يا تيرۆر ..يا ته‌پ و توز...!؟

شفق نيوز

؛له‌ لايگه‌وه‌ ئه‌ی ته‌پ توزه‌ بار ته‌ندروستی و له‌ش ساقی ئاده‌ميزاد خه‌يگه‌ مه‌ترسيه‌وه‌ وه‌ تايبه‌ت ئه‌و كه‌سه‌يله ك هه‌ميشه‌ له‌‌ ده‌س نه‌خوه‌شیه‌يل ته‌نگه‌ نه‌فه‌سه‌وه‌ ناڵنن و ئه‌ی ته‌پ و توزه‌ ‌كاريگه‌ری نگه‌تيڤيگ ئه‌را بان ته‌ندروستيان ديريگ.له‌ لايگ تره‌وه‌ بيوه‌سه‌ مايه‌ی ناشرينی ديمه‌ن شاره‌يل و پيس بيون ژينگه‌ و ته‌نانه‌ت له‌ گشتی فه‌ره‌تر ژنه‌يل ناوماڵ له‌ ده‌س ئه‌ی تپ و توزه‌ بيزارن له‌وه‌ر ئه‌وه‌گ‌ تا وه‌ختيگ ئاووهه‌واگه‌ خوڵ وخاك له‌تی بوود نيه‌تيوه‌نن ناو ماڵ پاكه‌و بكه‌ن.ئمجا ئه‌ی ته‌پ وتوزه‌ كاريگه‌ری ناسه‌ بان جموجويل و هاتوچيو ناو شاريش و مه‌ردم كه‌متر هامشوو كه‌ن و له‌ ماڵ نيه‌‌نه‌ ده‌يشت؛ ئه‌و كه‌سه‌يليشه‌ ك خاوه‌ن ئۆتۆمۆبيل يا سه‌ياره‌ن نيه‌تيوه‌نن شوفێری يا سايقی بكه‌ن چوينكه‌ وه‌ سه‌به‌ب ئه‌ی ئاووهه‌وای خراوه‌ ريوداگه‌يل هاتوچيو فه‌ره‌يگ ڕيوداگه‌‌ و زه‌ره‌ر و زيانه‌يل فه‌ره‌يگ له‌ليان كه‌فتيه‌سه‌و.ئه‌گه‌ر له‌ ڕيو ده‌روونيشه‌وه‌ ته‌ماشای زيانه‌يل ئه‌ی ته‌پ وتوزه‌ بكه‌يم بنياده‌م وه‌ختيگ ته‌ماشای ئه‌ی ئاووهه‌وا كه‌يگ تيوش جووره‌ بی تاقه‌تی وگوشه‌گيرييگ تيه‌يگ و خوه‌ی له‌خوه‌ی ره‌فتاری ئاڵشته‌و بوود و نيه‌تيوه‌نيگ وه‌وجوره‌گ بايه‌ته‌ بوود كاره‌يل ڕووژانه‌ی ئه‌نجام بيه‌يگ. ئمجا له‌وه‌ر ئه‌وه‌گ شاره‌يل عێراق كه‌مه‌ربه‌ن سه‌وز له‌ ده‌وريان نيه‌ هيوچ چشتيگ نيه‌وگه‌ ڕيگر خاك و خوڵه‌گه‌و ديونيد كه‌ وه‌يه‌كجار ئه‌ی ته‌پ و توز قرمز ڕه‌نگه‌ سه‌رتاسه‌ر شاره‌گه‌ پووشنيگ. وه‌وجووره‌گ پسپۆره‌يل ئاووهه‌واناس له‌ كه‌ناڵه‌يل ڕه‌سانن باس هوكاره‌يل ئه‌ی ته‌پ و توز و خاك وخوڵه‌ كه‌ن ، ئه‌ی ته‌پ وتوزه‌ ك له‌ جی واران واريگه‌ مل وڵاته‌گه‌مانا له‌ بياوانه‌يل نيمچه‌ ديورگه‌ی عه‌ره‌بيه‌وه‌ هه‌ڵی كه‌يگ و ئه‌ڕا بان عێراق تيه‌يگ. ئمجا وه‌داخه‌وه‌ ئيمه‌ تا حاڵ حازر له‌ ده‌س تيرۆر و تيرۆريسته‌يل كه‌ هه‌ميشه‌ بيونه‌سه‌ مايه‌ی كێشه‌و ته‌قينه‌وه‌و توندوتيژی و كوشت و كوشتار له‌ی وڵاته‌ ڕزگار نه‌يومنه، هه‌ر چه‌ن ك ئيسه‌ بارو وه‌زع ئاسايش و سه‌ قام وڵات خاسه‌و بيون فه‌ره‌يگ وه‌خوه‌يه‌وه‌ ديه‌ ، وه‌لی جاریگ وه‌ ته‌واوه‌تی ده‌س تيرۆر له‌ عێراق كوڵه‌و نه‌كرياس و وه‌ يه‌كجاری نه‌وڕياس و ئاشكراس ك تيرۆر له‌ عێراق له‌ كوره‌وه‌ سه‌رچاوه‌ گريگ و ئه‌و وڵاته‌يله‌ كين ك له‌وه‌ر به‌رژوه‌ندی خوه‌يان پشتگيری له‌ تيرۆريسته‌يل و كاره‌يل تيرۆريستی له‌ی وڵاته‌ كه‌ن ،له‌وه‌ر ئه‌وه‌گ هه‌ر چه‌نيگ ئاسايش له‌ عێراق كه‌مه‌و بوود هاله‌ به‌رژه‌وه‌ندی ئه‌و وڵاته‌يله.ئمجا هاووڵاتی عێراقی ‌ ئه‌ی پرسياره‌ له‌ خوه‌ی كه‌يگ ك ئايا تاوانی چه‌س ك بايه‌ته‌ بيجگه‌ له‌و هه‌مگه‌ی زه‌ره‌رو زيانه‌ ك له‌ ڕژيم گوڕوه‌گوڕ به‌عسه‌وه‌ له‌ گوزه‌يشته‌و له‌ ديوای ڕميانی  وه‌ پی ڕه‌سيه بايه‌ته‌ بووگه‌ قوربانی ئه‌و تيرۆر و ته‌پ توزه‌ ك له‌ لايه‌ن وڵاته‌يل هاوساوه‌ وه‌ خه‌ڵات دريه‌يگه‌ پی..!؟‌وه‌لی خوه‌زه‌و ئه‌ی وڵاته‌يله‌ حه‌ق هه‌ڵوژاننيگ بيه‌نه‌ پيمان تا يه‌كيگيان هه‌ڵوژنيم  ياتيرۆر..! يا ته‌پ و توز..!؟