فیدراڵى زه‌نگ چاره‌سه‌ر ئه‌كوتێ

شفق نيوز

ئنجا له‌شوون رمیان رژیم وه‌رین  له‌ نیسان 2003، هه‌رچه‌نى له‌ سه‌ره‌تاى دامه‌زرانن حكوومه‌ت وه‌ختى له‌ ته‌ممووز 2004 و دامه‌زرانن حكوومه‌ت ئنتقالى له‌ نیسان  2005 مه‌سه‌له‌ى فیدراڵى و دامه‌زرانن هه‌رێمه‌یل له‌باوه‌ڕ  زوورم سه‌ركرده‌یل سیاسى عه‌ره‌به‌یل عراق و بگر مه‌ردم پاریزگایه‌یل خوه‌رئاواو باكوور عراقیش جیگیر نه‌وى و دژ مه‌یلداره‌یل ئى سستمه‌ بوین له‌ حوكم و هه‌میشه‌ وه‌ به‌شبه‌شه‌وبوین خاك عراق تاریفى كردیان، وه‌لى ئیسه‌ فره‌یگ له‌و سه‌ركرده‌و نه‌یاره‌یل حكوومه‌ت دامه‌زریاگ ئیسه‌ ره‌سینه‌سه‌ ئه‌و باوه‌ڕه‌ ك فیدراڵى زه‌نگ چاره‌سه‌ر كوتیدو ته‌نیا رییگه‌ ئه‌را كووتاییهاوردن وه‌گشت قه‌یرانه‌یل سیاسى و دابینكردن هه‌قه‌یلیان!.

 

بار ئیسه‌ى ناوچه‌یل عراق وه‌تایبه‌ت ئه‌و شوونه‌یله‌ ك خوه‌ینیشانداین له‌تیان ئه‌نجام دریه‌ید سه‌ختى فره‌یگ وه‌خوه‌یه‌و دیه‌و ره‌سیه‌سه‌ حاڵه‌تیگ ك ئارامه‌وكردنیان له‌ له‌ڕى لویله‌ى تفه‌نگ و چه‌كه‌یل سوپا كه‌فته‌سه‌ مه‌حاڵ و ئامانج ئه‌و مه‌ردمه‌ ئه‌وه‌سه‌ ئاڵشتكارى له‌ حوكم  ئیسه‌ى عراق بكریه‌یدو سه‌رۆك وه‌زیره‌یل هه‌گبه‌ى سه‌رۆكایه‌تى به‌یده‌ شاناو ده‌س له‌ جڵه‌و ده‌سڵاتدارێتى و سه‌رۆكایه‌تى حكوومه‌ت هه‌ڵگرید، ك یه‌یش مه‌حاڵه‌و شیعه‌یش ئاماده‌ نیه‌ ده‌س له‌پۆست سه‌رۆكایه‌تى وه‌ربیه‌یدو سنییش مكوڕه‌ له‌بان ئه‌وه‌ك وه‌ هه‌ر جووریگ بوود شكه‌ست وه‌ى حوكمه‌ باریدو له‌ى ناونییشه‌ مه‌ردم بیچاره‌ى وڵاته‌گه‌ بوینه‌سه‌ قوربانى و ئاسووده‌یى و سه‌قامگیرى شاره‌یلیان له‌ده‌سدانه‌و له‌ لێدوان و هه‌ڕه‌شه‌و گوڕه‌شه‌ى لایه‌نه‌یل فیشتر چشتیگ تر دڵخوه‌شكه‌ر نه‌ژنه‌فتنه‌ جوور خاسسازى و ئاشتى و خزمه‌تگوزارى.

 

له‌ڕاسى بار پڕ مه‌ینه‌ت و پڕ قه‌یران له‌ عراق دریژ كیشاو له‌ سه‌ره‌تاى ئازادى پیشبینى ئه‌وه‌ نه‌كریا ئى كیشمه‌كیش و خوینڕشیان و تایفه‌گه‌ریه‌ بره‌سیده‌ ئاستیگ چاره‌سه‌رى قویل و سه‌خت بوود، چوینكه‌ ملله‌ت عراق وه‌ عه‌ره‌ب و كورد و توركمان و كه‌مینه‌یل تر ته‌نیا هساو وه‌خت كه‌میگ كردیان ئه‌را وه‌دیهاتن خه‌یر و خوه‌شگوزرانى، وه‌لى ئه‌و خوه‌شگوزرانى و ژیان بى كیشه‌و گرفته‌ ك پیشبینى كریا دویاى ئه‌و هه‌مگه‌ ساڵه‌یل پڕ مه‌ینه‌تیه‌ وه‌ ئاسانى جیگیر بوود ته‌نیا خه‌ویگ بوى و هویچ تر.

 

ئه‌گه‌ر ئیسه‌ وه‌ دقه‌ته‌و ته‌ماشاى بار ئیسه‌ بكه‌یم و بنوڕیمنه‌ ئاست جیاوازى و ناكووكى مه‌زه‌وى و مه‌سه‌له‌ى سه‌رهه‌ڵداین تایفه‌گه‌رى، دوینیم هویچ ڕییگ ئه‌را چاره‌سه‌ر نه‌مه‌نده‌سه‌و بیجگه‌ فیدراڵى و دامه‌زرانن هه‌رێمه‌یل جیاجیاو دابه‌شكردن ده‌سڵاته‌یل، چوینكه‌ جوور ئه‌وه‌ك په‌ند كورده‌وارى خوه‌مان ئویشید" پووس هات و سقان دڕى " و حكوومه‌تیش ئه‌و حكوومه‌ته‌ نیه‌ كیشه‌ نه‌یاشتوود وه‌ل زوورم حزب و لایه‌نه‌یل سیاسى، ئه‌را نموونه‌: كیشه‌ى ناونى به‌غداو هه‌ولێر هیمان یه‌كلاوه‌ نه‌ویه‌و كورد متمانه‌ وه‌ حكوومه‌ت مالكى نه‌یرید ئه‌را چاره‌سه‌ر كیشه‌یلى، وه‌ل ئه‌وه‌یشا سنى هه‌ر له‌بنه‌ڕه‌ته‌و كیشه‌و گرفت داشتنه‌ له‌ساى وجوود حوكم شیعه‌و ئه‌وه‌سه‌ له‌ زوورم ناوچه‌یلیان جه‌نگ و كوشتار روى دا، یه‌یش بیجگه‌ ئه‌وه‌ك هه‌م سنى و هه‌م لایه‌ن كوردیش وه‌زیره‌یل خوه‌یان له‌ دانیشتن ئه‌نجوومه‌ن وه‌زیره‌یل و دانیشتنه‌یل په‌رله‌مان خوه‌یان كیشانه‌سه‌و تا وه‌ختیگ بڕه‌سنه‌ ده‌رئه‌نجامیگ پڕ باوه‌ڕ . ماناى ئه‌وه‌سه‌ هه‌ر هه‌وڵ و ته‌قلایگ ئه‌را وه‌یه‌كه‌وه‌ناین پیكهاته‌یل و كووتاییهاوردن كیشه‌یل ته‌نیا ماڵ جیایى و فیدراڵیه‌.

 

جه‌ماڵ ئه‌ركه‌وازى