دووسداشتن شاریاى

شفق نيوز

خه‌راوبوین ژینگه‌گه‌ى و به‌رزه‌وبوین ڕێژه‌یل گه‌ناته‌كارى، ئه‌وه‌ بیجگه‌ بیكارى و ته‌عداكردن له‌هه‌قه‌یل ئاده‌میزاد و ده‌مكپ كردن ئازادیه‌یل، و ئیمڕوو تویه‌نیمن ئه‌وه‌یشه‌ بكه‌یمنه‌ سه‌ربارى ك عیراق یه‌كمه‌ له‌ ڕێژه‌یل كوشتن مه‌ده‌نیه‌یل، وه‌گووره‌ى ئه‌وه‌گ له‌ ڕاپۆرتیگ به‌ریتانى هاتیه‌؛ ئاماژه‌ وه‌وه‌ده‌ید ك له‌ ناونى گشت وڵاته‌یل جه‌هان، عیراق له‌ ساڵ گوزه‌یشته‌، له‌ ڕز یه‌كم كوشتن مه‌ده‌نیه‌یل بوى.. بیگومان بارووه‌زع و كه‌شوهه‌واى ئمساڵیش جیاوازى وه‌ل پار و پیرار نه‌یرى، ترس ئه‌وه‌یشه‌ هه‌س ك شایه‌ت بڕه‌سیده‌ ئاست ئه‌وپه‌ڕ تون و تیژیه‌گه‌ى چه‌ن ساڵیگ پیش.

له‌ ساڵه‌یل حوكمڕانى ڕژیم وه‌رین و له‌ شوون ئه‌وه‌یش له‌ ساڵه‌یل گۆڕانكارى ئه‌وه‌ سابت بوى ك هاوڵاتى عیراقى چرچ ئه‌وه‌ ها دڵى ك ده‌رددڵ خوه‌ى باس بكه‌ید؛ و له‌وانه‌یش دووسداشتن نیشتمان و نیشانداین وه‌فادارى ئه‌را كار خوه‌ى و ده‌سپیشخه‌رى وه‌ره‌و هێور كردن بارووه‌زع، چوینكه‌ بارووه‌زع و ڕویدایه‌یل دژ وه‌ هاوڵاتى ڕى چن، به‌ڵكوو بوونه‌ ڕیگر و هه‌ڕه‌شه‌ى ڕاسكانییگ دژ وه‌ ئه‌و تیكه‌ نانه‌ ك ژیان خوه‌ى وه‌پى به‌یده‌ سه‌ر، هه‌ر له‌وه‌ر ئه‌وه‌یشه‌سه‌ ك ده‌نگوباس تیرۆریسته‌یل و تاوانباره‌یل وه‌ ئاست ئه‌و مه‌ترسیه‌یله‌ نیه‌ ك وجوود دیرن و جه‌نگ دژ وه‌ گه‌ناته‌كارى ك په‌رش وبڵاوه‌و بویه‌سه‌ ناو فه‌رمانگه‌یل ده‌وڵه‌ت نیه‌چووده‌ چوارچیوه‌ى ڕووشنهویرى كار ده‌سه‌جه‌مى، و ئى ڕاسییشه‌ دیارده‌ید ك ڕه‌ته‌وكردن تون و تیژى ئیراده‌ت و خواستیگ گشتى نیه‌.

ئه‌وه‌گ مایه‌ى خه‌م و ژانه‌ له‌ى ڕاسیه‌یله‌ ئه‌وه‌سه‌ ك دووسداشتن و لایه‌نگرى نیشتمان بویه‌سه‌ كاریگ سه‌خت و زه‌حمه‌ته‌ ئاشكه‌را ناوى بارید، و ته‌نانه‌ت له‌ مه‌یدانه‌یل تره‌ك ژیان ئنسان؛ دووسداشتن دیرى وه‌ره‌و دویا چوود، و له‌یرا پرسیاریگ سه‌رهه‌ڵده‌ید ك ئه‌گه‌ر دووسداشتن له‌ده‌سدایمن وه‌ چه‌ ئه‌و بۆشاییه‌ پڕه‌و بوود ك له‌ شوون خوه‌ى هیلیده‌ى وه‌جى؟ چوینكه‌ به‌دیله‌یل گه‌ن هه‌میشه‌ هانه‌ وه‌ر ده‌س.

دووسداشتن نیشتمان له‌ لاى گشت ملله‌تیگ ئاساییه‌، وه‌لى جیاوازى هاله‌ چوینیه‌تى وه‌ده‌رخستنى و گوزارش كردن له‌لى، و ملله‌ته‌یل وه‌ختى تویش جه‌نگ و كاره‌ساته‌یل سروشتى تیه‌ن، یه‌كه‌وگرن و ناكووكیه‌یل ناوخوه‌ییان له‌هویره‌و به‌ن، وه‌لى له‌ لاى ئیمه‌ وه‌ ئه‌وه‌زیه‌.

ده‌سه‌واژه‌ى دووسداشتن شاریاى نیشتمان په‌رش وبڵاوه‌و بوى و ئه‌را ده‌یان ساڵ گشتلایگ نیشتمان گرده‌وه‌، و له‌یرا ئه‌وه‌ پرسیمن ك: كى دووس نیشتمان دیرى؟ و پێوه‌ر و معیارى چه‌س؟

ئى قسه‌مانه‌ ئه‌و لایه‌نه‌یل كوومه‌ڵگا نیه‌گریده‌و ك وه‌پیان ئویشن(مه‌دنیه‌یل بیگوناه‌) چوینكه‌ یانه‌ وه‌شیوه‌یگ بى مه‌مه‌ر گوزارش له‌ى دووسیه‌ كه‌ن و تابلۆه‌یل ئه‌زه‌لییگ له‌لیان یادگارى تاریخ پڕه‌وكردیه‌، وه‌لى لایه‌ن دیاریكریاى ئه‌وانه‌ن ك  تیۆرى دووسداشتن نیشتمان پیس كه‌ن له‌ گووشه‌ى ده‌سڵات و پارته‌یلیگ خه‌م به‌رهه‌مهاوه‌ر.

بتوایمن و نه‌توایمن، ڕاسى ئه‌وه‌سه‌ ك دووسداشتن عیراق ئه‌وه‌نه‌ شاریایه‌ زیاتر له‌وه‌گ ئاشكرایه‌، چوینكه‌ ئاشكراكردنى پڕژانه‌ ودویدمانى فره‌س، و ئه‌گه‌ر ئى كه‌ش و هه‌وا ك له‌تى ژیه‌یمن، وه‌رده‌وامى داشتوود، دووسداشتن نیشتمان وه‌ شاریایى مینیده‌ى و بووده‌ یه‌كیگ له‌ مه‌ترسیه‌یل گه‌ورامان له‌ دویاڕووژ.

 

عه‌لى حوسێن فه‌یلى