ژیانیگ له‌كه‌دار له‌ساى درامه‌ت

شفق نيوز

  ژیان له‌بان ئى گووشه‌ى زه‌ویه‌ پڕه‌ له‌ خوه‌شى و ته‌نگى، له‌ به‌رزى و نزمى، له‌ شكه‌ست و سه‌ركه‌فتن، له‌ ناودارى و به‌دناوى...هتد، وه‌لى ئه‌وه‌ك جى سه‌رسوڕمه‌نینه‌ ئه‌وه‌سه‌ ك مه‌ردمان فریه‌یگ دڵ وه‌ى دونیا خوه‌ش كه‌ن وه‌بى ئه‌وه‌ك هساویگ ئه‌را عاقبه‌تیان بكه‌ن، هه‌ر وه‌و خاتریشه‌ دوینید كه‌سه‌یلیگ هه‌ن باوه‌ڕیان ئه‌وه‌سه‌ ك دارایى و زینه‌ت ئى دونیا چاره‌ى گشت كیشه‌و گرفتیگیان ئه‌كاو ئه‌را هویچ كیشه‌یگ هه‌وه‌جه‌ وه‌ كه‌س ناكه‌ن، وه‌ل ئه‌وه‌یشا له‌یوا هویره‌و كه‌ن گیرفانیان گشت عه‌یبه‌یگیان شاریده‌و!!

بیگومان ئاده‌میزاد له‌گشت وه‌خت و ده‌ورانیگ هه‌وه‌جه‌ وه‌ به‌رزه‌وكردن راده‌ى بار ئابوورى خوه‌ى دیریدو هه‌وڵ ئه‌وه‌ ئه‌یاد هه‌میشه‌ گیرفانى پڕ بوود تا هه‌وه‌جه‌یل ژیان و گوزرانى وه‌پى پڕه‌و بكاو بتویه‌نید له‌ساى وه‌ شاد و به‌خته‌وه‌ر بژیه‌ید، ك یه‌یش هه‌ق گشت كه‌سیگه‌ له‌ى جووره‌ هویره‌و بكا.

وه‌لى شیوه‌ى ژیان له‌یرا دو جووره‌، ژیانیگ پایه‌دار پڕ له‌ كه‌رامه‌ت، ژیانیگیش له‌كه‌دار له‌ساى درامه‌ت.

ئه‌وانه‌گ باوه‌ڕیان ئه‌وه‌سه‌ ك گیرفان و داراییان عه‌یبه‌یلیان پووشید، ئه‌وه‌ ته‌نیا خه‌یاڵیگه‌و دڵ خوه‌یان وه‌پى شاده‌و كه‌ن، ك هه‌رچه‌نى كه‌سه‌یلیگ هه‌ن ریز و حورمه‌تیش له‌لیان گرن و تاڕاده‌یگ ده‌سه‌و سینه‌یش وسیه‌ن و سه‌ریش ئه‌ڕایان چه‌منن، وه‌لى تویه‌نیم بویشیم چشته‌یل فریه‌یگ تویه‌نید وه‌ پویل چاره‌سه‌ر بكه‌ید ته‌نیا شانیه‌ت و كه‌رامه‌ت ئاده‌میزاد نه‌ود وه‌ موڵك دونیا قه‌ره‌بوو نیه‌ود.

له‌ ناو كوومه‌ڵگایه‌یل كه‌سه‌یل فریه‌یگ هه‌ن ناوبانگ دیرن له‌ئاكام خوه‌شڕه‌فتارى و ساده‌یى، وه‌لى وه‌ل ئه‌وه‌یشا نورڕید لایه‌ن داراییان ته‌واو نیه‌و نه‌دارن، كه‌سه‌یلیگیش هه‌ن خاوه‌ن دارایى و خوه‌شگوزران، وه‌لى له‌كه‌دارن و ره‌فتار و كرده‌وه‌یلیان ڕى له‌لیان گرتگه‌ وه‌ چه‌و ریز و حورمه‌ته‌و ته‌ماشا بكریه‌ن و شایسته‌ى سه‌نگ قورسى نین له‌ هویچ وه‌ختیگ . وه‌لى ئه‌وه‌ك هه‌ر وه‌خاسى ناو ده‌ركردگه‌ هه‌میشه‌ هه‌ر جوور ته‌ڵاى ساقه‌و هه‌ر ریز و حورمه‌ت خوه‌ى دیرید.

دارایى ئاده‌میزاد له‌كه‌دار و به‌دڕه‌فتار نیه‌وده‌ هووكار وه‌ده‌سهاوردن متمانه‌و دڵنیایى یا كه‌سایه‌تى باوه‌ڕ وه‌پیكریاگیگ ، چوینكه‌ گوزه‌یشته‌ى پاك نیه‌و مه‌حاڵه‌ بتویه‌نید له‌كه‌یلى وه‌ پویل و دارایى په‌رده‌پووش بكا، هه‌ر وه‌و خاتریشه‌ دوینید هه‌میشه‌ دیار و ئاشكران له‌ناو مه‌ردم كومه‌ڵگاو هه‌رچه‌نى ده‌وڵه‌مه‌نیش بوون هه‌ر ناویان زڕه‌و كرده‌وه‌یلیان دیاره‌.

دانیال حه‌سه‌ن عه‌بدوڵڵا

ج . أ