ناڕووشنهویره‌یل وه‌ڕووشنهویركریاگ

شفق نيوز

شیواز ڕه‌فتار و هه‌ڵسووكه‌فتى زه‌ره‌دبه‌خش نه‌ود،  چوینكه‌ رووشنهویرى پێكهاتگه‌ له‌ هس و هویر و رێڕه‌و پاك و بێگه‌رد له‌وه‌ر خاتر سه‌رخستن ئه‌رك و پێشخستن ئه‌و كوومه‌ڵگا ك یه‌كێگ له‌نیشانه‌یل سه‌ركه‌فتنى وجوود كه‌سه‌یل رووشنهویره‌ له‌تى.

 

 

كه‌س رووشنهویر ئه‌و كه‌سه‌سه‌ ك متمانه‌ وه‌ رووشنهویریه‌ت خوه‌ى بكاو ساخته‌كار و چه‌واشه‌كار هه‌قه‌یل نه‌ود، وه‌تایبه‌ت نویسه‌ر و رووژنامه‌نویسه‌یل ئمڕوو ك هه‌ركه‌سێگ هه‌ڵسێد و خوه‌ى كردگه‌سه‌ نویسه‌ر و ناسنامه‌یگ رووشنهویرى ناسه‌ گیرفان و له‌ ژیانیشى نه‌زانستگه‌ رووشنهویرى چه‌سه‌و رووشنهویر كییه‌!! بیگومان رووشنهویرى ئه‌و بواره‌سه‌ ك قه‌ڵه‌م هه‌ق و زانیارى باوه‌ڕ وه‌پیكریاگ و ده‌رخستن باوه‌ته‌یل بنه‌مادار ده‌سنیشان ره‌سه‌نایه‌تیه‌گه‌ى كه‌ن.

 

ئمڕوو دوینیم دام و ده‌زگایه‌یل فره‌یگ رووشنهویرى واز كریانه‌و هه‌ر یه‌كیگ له‌لیان چه‌نه‌ها وه‌ناو رووشنهویر گرتگه‌سه‌ خوه‌ى و فكر و ره‌خنه‌و هویر و ڕاى نه‌خوه‌ش خوه‌یان له‌ڕێ ئه‌و ده‌زگاو ماڵه‌په‌ڕ و كۆنگره‌و سمیناره‌یلیانه‌ ره‌سننه‌ مه‌ردم كوومه‌ڵگا وه‌ ئامانج له‌كه‌داركردن ره‌وڕه‌وه‌ى ژیان و له‌باربردن دروشم ئنسانى و زه‌نگزڕانن ئه‌ى و ئه‌و، وه‌تایبه‌ت له‌بان ماڵپه‌ڕ په‌یوه‌ندیه‌یل كوومه‌ڵایه‌تى"فه‌یسبوك" ك له‌ى ساڵه‌یل دویاخره‌ بویه‌سه‌ سه‌كوویگ ئه‌را نیشانداین هویر و ڕاو باوه‌ته‌یل جووراوجوور سیاسى و كوومه‌ڵایه‌تى و ئابوورى و رووشنهویرى..هتد، ئمجا بوار رووشنهویرى ئه‌و گوڵه‌م قویل و پانه‌سه‌ ك ئمڕوو مه‌ردمان فره‌یگ خوازن له‌تى مه‌له‌وانى بكه‌ن و قویتگه‌ له‌تى بخوه‌نه‌و، وه‌لى نووڕید بڕێگ له‌لى وه‌ هه‌ناسه‌بڕكى له‌لى قورتار بوون و بڕێگیش خنكیه‌ن و بڕێگیشى مه‌له‌وانن و گشت جووره‌ مه‌له‌وانییگ  له‌تى كه‌ن و لیخنیشى ناكه‌ن.

 

ئاشكراس ك ئیمه‌ له‌سه‌رده‌میگ ژیه‌یم پیشبینى كار وكرده‌وه‌یگ گومانلیكریاگ كریه‌ید، وه‌ل ئه‌وه‌یشا تایبه‌تمه‌ندى بواره‌یل جیاجیاى ژیان زینه‌ت و جوانى له‌ ده‌سداگه‌و زوورم رووشنهویره‌یل ره‌سه‌ن و خاوه‌ن قه‌ڵه‌م و خه‌مخوه‌ر ملله‌ت و كوومه‌ڵگا وه‌ چه‌و كینه‌ت و نا ئنسانیه‌و ته‌ماشا كریه‌ن، ئه‌ویش له‌وه‌ر ئه‌وه‌ك وشه‌ى پاك له‌ وژدان پاكه‌و ده‌رتیه‌رن و گوزارش وه‌پى كه‌ن، وه‌لى نارووشنهویره‌یل وه‌ ڕووشنهویركریاگ بیجگه‌ ئه‌وه‌ك دویرن له‌ ماناو بنه‌ماى رووشنهویریه‌ت، دوینید وه‌ل ئه‌وه‌یشا بوینه‌سه‌ براى به‌رژه‌وه‌ندى و یه‌خسیر ده‌س لایه‌ن و حزب و ده‌سه‌ڵات، ك یه‌یش پیشبینى هویچ تازه‌گه‌رى و بنیاتگه‌رییگ له‌لى ناكریه‌ێد و دڵخوه‌شكه‌ر نییه‌.

 

هویچ وه‌ختیگ ئاده‌میزاد رووشنهویر و باوه‌ڕدار بێجگه‌ خودا نادێده‌ به‌نه‌ى كه‌س تر و سه‌ر  به‌رژه‌وه‌ندى خوه‌ى ناچه‌منێد وه‌ ته‌نیا، به‌ڵكوو هه‌میشه‌ هه‌وڵ ئه‌وه‌ ئه‌یاد ئه‌رك ئنسانى و رووشنهویرى خوه‌ى بارێده‌ جى و مینه‌ى به‌رژه‌وه‌ندى گشتى ئه‌كاو لاپه‌ڕه‌ى ساده‌و چه‌رمگ وه‌ وشه‌ى نادروس له‌كه‌دار ناكا وه‌گووره‌ى ئه‌و ره‌فتار و ئه‌خلاقه‌ ك له‌بانى په‌روه‌رده‌ بویه‌و ئه‌و رووشنهویریه‌ ك له‌ هه‌گبه‌ى ژیانى وجوود دیرێد، یه‌یش ماناى ئه‌وه‌سه‌ گشت ملله‌ت و كوومه‌ڵگایگ له‌وه‌ر خاتر سه‌ركه‌فتن و پێشكه‌فتن هه‌وه‌جه‌ وه‌ى جووره‌ رووشنهویره‌یله‌ دیرێد نه‌ك ئه‌و كه‌سه‌یله‌ ك هه‌ل ومه‌رج رووژگار و لایه‌نه‌یلیگ له‌وه‌ر خاتر به‌رژه‌وه‌ندى و ئامانجه‌یلیان كردگه‌سه‌یانه‌ رووشنهویر.

 

جه‌ماڵ ئه‌ركه‌وازى