هێمان كارته‌يل تر مه‌نيه‌!

شفق نيوز

سياسه‌ت ئيرنگه‌ى ناوچه‌گه‌و ئه‌و ته‌نگه‌وه‌ريه‌له‌(پرۆگرامى ئه‌تۆمى ئيران – فشار ئه‌را به‌سين گه‌ڕاو هومز- توندوتيژيه‌يل رژێم به‌شار له‌ وه‌رايوه‌ر هاووڵاتيه‌ل – نگرانى وڵاته‌يل كه‌نداو له‌ وه‌رايوه‌ر ده‌سكارى كردن ئيران له‌ كاروبار ناوخوه‌يان) ئه‌راچينه‌يل خوه‌ى رێ بخاد، وه‌ى ئه‌نجامه‌ ره‌سێ ك حكومه‌ته‌گه‌ى مالكى ها له‌ باريكى و هه‌ر ئه‌وچنه‌ ك ئێژن: كافر وه‌ هاڵێ نه‌ود!.

هه‌ر ئه‌وچنه‌يشه‌ ك له‌ لاى گشتى ئاشكرايه‌ ك سياسه‌ت هاوپه‌يمانى ته‌مام ئه‌گه‌رێ له‌ بان بنه‌ماى به‌رژه‌وندى كرياس و هويچ چشتێ رێژه‌ى ئاڵشته‌و نه‌وين نه‌يرێد.

ئه‌را يه‌يشه‌ وه‌ دوير نيه‌ونيه‌يد ك له‌ چه‌ن مانگ ئاينده‌ ئه‌وه‌گ ئمڕوو هه‌سه‌، سوو وه‌ره‌و چشت تر ئاڵشته‌و بكريه‌يد، وه‌ى مانا ك وه‌ ته‌مامى سه‌روبنه‌و بوود. ئه‌را نموونه‌: كى له‌ بان ئه‌ى قه‌ناعه‌ته‌ بوى ك ئه‌مريكا ئه‌را به‌رژه‌وه‌ندى ئيخوان پشته‌و موباره‌ك بكا يا عه‌لى عه‌بدڵڵا ساڵح وه‌ سه‌لامه‌تى له‌‌و ته‌نگه‌وه‌ريه‌ نه‌جات په‌يا بكاو قه‌زافى وه‌رجله‌ به‌شار بكوشيه‌يد ك له‌ى ئاخريله‌و بويه‌ سه‌رباز شه‌تره‌نج ده‌س خوه‌رئاواو خوه‌ى كردويده‌ ئه‌فريقايى نه‌ عه‌ره‌و.

وه‌ى مانا ك ته‌مام ئه‌گه‌ريل وازه‌و به‌رژه‌وه‌نديه‌يل سياسى و ئابوورى حوكم كه‌ن. له‌ دوى تريشه‌و ئمڕو بار ئيران له‌ جاران قورسته‌ره‌و بويه‌، ئه‌گه‌ر مه‌فرێ ئه‌را بايده‌ دى، هه‌رگز ئاماده‌ نيه‌خوه‌ى بكا وه‌ قوروانى كورسيه‌گه‌ى مالكى، چوين ك يه خاس زانێ مالكيش ئاماده‌ نيه‌ خوه‌ى بكا وه‌ قوروان ئيران، ئه‌گه‌ر گره‌نتى تر بكه‌فێده‌ ده‌سێ تا يه‌گ له‌ ده‌سڵات بمێنێده‌ى.

