كووتایى قه‌یرانه‌ یاسه‌ره‌تاى ده‌رچگنه‌ له‌لى؟

شفق نيوز

موفاجئه‌یگ نه‌وى له‌بان ئاست گه‌شه‌كردن سروشتى كوومه‌ڵگایه‌یل ئنسانى ك له‌شوون ئازادى خوه‌یان گه‌ردیان و تواسن به‌خته‌وه‌ر بوون له‌ساى ئه‌و ئازادیه‌و دژ رژیمه‌یل سته‌مكار بوون و هه‌ر وه‌ختیگ بتوان لاوه‌نه‌ى.

ئیسه‌یش هه‌وه‌جه‌ وه‌ ئه‌وه‌ نه‌یریم رویداگه‌یل تاریخى باس بكه‌یم ئه‌را ئسپاتكردن ئه‌وه‌، له‌شوون ئه‌وه‌ك وه‌زع ئیسه‌ى وڵاته‌یل فره‌یگ  دیاره‌و باو دیموكراسیه‌ له‌ جه‌هان، ئه‌ویش وه‌ ده‌لیل ئه‌وه‌ك ك هس مه‌ردم و ملله‌ته‌یل فره‌ گه‌وراسه‌و هه‌وه‌جه‌ وه‌ ئازادى و كه‌رامه‌ت ئنسانى دیرن و به‌خته‌وه‌رى توان له‌سایه‌ى ئه‌و ئازادى و كه‌رامه‌ته‌.

له‌یرا ئویشیم: هه‌یواین سه‌رۆك تونسى وه‌رجه‌ ڕووژه‌یلیگ موفاجئه‌یگ  نه‌وى ئه‌ڕامان، وه‌لى تا ڕاده‌یگ  موفاجئه‌یگ بوى ئه‌را فه‌رمانڕه‌وایه‌یل سته‌مكار له‌ناوچه‌ى عه‌ره‌بى له‌وانه‌ك توان تا مردن له‌بان ته‌خت ده‌سڵات بوون و ئه‌و ده‌سڵاتیشه‌ وه‌میرات له‌شوون خوه‌یان بیلنه‌ جى ئه‌را كوڕه‌یلیان و نه‌وه‌یلیان، ئمجا په‌یام ئه‌و كاره‌ ئه‌وه‌ بوى ئه‌و حاكمه‌یله‌ یا ئه‌و چه‌ودیره‌یله‌ رژیم سه‌رۆك تونسى وه‌ سه‌قامگیر فره‌یگ  دانان له‌ناونى رژیمه‌یل عه‌ره‌بى.

ئیمه‌ نیه‌تویه‌نیم چشتیگ پیشكه‌ش بكه‌یم ته‌نیا ئه‌وه‌ نه‌وگ خوه‌شحاڵى خوه‌مان نیشان ملله‌ت تونسى به‌یم ئه‌را ئه‌و كاره‌ ك ئه‌نجامى دان له‌وه‌ر خاتر ئازادى و به‌خته‌وه‌رى و ژیان ئاسووده‌، چوینكه‌ كاره‌گه‌ مه‌عنایه‌یل فره‌یگ  دیریگ و مقه‌یه‌تیكردن توایگ، له‌وانه‌یش ك محه‌مه‌د غه‌نوشى ك هه‌ڵوژریا ئه‌را سه‌رۆك له‌وه‌خت هه‌یواین ئبن عه‌لى ده‌سڵاته‌گه‌ وه‌رگرت ك وه‌ چه‌واشه‌ى ده‌ستووره‌گه‌ى ئیسه‌ بوى، له‌وه‌ر ئه‌وه‌ ده‌ستوور تونسى ئویشیگ: هه‌ركه‌سیگ  سه‌رۆكایه‌تى كوومار وه‌ربگریگ له‌حاڵه‌ت نه‌وین سه‌رۆك له‌وه‌ر هه‌ر هووكاریگ بایه‌سه‌ له‌بانى تا ماوه‌ى 45 تا 60 رووژ سه‌رۆك ئه‌نجوومه‌ن نوێنه‌ره‌یل بوود و ده‌ویاخریش ئه‌گه‌رهه‌ڵوژاردن سه‌رۆكایه‌تى كریا نیه‌وگ سه‌رۆك ئه‌نجوومه‌ن نوێنه‌ره‌یل كاندید خوه‌ى بكا، دیاره‌ غه‌نوشى هه‌وڵ ئه‌وه‌ دا ریگه‌یگ  بوینیگه‌وه‌ تا ده‌رچووگ له‌و بڕگه‌ یا فه‌قه‌ره‌ى ده‌ستووریه‌ ك گوایا تواس بویشیگ  سه‌رۆك وه‌شیوه‌یگ وه‌ختى ئه‌و ده‌سڵاته‌ وڵكردگه‌.

بیگومان ئیمه‌ وه‌ زووان مله‌ت تونسى قسه‌ نیه‌كه‌یم و خوه‌یان خاستر زانن، وه‌لى باوه‌ڕمان له‌یواسه‌ ك بایه‌سه‌ له‌بانیانمقه‌یه‌ت بوون له‌ سه‌رهه‌ڵداین سته‌مكاره‌یل تر ك ئیجاره‌ وه‌شیوازیگ سه‌ربازیه‌وه‌ بایگ. له‌باوه‌ت قه‌یران تونس بایه‌سه‌ وه‌شیوه‌ى خاسیگ مامڵه‌ وه‌ل ملله‌ته‌گه‌یا بكریه‌یگ و هه‌وڵ ئه‌وه‌ بدریه‌یگ وه‌زع ئابوورى و گوزه‌ران خاستره‌و بوود له‌وه‌ختیگ  دیموكراسى بایگه‌ وجوود ك بایه‌سه‌ ئازادى و ده‌س وه‌ ده‌س ئاشتیانه‌ى ده‌سڵاتیش جى وه‌جى بكریه‌یگ، وه‌نا ئه‌گه‌ر بایگ و له‌یوا نه‌وگ ئه‌وه‌ بیگومان ناوچه‌گه‌ كاره‌سات فره‌یگ وه‌ خوه‌یه‌وه‌ دوینیگ  و له‌ كووتاییش وه‌ رژیمیگ  سته‌مكار ته‌واو بوود.