ئايا"كارت نيشتمانی"كيشه‌ی فه‌يليه‌يل چاره‌سه‌ر ئه‌كا؟

شفق نيوز

بيگومان له‌ زوورم وڵاته‌يل خوه‌رئاواو پيشكه‌فتگ دونيا پشت وه‌ ئی كارت گوزاره‌ييه‌ كرياگه‌ ك گشت به‌ڵگه‌و زانيارييگ گرته‌سه‌ خوه‌ی، وه‌لی له‌ی عراق پڕ مه‌ينه‌تی و ساخه‌تكاری ئيمه‌ بايه‌سه‌ سه‌ردان هه‌ر دام و ده‌زگاو مامڵه‌كردنيگ گشت ئه‌و به‌ڵگه‌نامه‌يله‌ ك ئاماژه‌ وه‌پيان كرديم وه‌پيد بوود، وه‌نا كارد وه‌ ئاسانی بی يه‌كيگ له‌و به‌ڵگه‌يله‌ جيوه‌جی ناكريه‌يد! وه‌ل ئه‌وه‌يشا جار له‌يوايشه‌ هه‌س له‌ شوونه‌يليگ گومان له‌ليان ئه‌كريه‌يدو بريگ له‌ليان وه‌ مه‌رج فسفۆری ره‌واجه‌و كارد وه‌پی ئه‌خه‌نه‌ ڕی.

ئی چوار به‌ڵگه‌ی گوزاره‌ييه‌ له‌ عراق دابه‌ش له‌بان گشت پيكهاته‌يل كرياگه‌و تائيسه‌يش هه‌ر نه‌خش كارايگ ديرن له‌ رووژگارمان و به‌ڵگه‌ی تازه‌يگ شوونيان نه‌گرتگه‌، وه‌لی له‌ سه‌رده‌م رژيم وه‌رين ئی به‌ڵگه‌يله‌ له‌ كورده‌يل فه‌يلی سه‌نرياوه‌ له‌وه‌ختيگ ك كووچ زووره‌ملی وه‌پيان كرياو له‌ی عراق باوگ و باپيره‌يليانه‌ وه‌ مه‌هانه‌ی ته‌به‌عيه‌ی ئيرانی ده‌ركريان و رووڵه‌يليان له‌ زيندانه‌يل دريان له‌ سێداره‌و بيسه‌روشوون كريان ، ك ئه‌وه‌ بوی ماڵ و موڵك و دارايی و ناسنامه‌و ره‌گه‌زنامه‌يليانيش له‌ليان زه‌فت كرياو له‌ عراق تازه‌ی دويای ٢٠٠٣يش وه‌ هه‌مان بڕيار ئه‌نجوومه‌ن سه‌ركردايه‌تی شووڕش رمياگ شۆفێنی مامڵه‌ وه‌ل كيشه‌يل كورد فه‌يلی كريا ك هه‌رچه‌نی دادگای باڵای تاوانه‌يليش له‌ ٢٩ / ١١ / ٢٠١٠ تاوان له‌ناوبردن فه‌يليه‌يل وه‌ جينۆسايد تاريف كرد و بريار قه‌ره‌بووكردنيان دا، وه‌لی وه‌ل ئه‌وه‌يشا له‌ مافه‌يل ئنسانی و پرووسه‌يل سياسييش بيبه‌ش كريان و تا ئيسه‌يش ئی پيكهاته‌ی چه‌وسياگه‌ جوور باقی پيكهاته‌يل تر وڵاته‌گه‌ وه‌ چه‌و يه‌كسانيه‌و ته‌ماشا نه‌كريانه‌و له‌ گشت مافه‌يليان ناهمی كريانه‌.

ئمجا له‌يرا پرسيار ئه‌كه‌يم و ئويشيم: ئايا دراوردن كارت نيشتمانی كيشه‌يل فه‌يليه‌يل چاره‌سه‌ر ئه‌كا، يا ئی پيكهاته‌ی سته‌مديده‌ ئه‌ڕه‌سنيده‌ مافه‌يل ره‌واو زه‌فتكرياگی؟ ئايا ئی كارت نيشتمانيه‌ ئه‌دێده‌ سه‌ره‌تايگ ئه‌را چاره‌سه‌ر و ده‌ركردن رووڵه‌يل كورد فه‌يلی له‌ قه‌يران و مه‌ينه‌تی و ژانه‌يل سه‌خت؟ جواو ئی پرسياره‌يله‌ هيليمنه‌ لای رووژه‌يل ئاينده‌.

جه‌ماڵ ئه‌ركه‌وازی