كورد فه‌يلی وه‌رگری له‌ نيشتمانيگ ئه‌كا دگان وه‌پيا نانه‌ێد!!

شفق نيوز

هاووڵاتی فه‌قير وه‌رگری له‌ نيشتمانه‌گه‌ی ئه‌كاو گيان خوه‌ی وه‌خاتری ئه‌كاده‌ قوربانی، وه‌لی چه‌؟ ئايا ئی هاووڵاتيه‌ نه‌خش راسكانی خوه‌ی له‌وه‌ر خاتر نيشتمانيگ ك له‌تی گه‌ورا بويه‌و له‌ئاوه‌گه‌ی خواردگه‌ ديه‌، يا بويه‌سه‌ قوربانی فه‌رمانڕه‌وايه‌يل گيل ونه‌فام؟؟

فه‌رمانڕه‌وايگ ك له‌ مانای ئه‌وه‌ نه‌ڕه‌سيه‌و دايگ رووڵه‌گه‌ی له‌ده‌سداگه‌و باوه‌ڕی ئه‌وه‌ بدێ ك ئی دايگه‌ بايه‌سه‌ له‌بانی گشت رووڵه‌يلی بكاده‌ قوربانی وه‌خاتر رازيكردن ئاره‌زووه‌يلی، ئه‌ويش وه‌ زاڵبوين و هيز و نيشانداين بازوو له‌وه‌رده‌م كه‌سه‌يل تر له‌وه‌ختيگ ك ئی فه‌رمانڕه‌وا ناخوازێد كوڕه‌گه‌ی خوه‌ی ره‌وانه‌ی به‌ره‌يل جه‌نگ بكا جوور ئه‌وه‌گ سه‌دام تاوانبار رووڵه‌يل ئی وڵات زه‌خمداره‌ خسته‌ ناو به‌ره‌يل جه‌نگ له‌وه‌ر جيوه‌جيكردن ئاره‌زووه‌يل گيلانه‌ی وه‌رده‌وامی له‌ جه‌نگ ناونی عراق و ئيران و دويای ئه‌وه‌يش داگيركردن كوه‌يشت و ده‌رچگنی له‌لی و كه‌فتنه‌وه‌ی جه‌نگه‌يل تر و ئابڵوقه‌و زوڵم و بيبه‌شی و مه‌ينه‌تی ملله‌ت عراقی، گشت ئه‌يانه‌ له‌يوا كرد هاووڵاتی عراقی بكه‌فێده‌ حاڵه‌ت له‌ده‌سچگن و غوربه‌ت له‌ نيشتمان.

له‌وانه‌يش كورد فه‌يلی ك خزمه‌ت وه‌ی نيشتمانه‌ كرد و وه‌رگری له‌لی كرد و شه‌هيد ئه‌ڕای داو ئه‌وه‌ بوی رژيم عه‌فله‌قی فاشيست و خه‌تاكار ده‌سكرده‌ كووچ وه‌پيكردن كورده‌يل فه‌يلی ئه‌را ئيران ئسلامی وه‌ مه‌هانه‌ی ته‌به‌عيه‌ی ئيرانی له‌وه‌ختيگ ك هه‌مان ئی هاووڵاتی عراقی ئه‌ركه‌يل خوه‌ی جيوه‌جی كردياد و خزمه‌ت وه‌ عراق كرد جوور سه‌رباز وه‌رگريكه‌ر له‌لی، ك فريه‌يگ له‌ليان وه‌ی جووره‌ ئه‌را ماوه‌ی ساڵه‌يل فريه‌يگ له‌ سوپا خزمه‌ت كرد وه‌رجه‌ كووچ وه‌پيكردنيان، وه‌لی ئايا ئاكامه‌گه‌ی چه‌ بوی؟؟؟

رژيم سه‌دام رووڵه‌يل كورد فه‌يلی خسته‌ گووشه‌يل زيندان ك خه‌يرومه‌نترين جايه‌ڵه‌يل عراق بوين و باوگ و داڵگ و خوه‌يشك وبرايه‌يل بويچگيان ده‌ركرد وه‌ره‌و ئيران و تائيسه‌يش كه‌س نازانێد چاره‌نويس ئه‌و جايه‌ڵه‌يله‌ چه‌سه‌و ته‌رمه‌يليان ها كوورا، ك ئايا پاداشيان مه‌رگ بوی؟؟

دويای رميان رژيم سه‌دام تاوانباريش چه‌و داڵگه‌يل هه‌ر چه‌وه‌ڕی ره‌سين رووڵه‌يل جايه‌ڵ جوانيان كردياد و بگرنه‌يانه‌ باوه‌ش، وه‌لی جی داخه‌ هويچ كه‌سيگ تائيسه‌يش نازانێد چاره‌نويسيان چه‌ بوی و حكومه‌ته‌يل يه‌ك له‌شوون يه‌كيش بايه‌خ نه‌يانه‌ كيشه‌گه‌يان، به‌ڵكوو جوور بيگانه‌ ره‌فتاريش وه‌ل باقييان كردنه‌.

ئيسه‌يش دويای ئه‌و هه‌مگه‌ زوڵمه‌ ك هاته‌ تويش كورده‌يل فه‌يلی چينه‌ پيری بانگه‌واز وژادانی و نيشتمانی و په‌يوه‌ندی كردنه‌ حه‌شد شه‌عبی وه‌خاتر وه‌رگری له‌ی نيشتمانه‌ ك جوور بيگانه‌ ته‌ماشايان ئه‌كاو شه‌هيده‌يل وه‌ كاروان ئه‌رای پيشكه‌ش كردن و وه‌ل ئه‌وه‌يشا ئاماده‌ن تا دويا كه‌سيگيان ك توانای چه‌كهه‌ڵگردن داشتوود له‌ڕوی تاوانبار و بكوشه‌يل وه‌رگری بكه‌ن، چوينكه‌ كورده‌يل فه‌يلی عراقی ره‌سه‌نن.

كورده‌يل فه‌يلی وه‌رگری له‌ خاك و كه‌رامه‌ت ئه‌كه‌ن نه‌ك له‌ی سياسی و ئه‌و سياسی، وه‌لی ئايا ئه‌و سياسيه‌يله‌ له‌ی هاوكيشه‌ی شه‌ريفانه‌ فامن؟ ئايا ئه‌وانه‌ له‌ مانای نيشتمان و وه‌رگری له‌ نيشتمان ره‌سنه‌و؟ ئه‌وانه‌ باوه‌ڕيان ئه‌وه‌سه‌ ك خوه‌يان خاوه‌ن خاك و ملله‌ت و نيشتمانن و له‌يوا زانن هاووڵاتی به‌نه‌ی ئه‌وانه‌.

مێژوو گشت ئه‌و كرده‌وه‌يله‌ تۆمار ئه‌كاو نه‌وه‌يل ئاينده‌يش نه‌فره‌ت له‌ليدان ئه‌كاو نه‌يلن رووڵه‌يل ئی نيشتمان زه‌خمداره‌ ئحساس وه‌ غوربه‌ت بكه‌ن و كاريگ بكه‌ن ئه‌و مه‌ينه‌تيه‌ له‌ هويريانه‌و بووه‌ن، يا وه‌لای كه‌مه‌و كه‌ميگ له‌و مه‌ويسيه‌ ك هاته‌ تويش ئی ملله‌ته‌و له‌وانه‌يش كورده‌يل فه‌يلی.

جه‌لال باقر

ج . أ