په‌رله‌مانتاره‌یل دڵنیان له‌ تواناى ده‌زگایه‌یل ئاسایشى له‌ شوون خودكیشان هێزه‌یل ئه‌مریكى

شفق نيوز

ئاسایشى له‌ شوون خودكیشان هێزه‌یل ئه‌مریكى له‌ كووتایى ئى ساڵه‌ وه‌ڕیه‌و بووه‌ید، و ئه‌وه‌یشه‌ ڕووشنه‌وكردن ك ده‌رچوین ئى هێزه‌یله‌ كاریگه‌رى نه‌یرید له‌بان بارووه‌زع ئاسایشى و خزمه‌تگوزارى.

حاكم زاملى ئه‌ندام لوجنه‌ى ئاسایش و وه‌رگرى په‌رله‌مانى له‌ په‌یوه‌ندییگى وه‌ل شه‌فه‌ق وت:"هه‌ركه‌سى بویشى حكوومه‌ت و داموده‌زگاى ئاسایشى عیراق تواناى وه‌رگردن دۆسیه‌ى ئاسایشى نه‌یرى له‌ شوون خودكیشان هێزه‌یل ئه‌مریكى  له‌ كووتایى ئى ساڵه‌، ئه‌وه‌ وه‌ هه‌ڵه‌وه‌ چیه‌ و به‌ڵگه‌مانیش ئه‌وه‌سه‌ ك حكوومه‌ت و داموده‌زگاى ئاسایشى عیراقى تویه‌نست خودنیشانداینه‌ میلیۆنیه‌گه‌ مقه‌یه‌تى بكه‌ید، بى ئه‌وه‌گ هویچ ڕویداى ئاسایشییگ روى بیه‌ید".له‌ ئاماژه‌یگ ئه‌را ئه‌و خودنیشانداینه‌ ك ڕه‌وت سه‌درى له‌ ڕووژ شه‌ممه‌ى وه‌رین له‌ مه‌یدان موسته‌نسریه‌ ڕێكى خست و ده‌یان هه‌زاركه‌س له‌تى به‌شدارى كردن.

زاملى ئه‌وه‌یشه‌ ڕووشنه‌وكرد ك:"هێزه‌یل ئه‌مریكى نه‌یشتن و تائیسه‌یش نیه‌یلن ك له‌شكر عیراق چه‌ك و تفاق سه‌ربازى خاس و پیشكه‌فتى بسینى، له‌وه‌ر ئه‌وه‌ ئویشیمن ك مه‌نین هێزه‌یل ئه‌مریكى ماوه‌ نیه‌ید ئه‌را بینا كردن داموده‌زگایه‌یل ئاسایشییگ ك تواناى مقه‌یه‌تى كردن عیراق داشتوون".

ئاماژه‌یش وه‌وه‌ دا ك:"جموجویلیگ له‌ لایه‌ن ئه‌مریكا هه‌س وه‌ڕیگه‌ى وه‌زیر وه‌رگرى یا دیفاع وه‌ ئامانج ڕازى كردن حكوومه‌ت عیراق ك دریژه‌ بیه‌یده‌ مه‌نین هێزه‌یل ئه‌مریكا له‌ عیراق". و له‌بان ئه‌وه‌یشه‌ جه‌ختكرد ك :"گشت هێزه‌یل سیاسى یه‌كڕان له‌بان ده‌رچوین هێزه‌یل ئه‌مریكا له‌و ماوه‌ ك ڕیككه‌فتننامه‌گه‌ دیاریى كردیه‌".

له‌لاى خوه‌یه‌و كه‌میله‌ موسه‌وى ئه‌ندام لوجنه‌ى خزمه‌تگوزارى و ئاوه‌دانكردن په‌رله‌مانى له‌ قسه‌یلى ئه‌را شه‌فه‌ق وت:"ده‌رچوین هێزه‌یل ئه‌مریكا كاریگه‌رى نه‌یرید له‌بان بارووه‌زع خزمه‌تگوزارى، و ئه‌و كه‌موكوڕیه‌ ك تویش خزمه‌تگوزارى هاتیه‌ له‌ ئاكام گه‌ناته‌كارى دارایى و ئیداریه‌ ك له‌ وڵاته‌گه‌مان په‌رش و بڵاوه‌و بویه‌". و له‌بان ئه‌وه‌یشه‌ جه‌ختكرد ك :"وه‌به‌رهاوردن یا ئستسمار له‌ كه‌رت خزمه‌تگوزارى وه‌ مه‌نین هێزه‌یل ئه‌مریكاوه‌ به‌ن نیه‌، و ده‌رچوینیان كاریگه‌رى نه‌یرى له‌ى باوه‌ته‌".

ئه‌وه‌یشه‌ ڕووشنه‌وكرد ك:"له‌و ڕووژه‌و هێزه‌یل ئه‌مریكا هاتنه‌سه‌بان خاك عیراق تا ڕووژ ئمڕوو، كۆمپانیایه‌یل وه‌به‌رهاوردن نه‌هاتنه‌سه‌ ناو عیراق، ته‌نانه‌ت له‌و پارێزگایه‌یلیشه‌ ك بارووه‌زعیان سه‌قامگیره‌". و ئه‌وه‌یشه‌ وت ك:"هه‌رێم كوردستان چالاكه‌ له‌ لایه‌ن پرۆژه‌یل خزمه‌تگوزارى و وه‌به‌رهاوردن وه‌ پشت به‌سانن وه‌ هێزه‌یل ئاسایشى خوه‌ى بى ئه‌وه‌گ لایه‌ن ئه‌مریكى ده‌س له‌تى داشتوود".

بڕیاره‌ ك هێزه‌یل ئه‌مریكى له‌ كووتایى ئى ساڵه‌ له‌ عیراق خوه‌یان بكیشنه‌و وه‌گووره‌ى ئه‌و ڕیككه‌فتننامه‌ ك ئه‌مریكا له‌ سه‌رده‌م سه‌رۆك بۆش وه‌ل حكوومه‌ت عیراقه‌و ئمزاى كرد له‌ ساڵ 2008.

له‌ى باوه‌تیشه‌ نورى مالكى سه‌رۆك وه‌زیره‌یل ڕووژ یه‌كشه‌ممه‌ى وه‌رین ئه‌وه‌ ئاشكراكرد ك هێزه‌یل چه‌كدار و داموده‌زگایه‌یل ئاسایشى تواناى ئه‌وه‌ دیرن ك وه‌رپرسیارێتى ته‌واو وه‌ربگرن له‌ شوون خودكیشان هێزه‌یل ئه‌مریكى له‌ كووتایى ئى ساڵ حازریه‌.