بكه‌فێده‌و ئه‌را بنياتناين عراقيگ تازه‌ ك هاووڵاتى وه‌ خوه‌شى و ئارامى له‌تى بژيه‌ێد وه‌ تايبه‌ت دوياى ئه‌وه‌گ چه‌نه‌ها ده‌وڵه‌ت گه‌ورا له‌و قه‌رزه‌يل فره‌يانه‌ خوه‌ش بوون ك رژيم سه‌دام وه‌ك باريگ گران خستوێده‌ى مل عراق، وه‌لێ ئوميده‌گه‌يان وه‌ وايا چى، چوينكه‌ ئه‌وانه‌گ هه‌ڵيانوژريا هويچ نه‌وين بيجگ له‌ شماره‌يگ نوێنه‌ر ك هه‌وڵ ئه‌را وه‌ده‌يهاوردن به‌رژه‌وه‌ندى و ده‌سكه‌فته‌يل خوه‌يان ئه‌يه‌ن، يه‌يش له‌بان هساو وژان و خزمه‌تكردن رووڵه‌يل ملله‌ته‌گه‌يان.

 

ئه‌وه‌ بوێ هاووڵاتيه‌يليش پشتگووشيان خستن و له‌ ديوا خول هه‌ڵوژاردنه‌يل بايكۆت به‌شدارى و ده‌نگداين كردن، هه‌ر له‌وه‌ر ئه‌وه‌يش راده‌ى به‌شدارى وه‌ گووره‌ى بڕيگ سه‌رچه‌وه‌ ريژه‌ى 20% زياتر نه‌ويه‌. به‌شيگ فريه‌ى ده‌نگده‌ره‌يل بايكۆتى كردن و هس وه‌ فه‌ن و فيل و سته‌م و ئه‌و پيلانگه‌رى كردن ك سه‌ره‌يل گه‌وراى ئاڵشتكارى وه‌ بوونه‌ى عه‌مامه‌ له‌سه‌ره‌يل ئيران و ئه‌فه‌نديه‌يل بريتانياوه‌ ئه‌رايان نه‌خشه‌ى كيشاوێد، چوينكه‌ زورم ئه‌وانه‌ خاوه‌ن ره‌گه‌زنامه‌و پاسه‌پۆرت به‌رز بريتانيين. جى داخه‌ بريتانيا سه‌رچه‌وه‌ى ئى هه‌مگه‌ دزه‌سه‌ ك له‌پايه‌يل ده‌سڵات عراق دوينيمنه‌يان، يه‌يش له‌وه‌ختيگ له‌جياى ئه‌وه‌گ زاناو شاره‌زايه‌يل زانكۆيه‌يل كويه‌ن و ناودار كامبردج و ئۆكسفۆرد له‌تيان بوينمن.

 

وه‌لێ وه‌ل ئه‌و مه‌رگه‌ساته‌يليشه‌ ك هاتنه‌ تويش عراق، جياوازى له‌ناونى دو ئيداره‌ دوينيم، ئداره‌ى حزبه‌يل ئايينى ك حوكمڕانى شاره‌يل باشوور وه‌ ده‌سيه‌و بويه‌ وه‌تايبه‌ت ئه‌و شاره‌يله‌ ك ده‌وڵه‌مه‌نن وه‌ سامان نه‌فت جوور به‌سره‌و ناسريه‌و عوماره‌، و ئداره‌ى حزبه‌يل كوردستانى ك حوكمڕانى شاره‌يل كوردستان وه‌ده‌سيانه‌و بوێ جوور سلێمانى و هه‌ولێر و دهۆك و كه‌ركوك.

 

