روێى تر ريزدار عبادى

عه‌لى  حسێن فه‌يلى

شه‌فه‌ق نيوز/ ريزدار عبادى له‌ دويا لێدوانه‌يلێ له‌ باره‌ێ راپرسێ و سه‌روه‌خوه‌يى هه‌رێم كوردستان، وه‌گشت ئاشكرايگ و هه‌مان هه‌ڵوژاردن جوور ئه‌وه‌گ نه‌ياره‌يل ئى پرووسه‌ ئه‌خوازن وت: ئه‌يه‌ ناڕه‌واسه‌ و فه‌رمى نيه‌، وه‌لێ مه‌سه‌له‌گه‌ ئه‌وه‌سه‌ تێبينى له‌و قسه‌يه‌ ئه‌كريه‌ێد ك گوايا ها وه‌ل خواست ملله‌ت كورد!!

 

خاس، ئه‌ێ كێ به‌شدارێ له‌ راپرسێ بكا؟ و كێ بڕيار چاره‌نويسێ بيه‌ێد؟ و ئه‌ه‌و مافه‌يله‌ چه‌ن ك ره‌واس وه‌لاێ ريزاريانه‌و؟

 

ئه‌و باس له‌ وجوود كيشه‌يل كرد له‌ كورستان، وه‌لێ ئه‌وه‌ له‌ هويرێ چى ك سه‌به‌بكاره‌ له‌ به‌ش گه‌وراێ ئه‌و كيشه‌يله‌، له‌ ئاكام چه‌ و كێ له‌تى به‌شدارێ كرد و په‌نجه‌ێ تومه‌ت له‌ كه‌فتنه‌وه‌ێ ئه‌راێ دريژ كرد؟!!

 

ئه‌گه‌ر مه‌سه‌له‌يل يودجه‌و قووت هاووڵاتيه‌يل و پڕچه‌ككردن پێشمه‌رگه‌ ئه‌را روێ وه‌ڕوێ بوينه‌وه‌ى داعش و ترۆريسته‌يله‌ و جيوه‌جيكردن مادده‌ێ 140 له‌ ده‌ستوور و قه‌ره‌بووكردن ملله‌ت ك چه‌نه‌ها جار وه‌جه‌م له‌ناو بريا گشت ئه‌يانه‌ مه‌سه‌له‌يليگ ناشه‌رعيين، ئه‌ێ مه‌سه‌له‌يل شه‌رعى چه‌ن؟ ئه‌ێ خاوه‌نه‌يل كويه‌ن ئى خاكه‌ چه‌، ئايا ماف موڵكيه‌ت نه‌يرن له‌ وه‌رانوه‌ر گشت ئه‌و هه‌مگه‌ مه‌ردم هاورياگه‌ ك سته‌مكار هاورده‌يان و ئى مافه‌ وه‌ زوڵم و زوور دا پيان؟! 

 

كورد له‌بڕيار ناچنه‌ ده‌يشت مافه‌يل خوه‌يان و هويچ مه‌رزيگ ئنسانى و ئه‌خلاقى و ته‌نانه‌ت له‌ مه‌رز سياسى و جوگرافييش و نه‌بايه‌د زويتر سزا بدريه‌ن و جورم بكريه‌ن! ئه‌گه‌ريش قسه‌ له‌بان جيايى و چويچيان له‌ناو ماڵه‌گه‌ێ كرياگه‌، ئه‌وه‌ ئيمه‌ جوور كور هيمان وه‌ قياس وه‌ جه‌هان عه‌ره‌بى ك خاوه‌ن دو ده‌رزه‌ن له‌ ده‌وڵه‌ته‌يل دگان وه‌پيا نرياێ، جيا نه‌ويمنه‌سه‌وه‌و دژ يه‌كترييش نييم!!

 

ئمجا ريزداريان- عبادى - باس له‌ گيشه‌يل و ناڵه‌يل ئه‌و ناوچه‌يله‌ ناكا ك هانه‌ ژير ده‌سڵات حكومه‌ت ناوه‌ندێ و هه‌ر حاڵه‌تيگ له‌ گوزران! له‌يرا كورد ناتوانن ئه‌و ئه‌قڵيه‌ته‌ ئالشت بكه‌ن ك ئى وڵاته‌ ره‌سانه‌ ئى باوردوخه‌، وه‌لێ هه‌وڵ ئه‌يه‌ن خوه‌يان له‌ێ چاڵه‌.

 

ريزداريان باس له‌ چويچيان و كيشه‌يل سياسى كوردستانى ئه‌كا له‌ وه‌ختيگ ك له‌ هويرێ چيه‌ ك هه‌ناێ قسه‌ له‌بان يه‌كێتێ و يه‌كگرتن بكريه‌ێد ئه‌وه‌ لايه‌نه‌يل سياسى كورد دژايه‌تيێ ئه‌وه‌نه‌ێ لايه‌نه‌يل عه‌ره‌بى ناكه‌ن و يه‌يش له‌يوا وه‌پيمان ئه‌كا له‌ مێژوو حزب ده‌عوه‌ ده‌س وه‌پى بكه‌يم تا بزانيم چه‌ن جار جيايى له‌تى روێدا و له‌بان چ ئاست و ره‌سيه‌ چ راده‌يگ، ك ته‌نانه‌ت خود حزب ده‌عوه‌يش جورئه‌ت سازكردن كۆنگره‌يگ گشتى خوه‌ێ نه‌يرێد، ئاشكرايشه‌ ك به‌ش گه‌وراێ كيشه‌گه‌ ئه‌چێده‌و ئه‌را جياوازێ هوير و ڕا و وجوود كيشه‌يليگ سياسى نه‌ك كيشه‌يل مه‌زه‌وێ، ئمجا ئايا جياوازێ له‌ هورير وڕا و وجوود كيشه‌و گرفته‌يل ته‌بريه‌ن ئه‌را بيبه‌شكردن ملله‌تيگ وه‌ ته‌مامى له‌ مافه‌يلێ؟

