ئيمه‌ هووكاره‌ی قوروانی داينيم

شفق نيوز

به‌ش باشوور ئه‌ی وڵاته‌ وه‌ كار هاوردن. فره‌ جوور شێواز خه‌بات كردن گيرياوه‌ر، هه‌رچه‌ن شۆڕشگێره‌يل ڤيتنام له‌ هويچ جووره‌ ‌ قوروانيدانێگ سڵم نه‌كردن، وه‌لی قه‌شه‌ی بووزاييه‌يليش(بوداييسم) ك پياو ئايينی بوين ئه‌را ئه‌وه‌گ سه‌رنج جه‌هان ئه‌را ئه‌ی جه‌نگ خويناويه‌و شێوازه‌يل دڕندانه‌ی ئه‌مريكا ئه‌رای بكيشن دريغ نه‌كردن. فره‌جار له‌ ناوڕاس شه‌قامه‌يل و له‌ بان ڕێه‌يل خوه‌يان ئاگر دان و بوينه‌ چزيلك، ئمجا ئاژانسه‌يل خه‌وه‌ر ئه‌و ويرسنيانه‌ له‌ گشت جه‌هان بڵاوه‌و كرد.

ئه‌را ياد نه‌ورووز جه‌ژن نه‌ته‌وه‌يی كورد(زه‌كيه‌ ئاڵكان) دويه‌ت جايڵ و نازك كورد ئاگرخوه‌ی دا و وه‌ ئه‌و گڕه‌گ له‌ جه‌سه‌ی وه‌ر بوی، ئاگر نه‌ورووز خوه‌شه‌و كرد. وه‌لی ئه‌ی جووره‌ شه‌هيد بوينێگ هه‌رچه‌ن سونزمردنێگه‌ هه‌ست و وژدان خسته‌ جووش، ئه‌گه‌ريش نه‌ويشم مردگه‌يل جه‌هانيش ته‌كان نه‌يا و ته‌نيا خوه‌مان بنيشيم و دڵ خوه‌مان به‌يمه‌و، جياوازی له‌ ناوه‌ين خوه‌ی سزانن قه‌شه‌يل بووزايی و زه‌كيه‌ ئاڵكان شه‌هيد يه‌ بوی ك ئه‌و ده‌وڵه‌ت كۆمۆنيستی ڤيتنامه‌ له‌ ده‌وره‌و ده‌سمه‌يه‌تيان دان، وه‌لی ئيمه‌ی كورد كه‌س پشت و په‌نامان نه‌وی و ئه‌را خوه‌مان گيرسيمن و هه‌ر خوه‌مانيش گووش له‌ خوه‌مان ته‌كانيمن، چوينكه‌ ئه‌وان شۆڕشگێڕ بوين و ئيمه‌يش تيرۆريست.

وه‌لی ئمڕوو جه‌هان يا راستر‌ بويشيم: راو ئه‌راچگنه‌يل جه‌هان ئاڵشت بويه‌و زوورداره‌يل هه‌رچشتێگ ئه‌رايان ئه‌و سه‌ر نيه‌چوود. ئه‌وه‌ له‌ تونس خوه‌ندكار‌ێگ ده‌رچگ‌ زانكۆ  ٢٦ ساڵان‌، له‌ شار سيدی بوزيدی ئه‌را ئه‌وه‌گ پۆليسێگ ژن زيله‌ی داسه‌ لێ له‌ سه‌ر ئه‌وه‌گ عه‌ره‌بانه‌گه‌ی لانه‌ورديه‌ و كه‌سيگيش له‌ كاروه‌ده‌سه‌يل ده‌وڵه‌ت گووش له‌لی نه‌ته‌كانن و وه‌ هانايا نه‌چين، له‌ به‌روار ١٧/١/٢٠١١ ئاگر  خوه‌ی دا. ئه‌ی خوه‌ی سزاننه‌ جوور ئاگر ناو پويش بڵاوه‌و بوی و چه‌نه‌ها ده‌وڵه‌ت عه‌ره‌بی وه‌ل خوه‌يا سزان و ئه‌وه‌سه‌ تونس، مسر، ليبيا، يه‌مه‌ن و سوريا هانه‌ وه‌رچه‌و و چشتێگ تر نه‌مه‌نيه‌ وهه‌ره‌س تيه‌رن.

توركيا ئمڕوو وه‌ ئه‌و شيوه‌گ پشتگيری له‌ شوڕش ليبيا و سوريا ئه‌كا و خوه‌ی چوی برا و باوگ ئه‌را ملله‌ته‌‌يل ئه‌و وڵاته‌يله‌ نيشان ئه‌ياد ك گوايا پشتگيری له‌ ئوميد و ئاوه‌ختيه‌يل ملله‌ته‌يل ئه‌را رزگار بوينيان له‌ چنگ ديكتاتۆره‌يل ئه‌كا، له‌ وڵاته‌گه‌ی خوه‌ی ئه‌ی جووره‌ پياچێنگ وهويرێگ په‌يڕه‌وی ناكا و ئه‌وه‌گ ئه‌را نه‌ته‌وه‌يل تر ره‌وا دوينێد ئه‌را ملله‌ت كورد ره‌وا نيه‌وينێد!.

