مقه‌یه‌تیكردن زووان كوردى

شفق نيوز

گشت نه‌ته‌وه‌یگ تا تویه‌نستگه‌ مقه‌یه‌تى له‌ زووان نه‌ته‌وه‌یى خوه‌ى كردگه‌و هه‌ر وه‌ختتیگیش زووانه‌گه‌ى فه‌وتیاگه‌ ئه‌وه‌ بیگومان خود ئه‌و نه‌ته‌وه‌یشه‌ فه‌وتیاگه‌و نه‌مه‌ندگه‌.

 

 

له‌تاریخ ده‌یه‌ها نه‌ته‌وه‌ له‌بان ده‌س داگیركه‌ره‌یل له‌ناوچیه‌و ئیسه‌ بویه‌سه‌ به‌شیگ له‌ گوزه‌یشت یا تیكه‌ڵ نه‌ته‌وه‌ى سه‌رده‌س بویه‌. ئیمه‌ى كورد هه‌رچه‌نى زووانه‌گه‌مان دیر بویه‌سه‌ زووان نویسانن و خوه‌ندن ته‌نانه‌ت نه‌ته‌وه‌گه‌ى خوه‌مانیش، وه‌لى له‌وه‌رانوه‌ر ئه‌وه‌یش وه‌ بوونه‌ى سه‌رخستن نه‌ته‌وه‌گه‌مان له‌وه‌رانوه‌ر داگیركه‌ره‌یل هه‌میشه‌ مقه‌یه‌تى له‌ زووان داڵگى خوه‌ى كردگه‌ جوور به‌شیگ له‌ ناسنامه‌و سیماو شیواز نه‌ته‌وه‌یى.

 

داگیركه‌ره‌یل كوردستان له‌یه‌كه‌م چركه‌ سه‌عات دابه‌شبوین كوردستان، هه‌وڵ یه‌كه‌میان قه‌یه‌غه‌كردن زووانه‌گه‌مان بویه‌، ك زووانه‌گه‌مان تا ئیسه‌یش هه‌ر مه‌نده‌وه‌ ، وه‌لى ئمڕوو له‌ساى ئازادى و ده‌سڵات خوه‌مانى خه‌ریكه‌ زووانه‌گه‌مان ریڕه‌و خراویگ گریده‌ وه‌ر، ك ئه‌ویش له‌بان ده‌س ئه‌ندامه‌یل نه‌ته‌وه‌گه‌ى خوه‌مان له‌وه‌ر وجوود دام و ده‌زگایگ فره‌ى چاپ و بڵاوكردن زووان كوردى ك كه‌فته‌سه‌ وه‌ر شه‌پۆل یا مه‌وجیگ گه‌وراى ده‌سكاریكردن و شیوانن.

 

ئه‌وه‌ك رووژانه‌ ته‌ماشاى گووڤار و رووژنامه‌یل بكا، ئه‌وسا زانید چه‌ گوزه‌رید له‌ زووان كوردى، یا ئه‌گه‌ر ته‌ماشاى ئه‌و دام وده‌زگایه‌یله‌ بكه‌یم ك كار ئه‌ڵه‌وگه‌ردانن ئه‌نجامده‌ن ئه‌وه‌ وه‌راسى ویرانه‌كارییگ له‌ زووان كوردى دروس كردنه‌ له‌ داناین و تاشین وشه‌و ده‌سه‌واژه‌ى تازه‌.

 

هه‌ر له‌وه‌ر ئه‌وه‌یش داواكاریم له‌ حكوومه‌ت هه‌رێم ك ئیسه‌ دامه‌زریاگه‌یل ئه‌كادیمى و زووانیش دامه‌زرانگه‌، بایده‌ ته‌نگ ئى مه‌سه‌له‌و با مقه‌یه‌تیكردن زووانه‌گه‌مان بووده‌ ئه‌ركیگ نیشتمانى نه‌ته‌وه‌یى، هه‌ر له‌وه‌ر ئه‌وه‌یش بایه‌سه‌ ده‌زگایگ شاره‌زا ئه‌را زووانه‌گه‌مان دابنریه‌ید.

 

ده‌رخستن هویرو باوه‌ڕ تاكه‌یل كوومه‌ڵگا و مه‌ردمه‌یلى ئازادن ئه‌را خوه‌یان، وه‌لى هویچ وه‌ختیگ شیوانن زووان كه‌س له‌تى ئازاد نیه‌، چوینكه‌ ئه‌یه‌ موور نه‌ته‌وه‌ییمانه‌و هه‌ق نه‌وه‌یل ئاینده‌مانیشه‌، هه‌ر له‌وه‌ر ئه‌وه‌یش ئه‌و دامه‌زریاگه‌ ك خواسته‌ دامه‌زریه‌ید بایه‌سه‌ بووده‌ پاڵینیگ ئه‌را زووان كوردى.

 

هه‌ر باوه‌تیگ بڵاوكریاگ چ وه‌ كوردى نویسریا چ ئه‌ڵه‌وگه‌ردیا ئه‌را بان زووان كوردى بایه‌سه‌ بچووده‌ ئه‌و ده‌زگا نه‌ك جوور ئیسه‌ وه‌ مه‌رام بازرگانى هه‌رچى باوه‌ته‌ دویره‌ له‌بنه‌ماى زانستى زووانه‌و. یا دوینید نویسانن بان هه‌ر كاڵاو ریكلامیگ ئایه‌م ئه‌خاده‌ خه‌نستن له‌وه‌ختیگ ئه‌و وشه‌یله‌ خوه‌ندیده‌و ك گوایا كوردیه‌.

 

له‌یرا ئامانجمان ئه‌وه‌سه‌ مه‌رزیگ ئه‌را مقه‌یه‌تیكردن زووانه‌گه‌مان دابنه‌یم تا له‌یه‌ودویا زووانه‌گه‌مان تویش شیوانن ناید. وه‌ل ئه‌وه‌یشا دوینیم ك ئیراده‌ى چاره‌سه‌ركردن كزه‌، وه‌لى یه‌یش په‌یوه‌سه‌ وه‌ مه‌ردمان زانستخواز و نه‌ته‌وه‌په‌رس ك بایه‌سه‌ خه‌مى بكیشن و ڕى له‌ شیواننى بگرن.

 

شادمان مه‌لا حه‌سه‌ن