 

گشتمان زانيم ك له‌وه‌ر خراوبوين په‌يوه‌نديه‌يل سياسى له‌ناونى لايه‌نه‌يل سياسى عراقى و ته‌نانه‌ت دوياێ زاڵبوينيش له‌بان داعش، گشت ئه‌و هه‌ڕه‌شه‌و چه‌كه‌يله‌ نه‌بايه‌د وه‌ ئاسانى بيده‌نگ بكريه‌ن، له‌ڕاسى سه‌خته‌ له‌ شوونيگ بويشيم حكومه‌ت ريزداريان وه‌ره‌و كاملا گام نه‌ێد و كێ خاوه‌ن ده‌سڵات راسكانيه‌ له‌ به‌غدا؟

 

جى داخه‌ ريزدار عبادى، چ وه‌ خواست يا وه‌بى خواست ئه‌را ئه‌وه‌، ئه‌و قسه‌يله‌ دوباره‌وه‌ ئه‌كا ك نه‌ياره‌يلێ وتيانه‌ێ و كورديش شه‌كه‌ت بوين له‌گشت ئه‌و دانيشتنه‌يل شكه‌ست نائاشكرا و ئاشكرا ك زويتر له‌ پشت قاپيه‌يل ژه‌نگاويه‌و ئه‌نجام دريان ك شايه‌ت رژيمه‌يل له‌ به‌غدا له‌ وه‌رانوه‌ريان ئحساس ره‌حمه‌ت له‌ دڵه‌يليان جموجويل بكا.

 

ئمڕوويش كورد جوور ملله‌تيگ نه‌ك حزب و لايه‌نيگ وه‌ ته‌نيا روێ له‌ كۆمه‌ڵگاێ ناوده‌وڵه‌تێ و حكومه‌ت عراقى كردگه‌ ئه‌را تاوتوێكردن له‌بان مافه‌يلى و ماڵه‌ ئاينده‌گه‌ێ.

 

وه‌ل ئه‌وه‌يشا ئامانج لێدوانه‌يل ريزداريان هه‌رچه‌نى بوود، ئيمه‌ هه‌ر دڵنياييم وه‌ ئه‌وه‌گ ناتويه‌نێد شوعله‌ێ چراخيگ ده‌م بيه‌ێد له‌ناو ماڵه‌يل تيه‌ريك عراقيه‌يل و ناتويه‌نێد وه‌ جورعه‌ێ ئاويگ په‌نگه‌وخواردگ له‌ وه‌ربه‌سه‌يل له‌بان ديم تر له‌ مه‌رزه‌يل توشنه‌گێ فه‌قيره‌يل له‌ وڵاته‌گه‌ێ بكوشنێده‌و.

 

بايه‌سه‌ له‌بان ريزدار عبادى ئه‌وه‌ بزانێد ك كه‌سايه‌تييگ سياسيه‌و وه‌رپرسه‌ له‌بان حوكم له‌ى قوناغ نازگه‌و ئيمه‌ێ كورديش پرسيار ناكه‌يم چوين ره‌سيه‌ حوكم، وه‌لێ دڵنيايم له‌وه‌گ هه‌ر وه‌ختيگ ولايه‌ته‌گه‌ێ ته‌مام بدێ، ئه‌وه‌ شوونێ ته‌نانه‌ت له‌ناو حزبه‌گه‌يشى وه‌و بته‌ويه‌ نيه‌ ك بتويه‌نێد جاريگ تر وه‌پى هه‌ڵسێده‌و له‌ ناونى برايه‌يل دوشمنێ.

 

ئمجا بايه‌سه‌ له‌بان ريزداريان دووسێ له‌ناونى ملله‌ت عراق وه‌ شيوه‌يگ گشتى و نه‌ته‌وه‌ێ كورد وه‌ تايبه‌ت و ناونى رازێكردن لايه‌نه‌يل ناوخوه‌يى و خارجێ هه‌ڵوژنێد ك هويچ وه‌ختيگ ره‌زا نيه‌ون له‌ناونى يه‌كترێ.

 

له‌ وڵاتيگيش ك كه‌رامه‌ت وه‌ كه‌مترين نرخه‌يليگ له‌تى فرووشيه‌ێد، ريزداريان ئه‌تويه‌نێد شانازى وه‌ده‌س بارێد ك ئه‌ڕاێ بنويسيه‌ێد له‌ سه‌رده‌مێ وه‌بى هويچ كيشه‌و جه‌نگيگ خويناوێ و له‌تى عراقيه‌يل بڕه‌سنێده‌ كنار ئارامى و ملله‌ته‌يليش بوينه‌سه‌ هاوسايه‌يليگ ئاشتيخواز ئه‌را يه‌كترێ.

عه‌لى حسێن فه‌يلى