له‌ چاره‌ك سه‌ده‌ی فێشتر گشت حكوومه‌ته‌يل يه‌ك له‌شوون يه‌ك توركيا، گشت جووره‌ شێوازێگ جه‌نگ و هه‌رجووره‌ چه‌كێگ وه‌كار هاوردن، وه‌لی وه‌ ئه‌نجام نه‌ره‌سين ك تواستن و بێجگه‌ له‌ ماڵويرانی هويچ چشتيگ تر له‌ دويای نه‌وی.

ئيسه‌ وه‌خت ئه‌وه‌ هاتيه‌، حكوومه‌ت توركيا ئه‌ی كێشه‌ وه‌ دان و سه‌نين و گفتوگوو  چاره‌سه‌ری بكا وه‌ل ئه‌و لايانه‌ ك ئه‌خوازێ وه‌ چه‌ك له‌ ناويان بواد. چوينكه‌ ده‌ركه‌فت ك چه‌ك هويچ كاريگه‌ری نه‌ێرێد و چه‌نه‌ها كێشه‌ی له‌ يه‌ قورستر وه‌ دياڵۆگ چاره‌سه‌ر بوينه‌. وه‌رچه‌وترينيان كۆريا، ڤيتنام و جه‌زائيره‌ و  دوياترينيشيان دگان ناين سودان وه‌ سه‌روه‌خوه‌يی باشوور ئه‌و وڵاته‌سه‌. وه‌لی تن و تێژی و ڕه‌ش كوژی وه‌ كار هاوردن چه‌نی زه‌ره‌ر وه‌ شۆڕشگێڕه‌يل ئه‌ڕه‌سنێ، ئه‌وقه‌ره‌يشه‌و ته‌نانه‌ت فێشتريش زه‌ره‌ر وه‌ وه‌كارها‌وردن تن و تێژی ره‌سنێد.

دويا تاوان حكوومه‌ت توركيا، شه‌هيد كردن فێشتر له‌ ٣٥ كه‌س بێ دێفاع بوی ك هويچ داوای وه‌خشين كردنێگ فايده‌ نه‌يرێد. چوينكه‌ قسيه‌يگ هه‌س ك ئويشێ: وڵ كردن سه‌د تاوانبار نه‌گ كوشتن بێ تاوانێگ. من دڵنيام ئه‌گه‌ر حكوومه‌ت توركيا له‌ سه‌ر خه‌ت حكوومه‌ته‌يل تر وه‌رجله خوه‌ی بچوود، ئه‌وه‌گ له‌ شرناخ رويدا دويا تاوان نيه‌و ئيسه‌يش ك ئه‌ی تاوانه‌ گشت نه‌ته‌وه‌ی كورد ته‌كان دا،  خاسترين ڕێ ئه‌وه‌سه‌ ك توركيا وه‌ل لايه‌نه‌يل په‌يوه‌نديدار‌ دياڵوگ بكا و ئه‌ی كاريشه‌ سه‌ربه‌رزييگ ئه‌را حكوومه‌ت ئه‌ردۆغانه‌ نه‌گ سوو‌كه‌و بوينێ!.

هه‌ر له‌ی باره‌يشه‌و چێشتێگ له‌ ناو كورده‌واری ئويشن: جارێگ ژن و پياوێگ نگرانی كه‌فته‌ ناوه‌ينيان و وه‌ل يه‌كا قسيه‌ نه‌كردن وهه‌ردوگيانيش دووس داشتن وه‌ل يه‌كا ئاشته‌و بوون!. وه‌لی هه‌ركاميان چه‌وڕێ ئه‌وه‌كه‌ بوی تا ده‌س بخه‌ێده‌و نوا و ده‌سپێشخه‌ر بوود. رووژێگ پياگه‌ چنجگ سه‌نوی و ناوك چنجگ دا‌ كوڕه‌ی، وه‌لی كوڕه‌ی ناوك چنجگه‌گه‌ نه‌خوارد، باوگه وه‌ كوڕه‌ی و‌ت: ڕووڵه‌ بخوه‌ ئه‌را پياوه‌تيد خاسه‌!.

ژنه‌ دی نه‌تويه‌نست خوه‌ی بگرێد و وت: دوژمن گيان خوه‌د، ئه‌گر ئه‌وه‌ خاسه‌، خوو ئه‌را خوه‌د دو سێ ده‌نگی نيه‌خوه‌ێد!؟.

 

عه‌بدولكه‌ریم شێخانی‌