قسه‌ی پيشينه‌يل..سه‌رچه‌وه‌ی ماريفه‌ت

شفق نيوز

گومان له‌تی نيه‌ ك زوورممان نه‌ف له‌و گوفتاره‌يل ته‌ڵايی پيشينه‌يلمانه‌ وه‌رگريم و كه‌سانيگيش هه‌ن وه‌ تايبه‌ت نه‌وه‌يل تازه‌ی ئمڕوو فريه‌ وه‌ كه‌می پيشوازی له‌و گفته‌يل كه‌ڵكدار و پڕ مانای دانرياگ و ئاماده‌كرياگه ئه‌كه‌ن ‌و كه‌متريش پشت وه‌پی به‌سن و له‌ هه‌مان وه‌خت جوور به‌شيگيش له‌ ئه‌زموونه‌يل رووژگار گوزه‌يشته‌ تاريفی ئه‌كه‌ن.

وه‌لی له‌ڕاسی قسه‌ی پيشينه‌يل وه‌ سووك و ئاسان نه‌وترياگه‌و هه‌ر په‌نديگ له‌لی له‌ ئاكام ئه‌زموون و كرده‌وه‌و رويداگيگ جيگير كرياگه‌و له‌گشت وه‌خت و سه‌رده‌ميگيش هه‌وه‌جه‌ وه‌پی ديريم ك وه‌رده‌وام جی خوه‌ی ئه‌گريدو مامڵه‌ وه‌پی ئه‌كريه‌يدو گه‌نجينه‌يگ هه‌ميشه‌يی و به‌رداره‌.

هه‌ر وه‌و خاتريشه‌ ئويشيم چشتيگ ك مێژووه‌گه‌ی و ريككه‌فت وتنی كويه‌ن ئه‌دێد، وه‌لی هه‌ر وه‌ختيگ‌ هه‌وه‌جه‌ وه‌پی داشتويد هه‌ر تازه‌و بی له‌كه‌س له‌ مه‌يدان تاقيكردن و چاره‌سه‌ر گرفته‌يل جوراوجوور، ئه‌ويش په‌ند و قسه‌ی پيشينه‌يله‌ ك بايه‌سه‌ وه‌ گشت شانازييگه‌و جيگيريان بكه‌يم له‌ كار و كرده‌وه‌و ره‌فتارمان له‌وه‌ر خاتر زيايكردن سه‌ركه‌فتنمان له‌ ژيان و كه‌مه‌وكردن شكه‌ست هه‌وڵه‌يل بی بنه‌ماو نادروسمان، چوينكه‌ هه‌ر په‌نديگ له‌ليان دنگه‌يگه‌ ئه‌را بته‌وكردن ديواريگ لار و ليژ.

وه‌لی جی داخه‌ نه‌وه‌ی ئمڕوو جوور ئه‌وه‌ك سه‌ره‌تا ئاماژه‌ وه‌پی كرديم سه‌رساخته‌ وه‌ل تاقيكردن قسه‌ی پيشينه‌يلمان نه‌يرن و فريه‌ وه‌ كه‌می دوينيم سه‌ردان ئی ديواخان و خوه‌ندنگای گه‌ورای زانستی و ماريفيه‌ بكه‌ن و هه‌ر وه‌و خاتريشه‌ هه‌ميشه‌ فريه‌يگ له‌ليان له‌ رووژگار ئمڕوو له‌ ژيان سه‌ركه‌فتگ نيين و شكه‌ست ئه‌يه‌رن له‌ ئه‌زموونه‌يليان، چوينكه‌ په‌يڕه‌وكردن قسه‌ی پيشينه‌يل په‌يكردن سه‌رچه‌وه‌ی ماريفه‌ته‌.

ره‌نجده‌ر ئاواره‌