گه‌‌رمه‌‌شینیگ ئه‌‌را هه‌ڵه‌‌بجه‌‌

شفق نيوز

بوموارانه‌‌، دواره‌‌ دوشمنه‌‌و په‌‌لاماره‌‌و كیمیاوارانه‌‌، دواره‌‌ وه‌هاره‌‌..وه‌هار..وه‌هار كوردقڕانه‌‌...دواره‌‌ وه‌هار دویكه‌ڵ و بوو سیانید و خه‌‌رده‌له‌‌، دواره‌‌ خنكیانه‌‌...

دواره‌‌ شانزه‌‌ێ سێه‌‌ و ئاگروارانه‌‌، بوو سێف و پرتقاڵ و مه‌‌رگه‌‌سات ژیانه‌‌، دواره‌‌ هه‌ڵه‌‌بجه‌‌ى شه‌هیدم له‌‌تاو هاڕه‌ى ته‌‌یاره‌‌ و بومواران هه‌‌راسانه‌‌، دواره‌‌ ناڵه‌‌ و شین داڵگه‌‌یل و لاڵكیان له‌‌ ئاسمان ئه‌‌را وارین وارانه‌‌...

دواره‌‌ شانزه‌‌ێ سێ ژه‌هرا‌ویه‌‌و دواره‌‌ كولیانه‌‌وه‌‌ى زه‌‌خم كوردستانه‌، دواره‌‌ ناڵه‌‌ناڵ زه‌‌خمداره‌‌یل و قاقای خه‌‌نستن دوژمنه‌‌یل و بێ ده‌‌نگى جه‌هانه‌‌، بوو مه‌‌رگه‌‌و گیان كه‌‌نینه‌‌ و خیانه‌‌ت عه‌‌رش و زه‌‌وى و ئاسمانه‌‌...

قیژه‌ى خوه‌‌یشكه‌‌و هاوار باوگ و ناڵه‌‌ی داڵگ، دواره‌‌ هه‌ڵه‌‌بجه‌ى شه‌هیدم وه‌‌ خوین خه‌ڵتانه‌‌...دواره‌‌ كووچ یاران و دڵكه‌‌نین له‌‌ میلكان و باوانه‌‌... دواره‌‌ موور و شین و تازیه‌‌ى‌ كورده‌‌ماڵانه‌‌...

ڕوى وه‌‌ هه‌‌ر كوو كه‌‌م، خاكه‌‌..خوینه‌‌..ژهه‌ره‌‌..ته‌‌رمیگ بى گیانه‌‌... كوورپه‌‌یل ناو هه‌‌لوولكه‌‌و جوور گوڵ تیه‌‌نى ئه‌‌را ئاو سیسگیانه‌‌...دواره‌‌ عومه‌‌ر خاوه‌‌ر و ڕووله‌‌گه‌‌ی مه‌‌زڵوومانه‌‌ سه‌‌ره‌‌ونانه‌‌...

 

دواره‌‌ (3/16)ه‌‌و گورگه‌‌یل به‌‌عسى په‌‌لامار عاشقه‌یل هه‌ڵه‌‌بجه‌‌ دانه‌‌... هیرۆشیما و هۆلۆكۆست و ناحه‌‌قى حقووق ئنسانه‌‌...چوینكه‌‌ كوردم، خنكیه‌‌م و خودایش ئمڕوو په‌‌شیمانه‌‌... (3/16)ه‌‌و ڕوى سیه‌‌یى ڕووژشمار و تاریخ پیس دوشمنانه‌‌...

ن: ئاراس جه‌‌واد