دژه‌ ده‌وڵه‌ت

شفق نيوز

ئيمه‌ ئيسه‌ وه‌گووره‌ی واقع ده‌وڵه‌تيگيم و ئه‌وه‌گ مه‌ندگه‌ ته‌نيا دگان وه‌پياناين ده‌وڵه‌ته‌يله‌ وه‌شيوه‌يگ فه‌رمی له‌ نه‌ته‌وه‌يل يه‌كگرتگ و وه‌پيداين كورسييگه‌ له‌و سازمان ناوده‌وڵه‌تيه‌. ئيمه‌ ئه‌گه‌ر تا رووژ ئمڕوو هويچ مه‌ترسييگ ئه‌را بان هاوسايه‌يلمان نه‌ياشتيمنه‌، ئه‌ی له‌وه‌رچه‌ بايه‌سه‌ ئيمه‌ی كورد خوه‌مان بانگه‌واز ئه‌وه‌ بكه‌يم ك ده‌وڵه‌ت كوردی نادێ دروس بكه‌يم، چوينكه‌ دژ ئيران و هاوسايه‌يليه‌.

ئايا ئيمه‌ له‌و رووژه‌و ك ئی باره‌ ك دامه‌زرانن حكوومه‌ت هه‌رێم كوردستان بويه‌، هويچ مه‌ترسييگ داشتيمنه‌ ئه‌را بان ئه‌و هاوسايه‌يله‌؟ نه‌خێر وه‌ چه‌واشه‌وه‌ په‌يوه‌ندی ئيمه‌و ئيران ئه‌را نموونه‌ رووژ له‌دويای رووژ وه‌ره‌و خاسی چيه‌و ئاڵشتكاری ئابووری له‌ناونی هه‌ردوگلا ره‌سيه‌سه‌ راده‌يگ ك جوور نموونه‌ ئاماژه‌ وه‌پی ئه‌كريه‌يد، هه‌ر له‌وه‌ر ئه‌وه‌يش ئيمه‌ باوه‌ڕمان ئه‌وه‌سه‌ ك دويای ئاشكراكردنی ئه‌و راپرسيه‌ ئه‌كريه‌يدو ملله‌ته‌گه‌مان رای خوه‌ی ده‌رئه‌خا.

ئمجا ئيمه‌يش ئوميد ئه‌وه‌ ئه‌كه‌يم په‌يوه‌ندی ئيمه‌و ده‌وڵه‌ت كومار ئسلامی وه‌ره‌و نواتر بچوود، چوينكه‌ له‌ماوه‌ی ئی يانزه‌ ساڵ دوياخره‌ هويچ گرفتيگ له‌ناونی ئه‌و په‌يوه‌نديه‌يله‌ نه‌ويه‌ ك ئاده‌ميزاد جوور مه‌ترسی تاريفی بكا، به‌ڵكوو رووژ وه‌ڕووژ خاستر بويه‌. هه‌ر وه‌و خاتريشه‌ بايه‌س بوی ئه‌و ريزداره‌ ك خوه‌ی يه‌كيگ له‌و كه‌سه‌يله‌ بوياتاد ك ئه‌و راسيه‌يله‌ ئه‌را ئيران پاك و ئاشكرا بكردياد نه‌ك ئيران له‌ هويچه‌و دودڵ بكاد. ئمجا وه‌ چه‌واشه‌ی ئه‌و هويره‌وكردنه‌ ئويشيم: ئيمه‌ هه‌ميشه‌ هووكار گونجيان و ئاسايش بويمنه‌ له‌ ناوچه‌گه‌.

مێژوو په‌يوه‌نديه‌يل ئيمه‌و ئيران شايه‌تيده‌ر ئه‌و راسيه‌نه‌، ئه‌گه‌ر كه‌سيگ جوور قانع فه‌رد و حه‌نان فه‌تلاوی و خود مالكی دژايه‌تی ئه‌و ماف ره‌وای ملله‌ت كوردستانه‌ بكه‌ن، نادێ كه‌سه‌يليگ ك له‌ حزبيگ كار ئه‌كه‌ن و هه‌زاران قوربانی له‌وه‌ر خاتر كورد و كوردستان دانه‌ ئه‌و هه‌ڵويسته‌ داشتوون.

سه‌لام عه‌بدوڵڵا

ج . أ