حوسنى زه‌عیم كورد و(71)ڕووژ سه‌رۆكایه‌تى سوریا

شفق نيوز

و ئه‌رك سه‌ركردایه‌تى وڵاتیگ گرته‌ده‌س، وه‌لى كه‌متر سێ مانگ  له‌بان ته‌خت ده‌سڵات له‌ئه‌نجام كوده‌تا یا ئنقلابیگ سه‌ربازى كووتایى وه‌ده‌سڵاتداریه‌تى و سه‌رۆكایه‌تیه‌گه‌ى هاوریا، ك ئه‌ویش(حوسنى كوڕ شێخ ره‌زا كوڕ محه‌مه‌د كوڕ یوسف زعیم)بوى، ك له‌شار حه‌له‌ب له‌ساڵ 1889 هاته‌سه‌ دونیا له‌باوگ دایگیگ كورد. باوگ حوسنى زه‌عیم ك موفتى بویه‌ له‌سوپاى عوسمانى، له‌وه‌خت جه‌نگ جه‌هانى یه‌كه‌م له‌ساڵ 1915 له‌ئه‌نجام په‌لامارداین كه‌ناڵ سویس شه‌هید كریاگه‌.

حوسنى زه‌عیم خوندن زانسته‌یل سه‌ربازى له‌حه‌له‌ب و ئه‌سته‌مبوڵ ته‌واو كردگه‌و دویاخر په‌یوه‌ندى كرده‌سه‌ سوپاى عوسمانى و له‌شوون ئه‌وه‌یش په‌یوه‌ندى كرده‌سه‌ سوپاى عه‌ره‌بى فه‌یسه‌ڵیه‌وه‌، ئنجا له‌شوون داگیركارى فره‌نسى له‌بان خاك سوریا، حوسنى یه‌كسه‌ر په‌یوه‌ندى كرده‌سه‌ سوپاى فره‌نسى و پله‌ى كۆلۆنیل له‌ساڵ 1941 وه‌رگرتگه‌. دویاى سه‌قامگیرى سوریا، حوسنى زه‌عیم چیه‌ ڕز سوپاى سورى و جویر وه‌ڕیه‌وبه‌ر گشتى پۆلیس دامه‌زریاو دویاخریش ئه‌رك سه‌ركردایه‌تى سوپاى سورى له‌ساڵ 1948 وه‌رگرت له‌وه‌ختیگ عه‌ره‌ب بڕیار جه‌نگ دان له‌بان ئسرائیل.

له‌شوون جه‌نگ جه‌هانى دویه‌م وه‌ چه‌ن ساڵیگ ، یه‌كه‌مین كوده‌تاى سه‌ربازى له‌سوریاو خوه‌رهه‌ڵات ناوڕاس له‌ڕووژ 29 مانگ ئادار ساڵ 1949 وه‌ سه‌ركردایه‌تى حوسنى زه‌عیم كورد بوى، ك له‌ 5/ حوزه‌یران/ 1949 هه‌ڵوژریا ئه‌را سه‌رۆك كوومار سوریا وه‌پله‌ى موشیر، وه‌لى وه‌داخه‌وه‌، حوكمه‌گه‌ى فره‌ دریژه‌ نه‌كیشاو ته‌نیا(71)رووژ وه‌رده‌وام بوى، چوینكه‌ له‌14ى مانگ ئاب ساڵ 1949 كوده‌تایگ سه‌ربازى ئه‌را دویه‌مجار وه‌ سه‌ركردایه‌تى سامى حه‌ناوى رویداو حوسنى زه‌عیم كورد و سه‌رۆك وه‌زیره‌یلى(محسن به‌رازى)له‌تى بوینه‌ قوربانى گولله‌ى له‌سێداره‌داین رژیمه‌ كوده‌تاكه‌ره‌گه‌. ئمجا هه‌رچه‌نى حوسنى زه‌عیم وه‌ ته‌واوى ته‌ز شه‌كه‌تى ده‌رنه‌كرد، وه‌لى وه‌ل ئه‌وه‌یشا له‌ماوه‌ى حوكمه‌ كه‌مه‌گه‌ى چشته‌یلیگ ئه‌نجامداو له‌وانه‌یش:

*داناین ده‌ستوور تازه‌ ئه‌را وڵات.

* چه‌سپانن قانوون مه‌ده‌نى ك تائیسه‌یش له‌سوریا په‌یڕه‌و كریه‌ێد.

* داناین پرووسه‌ى یه‌كسانى ژن وپیاو، وه‌ل وه‌پیداین گشت هه‌قه‌یل ئنسانى و سیاسى.

* دامه‌زرانن ده‌زگاى شكایه‌ت له‌ زوڵمكارى.

ك گشت ئه‌یانه‌یش جى ده‌سخوه‌شى و ستایشه‌ ك له‌و سه‌رده‌مه‌ كوردیگ وه‌و هویر و باوه‌ڕه‌ وازه‌وه‌ پرووسه‌یلیگ تازه‌گه‌رى و بنیاتگه‌رى دامه‌زرنیگ  و خزمه‌ت جوانیگ وه‌ئنسانیه‌ت بڕه‌سنێد. وه‌لى قه‌ده‌ر له‌یوا كرد له‌عومر 52 ساڵى دویاى ئه‌و هه‌مگه‌ هه‌وڵ و شه‌كه‌تیه‌ نه‌مرى ئه‌را خوه‌ى و ملله‌ته‌گه‌ى توومار بكا.