پرووژه‌ قانوون ده‌ستوور هه‌ريم كوردستان

شفق نيوز

و شۆڤێنی كه‌فتنه‌ تومه‌تباركردن سه‌ركردايه‌تی سياسی كوردستان و وه‌كارخستن قه‌وانه‌ كويه‌نه‌گه‌ی جاران ك گوايا ئی ده‌ستووره‌ عراق به‌شبه‌شه‌و كه‌يگ .

ئی جووره‌ دعايه‌يگ وه‌مه‌به‌س گه‌رمكردن بازاڕه‌ ئه‌را هه‌ڵوژاردن په‌رله‌مان ئاينده‌ی عراق ك بڕيار يا قه‌راره‌ له‌ سه‌ره‌تای ساڵ (٢٠١٠) ئه‌نجام بدريه‌يگ ، چوينكه‌ وه‌قسه‌ی ئی جووره‌ كه‌سه‌يله‌ دوشمنايه‌تی وه‌رانوه‌ر ده‌سكه‌فته‌يل ملله‌ت كورد لاينه‌گيری ئه‌وان زيای كه‌يگ و كورسيه‌يليان له‌ په‌رله‌مان عراق مسۆگه‌ر كه‌ن ، وه‌لی ئه‌وه‌ك جيگه‌ی داخه‌ له‌ناو كوردستانيش ده‌نگ ناڕه‌زايی دروس بوی دژ ئی پرووژه‌و هه‌مان وه‌خت وه‌ ناڕه‌وا له‌قه‌ڵه‌م دريا .

پرووژه‌ قانوون ده‌ستوور هه‌ريم ئه‌گه‌ر بايگ و زوورم ده‌نگه‌يل ملله‌ت كوردستان باريگه‌ده‌س ئه‌وه‌ بووگه‌ ده‌ستوور هه‌ميشه‌يی هه‌ريم و بووگه‌ يه‌كم ده‌ستوور كوردستان ك كورد خه‌و وه‌پيه‌و دياگ .

ناڕه‌وايی ته‌ماشاكردن ئی پرووژه‌ له‌وه‌ر ئه‌وه‌ بوی ك گوايا په‌رله‌مان كوردستان ده‌نگ داسه‌ پرووژه‌گه‌و شه‌رعيه‌تی نه‌مه‌ندگه‌و ماوه‌ی قانوونيه‌گه‌ی ته‌واو بويه‌ ، وه‌لی ئايا ته‌واوبوين ئه‌و ماوه‌ ئه‌وه‌ ره‌سنيگ ك پرووژه‌گه‌ ناڕه‌وا بووگ ؟ داناين ده‌ستوور وه‌چه‌ن ريگه‌يگ و چه‌ن شيوه‌يگه‌وه‌ بووگه‌ نويساننی و په‌سه‌نكردنی و كاركردن وه‌پی ، چوينكه‌ ريككه‌فتنيگ ناوده‌وڵه‌تی نيه‌ له‌بان نويساننه‌وه‌ی ده‌ستوور وه‌ ته‌نيا ريگه‌يگ ، هه‌ر وڵاتيگ و ، وه‌جووريگ ده‌ستوور خوه‌ی نويسيگ و دوياخريش كار وه‌پی كه‌يگ .

هه‌ر له‌ كويه‌نه‌وه‌ ئی ده‌ستووره‌ وه‌چه‌ن ريگه‌يگه‌وه‌ دانرياگه‌و كار وه‌پيكرياگه‌ ، له‌وانه‌يش وه‌ڕيگه‌ی به‌خشين (منحه‌) ، مه‌عنای ئه‌وه‌سه‌ ده‌سڵاتداره‌يل ده‌ستووريگ انه‌ن و به‌خشته‌ی ملله‌ت ، وه‌لی ئی جووره‌ ريگه‌ ئه‌را داناين ده‌ستوور ئيسه‌ له‌ی سه‌رده‌مه‌ نه‌مه‌ندگه‌و كار وه‌پی نيه‌كريه‌يگ و ته‌واو بويه‌ وه‌ك ده‌ستوور مسر له‌ساڵ (١٩٢٦)و ده‌ستوور رووسيا له‌ساڵ (١٩٠٦)و ئه‌و ده‌ستووره‌ ك ئه‌نجوومه‌ن سه‌ركردايه‌تی شووڕش له‌ساڵ (١٩٧٠) له‌عراق ده‌ريكرد . ريگه‌ی دويميش ئه‌را نويسانن ده‌ستوور وه‌شيوه‌يگ ريككه‌فتن (عقد)ه‌ ، ك له‌ی جووره‌ داناينه‌ ولله‌ت وه‌ل ده‌سڵاتا به‌شداری كه‌يگ له‌داناين ده‌ستوور وه‌ك ده‌ستوور سوودان له‌ساڵ (١٩٧٣) و ده‌ستوور فره‌نسا له‌ساڵ (١٨٣٠)ك ئی جووره‌ ده‌ستووره‌يله‌ ناديموكراتيين ، چوينكه‌ گوزارش يا ته‌عبير راسه‌قينه‌ی رای وئه‌ڕای چوين مه‌ردم نيه‌ .

ته‌نيا ريگه‌ی ديموكراتی له ‌داناين ده‌ستوور و كاروه‌پيكردنی له‌ی سه‌رده‌مه‌ ريگه‌ی راپرسی يا ئسفتاس ، ك مه‌عنای ريفراندۆم ده‌يگ و له‌وه‌ختيگه‌ ك لايه‌نيگ ره‌شنويس يا مسوه‌ده‌ی ده‌ستوور نويسيگ و خه‌يگه‌ی وه‌رده‌م مه‌ردم ئه‌را ئه‌وه‌ك ده‌نگ له‌بانی بيه‌ن وه‌ په‌سه‌نكردنی يا ره‌ته‌وكردنی ، وه‌ل ئه‌وه‌يشا گرنگ يا موهميش نيه‌          چ لايه‌نيگ ئه‌و ره‌شنويسه‌ نويسيگ ، دی حكوومه‌ت بووگ يا ده‌سه‌يگ شاره‌زا يا هه‌ر كه‌سيگ تر .