ئه‌مريكايش ك ئه‌و هه‌مگه‌ قوروانى ئه‌را عيراق وه‌ ناو هاوردن ديموكراسى وه‌ ئاشتى دايه‌، ئه‌گه‌ر ئمڕوو له‌وه‌ر ئه‌ڵوژانن كاكه‌ برا، ئه‌ڵس وبنيش ونه‌رمى تاكتيكانه‌ى وه‌ختى وه‌ل مالكى بكا، وه‌لى يه‌‌ وه‌ى مانا نيه‌ ك سوو له‌ بان ئه‌و كاره‌يل سه‌رده‌ميه‌ ك بوينه‌سه‌ مه‌مه‌ر له‌كه‌دار بوين ناوبانگ ئه‌مريكا وه‌ توندى قسيه‌ وه‌ليا نه‌كا. نه‌خاسمه‌ خاس ناسێده‌ى ك تواناى ئه‌و دويا هاتنێ وه‌ل به‌رژه‌ونديه‌يل ئه‌مريكا له‌ عيراق نيه‌. هه‌ له‌ بان ئه‌ى بنه‌مايشه‌ ئداره‌ى ئه‌مريكا تا ئيسه‌ دو داواكارى مالكى وداروده‌ستگه‌ى ره‌ده‌و ‌كرديه‌(ته‌قلا ئه‌را په‌شيمانه‌و بوين ئيسكۆن مۆبيل له‌ كۆنتراكته‌يل نه‌فتى ك وه‌ل هه‌رێم كوردستان و داواى پێشوازى نه‌كردن له‌ سه‌رۆك كوردستان)، ك ئه‌و وه‌ختيشه‌ بڕێگ له‌ ميديايل خوه‌مانيش كه‌فتن ژێر ئه‌و وه‌همه‌و وه‌ ده‌نگ گه‌ن و نا‌شازه‌و كه‌فتنه‌و سه‌رچوپى و ئه‌ڵپه‌ڕگه‌!.

له‌ بان ئاست ناوخوه‌ى عيراقيش، مالكى وه‌ ته‌نيا مه‌نيه‌، ته‌نانه‌ت له‌ ناو حزب ده‌عوه‌يش بڕێگ فيگۆرى به‌ ئه‌زموون وه‌ توانا فرامۆش كرديه‌و فێشتر پشت وه‌و فێگۆره‌يل به‌سيه‌ ك خوه‌ى ده‌س له‌ دروس كردنيان داشتيه‌ وه‌ى مانا ك وه‌ز يه‌يش له‌ وه‌ز سورياو هاوپه‌يمانه‌يلێ خاستر نيه‌. هه‌روه‌يجووره‌يش بايمه‌و سه‌رهاوپه‌يمانيش له‌لێ رازى نين و له‌لێ خوازينه‌ ك تا زويه‌ ئه‌ى ته‌نگه‌و بوينه‌ چاره‌سه‌ر بكا تا ئه‌ى مه‌رج سه‌روبنه‌و نه‌ويه‌. وه‌ى مانا ك وه‌ چه‌واشه‌ى بڕێگ ئه‌راچين، مالكى ناتوانێ وه‌ خوازين خوه‌ى قانوونه‌يل گرنگ بنه‌يده‌و پشت سه‌ر، ئه‌را نموونه‌: قانوون نه‌فت و گاز. چوين ك دستوور و رێكه‌فتنێ له‌ى باوه‌ته‌و هه‌سه‌ ك تايبه‌تمه‌ندى و ده‌سڵات وه‌ هه‌رێم كوردستان له‌ى باوه‌ته‌ دايه‌. وه‌ى مانا ئه‌ى قانوونه‌ له‌ بان ژماره‌ى ده‌نگ له‌ ناو په‌رله‌مان نۆينه‌ره‌يل عيراق نه‌وسيايه‌، به‌ڵكو به‌نده‌ وه‌ رێكه‌فتن سياسى. ئه‌رايه‌ ئه‌گه‌ر ته‌قلايل ئه‌را چاره‌سه‌ر كردن ده‌ق رێكه‌فتن هه‌ولێر وه‌ بنبه‌ست ره‌سى، هێمان كارته‌يل تر فره‌ى مه‌ننه‌ ك له‌ دژ مالكى وه‌ كار باريه‌ن، له‌وانه‌: كاركردن ئه‌را وه‌ره‌و ئاراسته‌ى يه‌ بردن دامه‌زرانن هه‌رێم تر له‌ ناوه‌راس و باشوور ك ئيسه‌ هه‌رچه‌ن نه‌كريانه‌ وه‌ هه‌رێم، وه‌لى گورجن و له‌ بان داواى خوه‌يان و ته‌قلا ئه‌راى وسانه‌./ش

كه‌ریم قادر