زه‌ره‌ده‌یل غاز كبریت هایدرۆجین له‌ پیشه‌سازى نه‌فت

شفق نيوز

* غازیگ ژه‌هراویه‌و هه‌مان پله‌ى ژه‌هر غاز سیانید هایدرۆجین دیرید.

* بى ره‌نگه‌.

* وه‌ گڕ كه‌ویگه‌و سزیه‌ید.

* چڕى ئى غازه‌(1،89غم/س3)له‌ هه‌وا قورستره‌، هه‌ر له‌وه‌ر ئه‌وه‌یش هه‌میشه‌ له‌ شوونه‌یل نزم گرده‌و بوود.

* له‌ئاو تاویه‌یده‌و.

* بووده‌ هووكار خوریان كانزایه‌یل، هه‌ر  وه‌و خاتریشه‌ وه‌رجه‌ كلكردن نه‌فت له‌ى غازه‌ پاكه‌و كریه‌ید، چوینكه‌ وجوودى بووده‌ مایه‌ى خوریان و كوناكردن لویله‌یل نه‌فتى.

 

گه‌وراترین مه‌ترسى ئى غازه‌ دوچاربوینه‌ وه‌ مردن ئه‌گه‌ر بڕ فره‌یگ له‌لى هه‌ڵمژیه‌ید، چوینكه‌ وه‌ تیكه‌ڵبوینى وه‌ل خوینه‌و كاریگه‌رى له‌بان ئه‌نامه‌یل مه‌ژگ دیرید و هه‌ناسه‌ قت ئه‌كا.

 

نیشانه‌یل هه‌ڵمژین غاز كبریتید هایدرۆجین پیكهاتنه‌ له‌" سه‌رژان، گیژبوین، پژمه‌، خاوبوینه‌وه‌، هسكردن وه‌ ناڕه‌حه‌تى لویت و قوڕگ و گووش".

 

بیگومان رووژانه‌یش كارگه‌ره‌یل كومپانیاى نه‌فت له‌ شوونه‌یلیگ جوور كه‌ركووك مامڵه‌ وه‌ل ئى غازه‌ كه‌ن و گشت رووژیگ په‌یمانه‌ى ریژه‌گه‌ى كه‌ن، ئنجا له‌ سه‌رده‌م بریتانیه‌یل ئه‌را كه‌مه‌وكردن كاریگه‌رى ئى غازه‌ له‌بان كارگه‌ره‌یل و ئه‌ندازیاره‌یل وه‌تایبه‌ت ئه‌وانه‌ك له‌به‌ش دقه‌تكردن یا ته‌ركیز كار كردیان رووژانه‌ یه‌ك له‌تر شیر وه‌پیان دریا ئه‌را نه‌هیشتن كاریگه‌رى غاز كبریتید هایدرۆجین.

 

پیشه‌سازى نه‌فت له‌وه‌ر خاتر كه‌مه‌وكردن كاریگه‌رى غاز كبریتید هایدرۆجین به‌ش دقه‌تداین دامه‌زراننه‌ ك غازه‌گه‌ سزنن و دویاخریش كلكریه‌ید ئه‌را كومپانیاى غاز باكوور و له‌ورایشه‌و ئه‌و بڕه‌ كبریتید هایدرۆجینه‌ ك له‌تى مه‌ندگه‌ وه‌شیوه‌ى كبریت زه‌رد جیاى كه‌نه‌وه‌و ئه‌را مه‌رام بازرگانى فرووشنه‌ى.

 

وه‌لى له‌یره‌ ئه‌وه‌ك مه‌ندگه‌ ئاشكراى بكه‌یم و بویشیمنه‌ى، ئه‌وه‌سه‌ ك ئى غاز مه‌ترسیداره‌ ته‌نیا له‌ نه‌فت چاڵه‌ نه‌فتیه‌یل مه‌رز شار كه‌ركووك وجوود دیرید و له‌ چاڵه‌ نه‌فتیه‌یل به‌سره‌ نییه‌.

 

فه‌رهاد هه‌مزه‌ محه‌مه‌د

ج . أ