عراق دويای موسڵ

شفق نيوز

لق ١٤ی پارتی و مه‌ڵبه‌ند يه‌كێتی خوه‌يان كيشانه‌و ئه‌را ئه‌وه‌ك جه‌نگ مه‌ردمان تر نه‌كه‌نه‌ جه‌نگ خوه‌يان. ئمجا له‌شوون ته‌قاننه‌وه‌ی ميوانخانه‌ی موسڵ سه‌ربازه‌يل عراقی گوڕ وتينيان نه‌مه‌ند و توانای وه‌رگريكردنيان نه‌مه‌ند، وه‌لی هيز پێشمه‌رگه‌ی كوردستان فريه‌ هاوكاری سه‌ربازه‌يل به‌زگ مالكی كردن.       

ئه‌وه‌ بوی جنگ و چه‌كه‌يليان خوه‌يان فڕه‌ ديان و هه‌يواين وه‌ره‌و ناوچه‌يل كوردستانی ده‌يشت ئداره‌ی هه‌رێم كوردستان، دی وه‌و جووره‌ كورد كه‌فته‌ قوناغيگ تازه‌ ك گشت ناوچه‌يل كوردستانی ده‌يشت كوردستان كه‌فته‌ ژيرده‌س هيز پێشمه‌رگه‌ی كوردستان و پێشمه‌رگه‌يش مقه‌يه‌تی ئه‌و ناوچه‌يله‌ كرد له‌وه‌ر خاتر گيان مه‌ردمه‌گه‌ی ك زوورميان كوردن و تائيسه‌يش هيز پێشمه‌رگه‌ له‌و ناوچه‌يله‌ وه‌رگری ئه‌كاو قوربانييش ئه‌ياد.

له‌شوون گرتن موسڵێش له‌لايه‌ن داعشه‌و، گشت سێگووشه‌ی سنی كه‌فته‌ ده‌س ترۆريسته‌يل داعش، ئيسه‌يش له‌شوون گرتن موسڵ كورد هاته‌ ناو قوناغ تازه‌يگ، ئمجا جوور ئه‌وه‌ك سه‌رۆك بارزانی وت: مادده‌ی ١٤ جيوه‌جی كرياو هويچ تاوتوييگ له‌بانی ناكريه‌يد.

دی وه‌خت ئه‌وه‌ هاتگه‌ كورد پشتگير ئه‌را سه‌روه‌خوه‌يی هه‌رێم كوردستان په‌يا بكاو وه‌ل حكوومه‌ت عراق وه‌ مه‌رج گفتگوو بكا، چوينكه‌ كورد كه‌فته‌سه‌ پايه‌ی بته‌ويگ و نادێ گله‌و بخوا وه‌ره‌و دويا، ئه‌ويش بايه‌سه‌ جه‌مده‌نگی نه‌ته‌وه‌يی هيزه‌يل كوردستانی وجوود داشتوود و دويای ئه‌وه‌يش هاوساو وڵاته‌يل گه‌وراهيز و دووس رازی بكريه‌ن ك كورد و ده‌وڵه‌ت كوردی خزمه‌ت سه‌قامگيری ناوچه‌گه‌ ئه‌كا، چوينكه‌ حكوومه‌ت سه‌روه‌خوه‌يی كوردی ئه‌دێده‌ حكوومه‌تيگ ديموكراسی و ئی حكوومه‌تيشه‌ له‌ به‌رژه‌وه‌ندی نه‌ته‌وه‌ی كورد و گشت پيكهاته‌يل كوردستان و ده‌وڵه‌ته‌يل ناوچه‌گه‌س.

هاتن وه‌زيره‌يل خارجيه‌ی ئه‌مريكاو بريتانيا ئه‌را به‌غدا و دويای ئه‌وه‌يش ئه‌را هه‌ولێر نيشانه‌ی گرينگی هه‌رێم كوردستانه‌ له‌لای ئه‌و وڵاته‌يله‌، ئيمه‌ی كورديش وه‌ سه‌رۆكايه‌تی سه‌رۆك مه‌سعود بارزانی ك فريه‌ وه‌ دانايانه‌ كار ئه‌را سه‌روه‌خوه‌يی كوردستان ئه‌كا، وه‌ دڵنياييه‌و دوير يا نزيك ره‌سيمنه‌ سه‌روه‌خوه‌يی كوردستان.

سه‌عيد مه‌موزينی

ج . أ