ئه‌گه‌ر واز له‌گشت شاره‌يل باريم و ته‌نيا دو شار به‌سره‌ و كه‌ركوك ئه‌را به‌راورد وه‌ربگريم، له‌بان ئه‌و بنه‌ما ك له‌و شاره‌يله‌ هه‌ن، چه‌نه‌ها گريه‌و ته‌نانه‌ت له‌و وه‌خته‌يليشه‌و يه‌كه‌مين چاڵه‌ نه‌فت له‌ باوه‌گوڕگوڕ هه‌ڵكه‌نرياگه‌، وه‌ به‌رهه‌مهاوردن و هه‌نارده‌كردن نه‌فت ناودارن، دوينيم شار كه‌ركوك ك له‌لايه‌ن حزبه‌يل كوردى وه‌ڕيه‌و برياگه‌ شاريگ پاك و هاوسه‌نگ بويه‌ له‌ بواره‌يل كار و كه‌ميى بيكارى و دابينكردن خزمه‌تگوزاريه‌يل و وه‌يه‌كه‌و ژيان ئاشتيانه‌ى ناونى پيكهاته‌يل سه‌ره‌كى(عه‌ره‌ب و كورد و توركمان)، ك بيجگه‌ ئه‌و كيشه‌يل تاريخيه‌ ك داگيركار بريتانى له‌ ساڵه‌يل په‌نجاى سه‌ده‌ى وه‌رينه‌و ناسه‌وه‌ى و دوياخريش رژيم به‌عس زياتر قويليه‌و كرد و په‌ره‌وه‌پيدا، گه‌وراترين ئه‌و كيشه‌يليشه‌ جيوازكردن كورد و ته‌عريبكردن ناوچه‌يليان بوێ ك تائيسه‌يش كاريگه‌ريه‌يل ناڕه‌حه‌تكه‌رى هه‌ر مه‌ندگه‌و ئداره‌ى ده‌وڵه‌ت له‌ به‌غدا نه‌تويه‌نستگه‌ وه‌ گووره‌ى مادده‌ى 140 ده‌ستوور چاره‌سه‌ريان بكاو يه‌يش بويه‌سه‌ گرفت و كيشه‌ له‌وه‌رده‌م شاره‌گه‌و مه‌ردمه‌گه‌ى ئه‌را زياتر پيشكه‌فتنيان له‌ بواره‌يل وه‌به‌رهاوردن و گه‌شتيارى و بازركانى و چشته‌يل تر. وه‌لێ وه‌ل ئه‌و هه‌مگه‌ كيشه‌يليشه‌ له‌لايه‌ن حزبه‌يل كوردستانييه‌و گرنگى وه‌پى درياگه‌، وه‌تايبه‌ت له‌لايه‌ن مام جه‌لال سه‌رۆك كووچكردگ عراقه‌و ك توركمانيش خستياده‌ نواى كورديشه‌و له‌و گام و پرووژه‌يل چاره‌سه‌ريه‌ ك ئه‌را ده‌سڵات شاره‌گه‌ پيشنيارى كردياد له‌و وه‌خته‌يله‌ ك پاريزگاگه‌ له‌لايه‌ن يه‌كێتى نيشتمانى كوردستانه‌و وه‌ڕيه‌و بريا.

 

دى ئه‌وه‌ بوێ كه‌ركوك له‌و خێره‌ مه‌ندوێده‌و تا وه‌رجه‌ ساڵيگ و زياتر له‌يه‌وه‌ر ك چه‌ن رويداگيگ له‌ناكاو روێ وه‌ڕوێى بويه‌وه‌و كه‌فته‌ ژير كاريگه‌رى جموجويله‌يل سه‌ربازى و په‌لاماره‌يل داعش و ناوچه‌يل ده‌ورگردى جاريگتر كه‌فتنه‌وه‌ وه‌ر سه‌ختى په‌لاماره‌يليان.

 

وه‌لێ وه‌ڕاسى بوار به‌راوردكردن بارودوخ كه‌ركوك، بيجگه‌ گشت ئه‌و كيشه‌و گرفته‌يليه‌، وه‌ بارودوخ به‌سره‌ ناكريه‌ێد ك حزبه‌يل ئايينى بريانه‌ى رييه‌وه‌و كاريگه‌رى كردنه‌سه‌ بان سامان نه‌فته‌گه‌ى له‌گشت لايگه‌وه‌و له‌لايه‌ن مافيايه‌يله‌و تاڵان بكريه‌ێد و ده‌سڵات عه‌شايرى و خێڵه‌كى له‌تى باڵاده‌سه‌و ده‌سڵات حكومه‌ت له‌تى نه‌مه‌ندگه‌و كليل كاروباره‌يلى درياسه‌ حزبه‌يل ئايينى ك شاره‌گه‌ له‌ گه‌ناته‌كارى هه‌ڵكيشاگه‌و ته‌نانه‌ت كار ره‌سيه‌سه‌ ئه‌وه‌گ ساده‌ترين خزمه‌تگوزاريه‌يلێ وه‌ك ئاو پاك ئه‌را وه‌كارهاوردن و كاره‌باو خزمه‌تگوزاريه‌يل تر نه‌مينن.

 

وه‌ل ئه‌وه‌يشا شووڕه‌وبوين شاره‌يل باشوور عراق ئه‌را ئه‌و ئاسته‌ له‌ دوياكه‌فتگى و نه‌وين خزمه‌تگوزارى و نائارامى و په‌ره‌سه‌ندن گه‌ناته‌كارى و رشبه‌تخواردن و بڵاوبوينه‌وه‌ى په‌تاو نه‌خوه‌شيه‌يل كوشنده‌ وه‌و ئاست و ريژه‌ى فريه‌و به‌رزه‌و هه‌وه‌جه‌ى ئالشتكردن ئى ئداره‌يل ئيسه‌ى ئى شاره‌يله‌ وه‌ ئداره‌يگ تر ئه‌يه‌رێده‌ وجوود و بايه‌سه‌ په‌رله‌مان و حكومه‌ت ئاينده‌ كار بكه‌ن ئه‌را ئه‌وه‌گ به‌ديل خاستر بويننه‌و ئه‌را ئداره‌كردن و دويرخستنه‌وه‌ى حزبه‌يل ئايينى ك خوه‌يان چه‌سپاننه‌ له‌بان شار و مه‌ردمه‌يليان و نقوميان كردنه‌ له‌ خورافات و قسه‌ى هويچ و پويچ و بى مانا.

موئه‌ید عه‌بدولستار