نه‌خشه‌ى تازه‌ له‌ خوه‌رهه‌ڵات ناوین

شفق نيوز

 

ئمجا هه‌رچه‌نى وڵاته‌یل خوه‌رهه‌ڵات ناوین له‌بان بنه‌ماى نه‌ته‌وایه‌تى دامه‌زریانه‌و ته‌نیا نه‌ته‌وه‌ى كورده‌ ك دابه‌ش كریاگه‌ له‌بان وڵاته‌یل ناوچه‌گه‌و هه‌رچه‌نى له‌ په‌یماننامه‌ى سیڤه‌ر دگان وه‌گشت هه‌قه‌یل نه‌ته‌وایه‌تى كورد و دامه‌زرانن ده‌وڵه‌تیگ سه‌روه‌خوه‌ى نریا له‌باشوور خوه‌رهه‌ڵات توركیاو ولایه‌ت موسڵ، وه‌لى دویاخر ئه‌و په‌یماننامه‌ جیوه‌جى نه‌كریاو خوه‌یان له‌جیوه‌جیكردنى شاردنه‌و. ئنجا مه‌رام باسه‌گه‌مان له‌یرا ئه‌وه‌سه‌ ك له‌ ماوه‌ى گوزه‌یشت باس له‌ ئاڵشتكردن نه‌خشه‌ى خوه‌رهه‌ڵات ناوین و په‌یابوین چه‌ن وڵاتیگ تازه‌ كریا له‌ فره‌یگ له‌ كه‌ناڵه‌یل جوراوجوور میدیا، وه‌لى ئه‌و حاڵه‌ته‌ ك له‌خوه‌رهه‌ڵات ناوین كه‌فیده‌ وه‌رچه‌و مه‌سه‌له‌یگ فره‌ جیاواز و قورستره‌ له‌ شوونه‌یل تر جه‌هان.

په‌یابوین هه‌ر قه‌واره‌و ده‌وڵه‌ت تازه‌یگ دیاره‌ ئاسایى نیه‌و شایه‌ت هه‌وه‌جه‌ وه‌ چه‌ن نه‌شته‌رگه‌رییگ قورس و سه‌خت داشتوود، چوینكه‌ سه‌ره‌تاى ئى ئاڵشتكاریه‌یله‌ له‌ عراقه‌و ده‌ركه‌فت وه‌ دروسبوین هه‌رێم كوردستان له‌ باكوور عراق، وه‌لى دویاى رمیان رژیم سه‌دامیش له‌ساڵ 2003و دویاى داناین ئه‌نجوومه‌ن حوكم و دامه‌زرانن حكوومه‌ت وه‌ختى و نویسانن ده‌ستوور و راپرسى و دامه‌زرانن كابینه‌یل حكوومه‌ت هاوبه‌ش نیشتمانى تائیسه‌یش وڵات پلكیاسه‌ قه‌یرانیگ قویل و گشتگیر و هویچ ئومید و ئاره‌زوویگ رووشن له‌لى وه‌دى ناكریه‌ید.

له‌ سوریایش ك ئیسه‌ كه‌فته‌سه‌ ناو جه‌نگیگ خویناوى و كیشمه‌كیش سه‌خت له‌ناونى رژیمه‌گه‌ى ئه‌سه‌د و چین و لایه‌نه‌یل جیاواز سوریا وه‌ عه‌ره‌ب و كورد و مه‌سیحى و كه‌مینه‌یل تر ك كه‌س نازانید دویاى كپه‌وبوین ده‌نگ تووپ ئایا وڵاتیگ دیموكراسى دامه‌زریه‌ید ك جیاوازى نه‌كا له‌ناونى گشت هاووڵاتیه‌یل ئه‌و وڵاته‌ یا ده‌وڵه‌تیگ عه‌له‌وى له‌ كنار ده‌ریاى ناوڕاس دامه‌زریه‌ید و ده‌وڵه‌تیگ كوردى دامه‌زریه‌ید له‌ناونى سوریاو عراق یا به‌شیگ له‌ توركیا و ئیرانیش گریده‌و؟

له‌ كووتایى ره‌سیمنه‌ ئه‌و ئاكامه‌ ك ئایا وڵاته‌یل یه‌كگرن له‌ ئاكام وجوود بنه‌ماى هاوبه‌ش و به‌رژه‌وه‌ندى هاوبه‌ش و گه‌شه‌كردن بازاڕ بیجگه‌ ره‌گه‌ز و دین و مه‌زه‌و وداب ونه‌ریت هاوبه‌ش یا له‌یه‌ك ترازیه‌ن و جیا بوونه‌وه‌ ئه‌گه‌ر ئه‌و بنه‌مایه‌یله‌ له‌ناونیان نه‌ود؟ وه‌لى بڕیگ له‌ حكوومه‌ته‌یل فره‌جار دگان وه‌ى راسیه‌یله‌ ك باسیان كردیم نانه‌ن و ئیمه‌یش گوناهى خه‌یمنه‌ مل ده‌س ده‌ره‌كى.

بورهان شێخ ره‌ووف

ج . أ