سه‌ڵامه‌تی عراق..كورده‌يل فه‌يلی

شفق نيوز

ويستگه‌يليگ هه‌ن چه‌نه‌ها ده‌سكه‌فت و كارفراوانی و دقه‌تكردن له‌بان پيشكه‌فتن و خاسسازی و راسه‌وكردن چه‌فتيه‌يل و خاڵه‌يل كزی و بته‌وكردن لايه‌نه‌يل خاسی و خواستی ئه‌گريده‌و، ويستگه‌يليگيش هه‌ن پڕه‌ له‌ يادگاريه‌يل تيه‌ڵ وشيرين له‌سای بار سه‌خت ئيچنه‌ كاريگ ره‌سانن له‌ كه‌ش وهه‌وايگ پڕ له‌ گرفت و ئاژاوه‌.

ئمجا وه‌ل گشت ئه‌وه‌يشا يه‌يش له‌ هوير ناكه‌يم ك له‌يرا خاڵيگ جه‌وهه‌ری و هاوبه‌ش هه‌س له‌ ناونی ژينگه‌ی عراق و كيشه‌ی كورده‌يل فه‌يلی، ك ئه‌ويش نه‌وين سه‌قامگيری و سه‌ختی ره‌سينه‌ ئه‌را دروسه‌وكردن كيشه‌يل له‌بان بنه‌مای راس ودروس و وه‌گووره‌ی گفت ئنسانيه‌ت و نيشتمانی و ته‌نانه‌ت باوه‌ڕه‌يل نه‌ته‌وايه‌تی و ئايينی.

ئيمه‌ دوينيم ك فه‌يليه‌يل له‌ توانای خوه‌يان فيشتر پيشكه‌ش وه‌ی وڵاته‌ كردن و له‌ به‌ش خوه‌يان فيشتر ئه‌رك خوه‌يان وه‌جی هاوردن، وه‌لی بيجگه‌ گشت گوزاره‌يل جوور زوڵمليكرياگ و سته‌مديده‌ و سه‌رگه‌ردان له‌ی بار سه‌خته‌و ئه‌وه‌ك هاته‌ تويشيه‌و وه‌ بوونه‌ی ئه‌و سياسه‌ته‌يل چه‌فت وه‌رپرس و پلانه‌يل وه‌رده‌وام ده‌ره‌كيه‌ مه‌سه‌له‌گه‌ زه‌حمه‌ته‌ ئه‌را هه‌ر لايه‌نيگ له‌ لايه‌نه‌يل كيشه‌يگ جوور كيشه‌ی ئيمه‌ بگرده‌ خوه‌ی وه‌و خواست و ئيراده‌ی ئيمه‌.

من له‌ باوه‌ته‌يل گوزه‌يشته‌م باس كردم و ئيسه‌يش ئويشم: ئه‌گه‌ر بخوازيم ئاست خاسه‌وبوين بار عراق و گوزاره‌ی هاووڵاتيبوين و شيرازه‌ی نيشتمانی و ئاست قه‌بولكردن يه‌كتری بوينيم، ئه‌وه‌ بايه‌سه‌ وه‌ چه‌و پڕ گرينگيه‌و بنوڕيمنه‌ كيشه‌ی فه‌يلی له‌ بوار هاوردنه‌وه‌ی مافه‌يل و سه‌قامگيركردنی و راده‌ی لاوردن زوڵم و سته‌م له‌بانی.

له‌ ده‌يه‌مين ساڵياد شه‌فه‌ق ك ريككه‌فته‌ وه‌ل گوزه‌ركردن وڵات وه‌ رووژه‌يل سه‌خت و بار مه‌ترسيداريگ له‌بان گشت عراقيه‌يل، توانای سازكردن ئاهه‌نگ نه‌يريم جوور ئه‌وه‌ك كه‌سه‌يل تر ئاهه‌نگ ساز ئه‌كه‌ن له‌ی جووره‌ بوونه‌يليگ، ئمجا وه‌ گشت زه‌خميگه‌و هس وه‌ ژانه‌يل ملله‌ت ئه‌كه‌يم و هس وه‌ مه‌ترسی بار ئيسه‌ ئه‌كه‌يم، چوينكه‌ ئی دوشمنه‌"ترۆر و تونڕه‌وی" وجوود ديريد له‌ مه‌يدان و دوشمن گشت ئه‌و چشته‌يل ژيان و باوه‌ڕ و ريڕه‌وه‌يله‌سه‌ ك ملله‌ت عراقی باوه‌ڕ وه‌پی ديرن.

بايه‌سه‌ ئه‌وه‌يش له‌هوير نه‌كه‌يم ك پيرووزبايی له‌ گشت ئه‌وانه‌ك بكه‌يم ك كار له‌ شه‌فه‌ق كردن و شانازی بكه‌يم وه‌ كارمه‌نده‌يلی وه‌تايبه‌ت ئيزگه‌گه‌ ك وه‌ شايه‌تی گشت شنه‌وياره‌يل ئيزگه‌يگه‌ چيه‌سه‌ ناو دڵ گشت شنه‌وياره‌يل له‌گشت چين و پيكهاته‌يگ و په‌يامه‌گه‌يشی نيشانه‌ی خوه‌شه‌ويسی و ئاشتيه‌ له‌ ناونی گشت مه‌ردم وه‌ هه‌ر زووانيگ و هه‌ر شيوه‌يگ وه‌ دريژايی ساڵه‌يل گوزه‌يشته‌.

ئيمه‌ چه‌وه‌ڕی ئه‌كه‌يم و ئوميده‌واريم ك به‌ر شه‌فه‌ق بڕه‌سيده‌ گشت ماڵيگ له‌ گشت شوونه‌يل عراق، چوينكه‌ ئيمه‌ خوازياريم ئی نيشتمان و ئی ملله‌ت له‌سای ئاشتی بژيه‌ن دوير له‌ كاولكاری هاورياگ ئه‌وانه‌گ خه‌ير وه‌ رووڵه‌يلی ناخوازن. جاريگتر موباره‌ك بوود له‌ خيزان شه‌فه‌ق و دڵسووزه‌يل شه‌فه‌ق و گشت ئه‌وانه‌گ به‌شداری كردن له‌ دامه‌زرانن و وه‌رده‌وامی و به‌شدارن له‌ مه‌ندنی له‌بان ئی ريڕه‌و ئنسانی و پيشه‌يی و نيشتمانيه‌.

عه‌لی حسێن فه‌يلی

ج . أ