كى دووس كورده‌؟

شفق نيوز

ئیمه‌ زانیم ك بریتانیا رووژگاره‌یل فره‌یگ كیشمه‌كیش راسه‌خۆ داشت وه‌ل شووڕش ئازادیخواز كورد، وه‌تایبه‌ت له‌سه‌ره‌تاى سه‌ده‌ى گوزه‌یشت و نه‌یشت شووڕش شێخ مه‌حموود حه‌فید بڕه‌سیده‌ مه‌رام، له‌یرایش ئه‌وه‌ ده‌ركه‌فید ك سیاسه‌ت ئیچنه‌ ده‌وڵه‌ته‌یلیگ نه‌باید وه‌ ئاسانى متمانه‌ وه‌پى بكریه‌ید .

شێخ محه‌مه‌د خاڵ له‌"سه‌رگوزه‌یشته‌یل ژیان"له‌رویداگیگ مێژوویى ئویشید: مێجه‌ر ئه‌دمۆنس سێ ساڵ راویژكار وزاره‌ت ناوخوه‌یى بویه‌ له‌به‌غداو گشت ساڵیگیش هاتیاد ئه‌را گه‌شتكردن له‌كوردستان و ناسیارى وه‌ل زوورم پیاوه‌یل گه‌وراو خوه‌نه‌واریش داشت، ئمجا ئویشید: ك سێ ساڵه‌گه‌ى ته‌واو كرد هاته‌ڕا سلێمانى، ك ئه‌و وه‌ختیشه‌ مه‌عروف جیاووك پاریزگار سلێمانى بوى و خوڵكى كرد ئه‌را نانخواردن و مه‌ردمان فریه‌یگیش له‌ده‌ورى گرده‌و بوین.

خاڵ ئویشید: وه‌ختیگیش ئه‌دمۆنس چیه‌سه‌و ئه‌را له‌نده‌ن، له‌شوون ئه‌وه‌ له‌ساڵ 1955 یه‌كیگ له‌ ناسیاره‌یلى وه‌ نه‌خوه‌شى چیه‌سه‌ڕا له‌ندن ك ناوى "حه‌مه‌ئاغاى عه‌بدلڕه‌حمان ئاغا" بویه‌و له‌ورا مێجه‌ر ئه‌دمۆنس چیه‌سه‌ سه‌ردانى و خوڵكى كردگه‌ ئه‌را نانخواردن له‌ ماڵه‌گه‌ى خوه‌ى و وه‌ حه‌مه‌ ئاغا وتگه‌: وه‌ختى له‌ سڵێمانى گله‌و خواردمه‌ ئه‌را له‌نده‌ن قاقه‌ز دویر ودریژیگ نویسامه‌ ئه‌را وه‌زیر خارجیه‌ى بریتانى و وه‌پى وتمه‌: ملله‌ت كورد ملله‌تیگ 25 ملیۆنیه‌و خاوه‌ن فه‌رهه‌نگ و ملله‌تیگ ئازاو دڵسووز و وه‌فادار و فامیده‌و داناس، ك تائیسه‌یش هه‌ر له‌یوا مه‌ندنه‌ وه‌بى ئه‌وه‌ك بڕه‌سنه‌ مافه‌یل خوه‌یان ك ئیسه‌ رووژ ئه‌وه‌ هاتگه‌ بریتانیا ده‌سمیه‌تیان بیه‌ید تا بڕه‌سنه‌ ئامانج خوه‌یان.

ئه‌دمۆنس ئه‌را حه‌مه‌ ئاغا ئویشید وه‌ختى نامه‌گه‌م ره‌سیه‌سه‌ وه‌زیر خارجیه‌ یه‌كسه‌ر كلكرده‌سه‌ شوونم و منیش چیمه‌سه‌ دیدارى، وه‌لى فره‌ له‌لیم تویڕه‌ بویه‌و وته‌سه‌ پیم: له‌وه‌رچه‌ ئى جووره‌ نامه‌یگ ئه‌ڕام نویسید؟ ئه‌ى تن نازانید ده‌وڵه‌ت بریتانیا هه‌ر له‌زویه‌و بڕیار داگه‌ هویچ وه‌ختیگ ده‌سمیه‌ت كورد نه‌یه‌ید!!

جى داخه‌ ئیمه‌ فریه‌جار باس كه‌یم و ئویشیم: ئمڕوو دونیا گشتى به‌رژه‌وه‌ندیه‌، دى نازانیم تا چه‌نیگ بریتانیاو ئه‌مریكایش ده‌سمیه‌ت كورد ئه‌یه‌ن له‌وه‌ر خاتر ره‌سین وه‌ مافه‌یلى، ئه‌گه‌ریش ئى وڵاته‌یله‌ وه‌ڕاسى پشتگیر و دووسمان بوون ئه‌وه‌ بیگومان ئه‌تویه‌نیم گام وه‌ره‌و سه‌روه‌خوه‌یى بنه‌یم و ئه‌گه‌ریش خودانه‌خواسته‌ پشت له‌ ئامانج كورد بكه‌ن ماناى ئه‌وه‌سه‌ تویه‌م چه‌ن ساڵه‌ى خه‌بات و قوربانیه‌یل كورد هیمان فریه‌ى مه‌ندگه‌ بایده‌ به‌ر.

ره‌نجده‌ر ئاواره‌