چاره‌نويس يا به‌رژه‌وه‌ندی!

شفق نيوز

 

مه‌سه‌له‌ی "چاره‌نويس"راسه‌ تا راده‌يگ جوور ئه‌وه‌ك فريه‌يگ له‌ مه‌ردم ‌كوومه‌ڵگا باوه‌ڕ وه‌پی ديرن، وه‌لی ئايا بوود له‌ گشت حاڵه‌تيگ ئيمه‌ ئه‌قڵ خوه‌مان به‌يمنه‌ ده‌س قسمه‌ت و بويشيم چاره‌نويسيگه‌و نويسياگه‌؟ يا بويشيم يه‌ قسمه‌ته‌و بايه‌سه‌ بوود؟ ئه‌ی خاس ئه‌گه‌ر گشت كاريگ قسمه‌ت وچاره‌نويس بوود، دی ده‌ور ئه‌قڵ چه‌س له‌ بڕيار؟

ئمجا ئه‌گه‌ر مه‌سه‌له‌گه‌ له‌يوا بوود و ئه‌را گشت چشتيگ ئاده‌ميزاد ئه‌قڵيه‌ت خوه‌ی بخاده‌ ژير كۆنترۆڵ و فه‌رمان چاره‌نويس، دی بايه‌سه‌ له‌گشت كرده‌وه‌يگ هه‌ر چه‌وه‌ڕی ئه‌و چاره‌نويسه‌ بكريه‌يد و بنيات گشت كاريگيش له‌بان چاره‌نويس بنريه‌يد، يه‌ه‌يش وه‌و مانا ك دی بايه‌سه‌ گشت هه‌ڵسووكه‌فت و ره‌فتار و كاره‌يلمان په‌يوه‌سه‌ بكه‌يمه‌ چاره‌نويس و جوور براگه‌ورايگ ته‌ماشای فه‌رمان و بڕياره‌يلی بكه‌يم!!

جار له‌يوا هه‌س نوڕيد باوگ ودايگ يا خيزان و بنه‌ماڵه‌ له‌وه‌ر خاتر به‌رژه‌وه‌ندی وه‌رته‌نگ خوه‌يان، ئه‌زيزترين زينه‌ت دونيايی خوه‌يان ئه‌كه‌نه‌ قوربانی ئه‌و به‌رژه‌وه‌نديه‌ و هوير له‌وه‌ ناكه‌ن ئاقبه‌ت ئه‌و چاره‌نويس ده‌سكرده‌ چ ئاخ و حه‌سره‌تيگ ئه‌ڕايان هه‌ڵگرتگه‌ له‌ ئاينده‌و خوه‌يان وه‌پی ئه‌يه‌نه‌ ده‌س دوياڕووژ لێڵ و تاريگ و دوياخريش بايه‌سه‌ هه‌وڵ ئه‌وه‌ بيه‌ن وه‌ په‌له‌پرتی و نيمه‌گيان له‌لی قوتار بوون، هه‌ر له‌وه‌ر ئه‌وه‌يش فريه‌جار ئاده‌ميزاد له‌وه‌ر ته‌مه‌ی ماڵ دونياو دارايی و ده‌سكه‌فتن ژيانيگ به‌خته‌وه‌ری له‌بان هساو چاره‌نويس ده‌سكرد، خوه‌ی ئه‌خاده‌ وه‌ر ره‌خنه‌و تيروتانه‌ی ئه‌ی وئه‌و.

وشه‌ی چاره‌نويس له‌ ژيانمان فريه‌ دوباره‌وه‌ ئه‌كريه‌يد، كه‌سه‌يليگ هه‌ن له‌يوا باسی ئه‌كه‌ن ك گوايا وه‌بی ئاگاو بی خواست و له‌ناكاو روی ئه‌يادو هه‌ر له‌ خوداوه‌ بڕياری درياگه‌، كه‌سه‌يليگيش وه‌ چه‌واشه‌وه‌ باس له‌لی ئه‌كه‌ن ك گوايا فه‌رمانيگ ده‌سكرده‌ وه‌گووره‌ی بار و به‌رژه‌وه‌ندی دروس ئه‌كريه‌يد، هه‌ر وه‌و خاتريشه‌ مه‌سه‌له‌ی چاره‌نويس هوير مه‌ردمان فريه‌يگ وه‌ خوه‌يه‌و سه‌رقاڵ كردگه‌.

له‌يرا ريككه‌فت"سودفه"يش نه‌خش خوه‌ی ديريد له‌ هه‌ڵبژارده‌، چوينكه‌ ئاده‌ميزاد دو ڕی ئه‌رای دياری كرياگه‌، ك ئه‌ويش يه‌كيگيان شايه‌ت وه‌خاس بنيشيد ئه‌رای و ئه‌واكه‌ وه‌ خراو، يه‌يش مينيده‌ بان بريار خوه‌ی نه‌ك چاره‌نويس، چوينكه‌ له‌يرا تواناو ناتوانايی و په‌يمانه‌ی ئازايه‌تی و بيده‌سڵاتی ئاده‌ميزاده‌گه‌ ده‌رئه‌كه‌فيدو جار له‌يوا هه‌س توانای كۆنترۆڵكردن مه‌سه‌له‌گه‌ نه‌يريدو ناچاره‌ وه‌ليا بگونجيه‌يد، وه‌لی جار له‌يوايش هه‌س زاڵه‌ له‌بان كاره‌گه‌و توانای بڕيار و چاره‌نويسی ئه‌ياد، ك يه‌يش له‌ هه‌ڵبژارده‌ی خود ئاده‌ميزاده‌.

ئمجا ئه‌تويه‌نيم بويشيم چشته‌يليگ هه‌ن دويرن له‌ ده‌خاڵه‌ت ئاده‌ميزادو شايه‌ت ره‌زامه‌نی خودای په‌روه‌ردگار له‌تی بوود، ك يه‌يش چاره‌نويس و نويسرياگه‌، وه‌لی كرده‌وه‌يليگيش هه‌ن زاينده‌ی سروشت نيه‌و له‌ ده‌سكرد و بريار ئاده‌دميزاده‌و سه‌رچه‌وه‌ ئه‌گريد.

مه‌حموود قادر

ج . أ