كوردستان هه‌ڵوژاردن ئه‌كاو "پارتى" ئه‌واده‌و

شفق نيوز

  جوور ئه‌وه‌ك ئاشكراس راده‌ى هوشیارى مه‌ردم له‌ هه‌ر وڵاتیگ خوه‌ى له‌ چه‌ن خاڵیگ دوینیده‌و، له‌وانه‌یش تا چه‌نیگ پابه‌نده‌ وه‌ به‌شدارى له‌ مه‌سه‌له‌ى هه‌ڵوژاردن و چه‌نیگ ئاره‌زوو دیرید وه‌ره‌و خاستر و مه‌زه‌نه‌ى ئه‌را كاره‌یل حكوومه‌ت هه‌ڵوژریاگ چه‌نیگه‌ وه‌به‌راورد وه‌ل به‌رنامه‌یل ركابه‌رى، ك یه‌یش هان ده‌نگده‌ر ئه‌یاد ده‌نگ بیه‌نه‌ ئه‌و لایه‌نه‌یله‌ ك ئاره‌زووه‌یلیان جیوه‌جى ئه‌كا.

یه‌یش بیجگه‌ هووكاره‌یل تر ك واقع عراقى ئه‌چه‌سپنیده‌ى و ئاشكراس له‌لاى گشتمان ك وه‌شیوه‌یگ رووشن كاریگه‌رى دیرید له‌بان ئاكام هه‌ڵوژاردنه‌یل، له‌وانه‌یش مه‌سه‌له‌ى به‌رز و نزمى تایفى و ره‌گه‌زى و ته‌نانه‌ت هووزایه‌تییش له‌بان ده‌نگده‌ر، ئنجا هه‌ر له‌وه‌ر ئه‌وه‌یش پیشبینیكردن ئاڵشتكارى بنه‌ڕه‌تى له‌ خه‌ریته‌ى سیاسى له‌ى جووره‌ باریگ فریه‌ سه‌خته‌.

له‌باوه‌ت خول چواره‌م هه‌ڵوژاردنه‌یل په‌رله‌مان كوردستان، ناوچه‌گه‌ چه‌وه‌ڕیه‌ ك ده‌نگده‌ر كوردستانى كى هه‌ڵوژنیدو هه‌ڵوژاردنه‌یل چ ریڕه‌ویگ گریده‌وه‌ر، ك ئایا ده‌نگده‌ر هه‌ڵبژارده‌ى خاستریگ دیرید له‌ هه‌ڵبژارده‌ى ئه‌و لایه‌نه‌یل خاوه‌ن به‌رنامه‌یله‌ ك جه‌خت له‌بان وه‌رده‌وامى بار سه‌قامگیر ئاسایش و په‌ره‌سه‌ندن ئه‌و ئابوورى و پیشكه‌فتنه‌ كه‌ن له‌هه‌رێم ك بویه‌سه‌ مایه‌ى سه‌رسوڕمه‌ندن و مه‌یلكیشان گشت مه‌ردم؟ به‌ڵكوو له‌یه‌یش گرینگتر، هه‌ڵوژانن لایه‌ن متمانه‌داره‌ ك تواناى له‌خوه‌یگرتن وه‌رپرسیارێتى داشتوود.

پرووسه‌ى دیموكراسى ك ده‌نگ ده‌نگده‌ر كرده‌سه‌ جیاكارى ناونى ركابه‌ره‌یل و ئى ده‌نگه‌ شه‌رعیه‌ت ئه‌یاده‌ سه‌ركه‌فتگه‌یل و ڕى وه‌پیان ئه‌یاد وه‌خاتر ته‌واوكردن ئه‌و كاره‌یل به‌رنامه‌یانه‌ ك قه‌وڵ دان ته‌واوى بكه‌ن جوور ته‌واوكه‌ر به‌رنامه‌یل وه‌رین یا له‌ڕى به‌رنامه‌یل تازه‌،ئه‌یه‌ بیگومان هه‌ر له‌ ڕیشگه‌و جیوازه‌ له‌ كاره‌یل وه‌رین.

له‌وڵاتیگ وه‌ك عراق جوور ئه‌وه‌ك ئاشكراس له‌لامان ك ده‌سڵاتدار و سه‌ركرده‌یل ئاسایش و حكوومى وه‌ دریژایى ساڵه‌یل فریه‌یگ هه‌ر شكه‌ست هاوردنه‌ له‌گشت تاقیكردنیگ و هه‌ر وازیش نایه‌رن له‌و شكه‌سته‌ له‌چه‌و بار هه‌رێم كوردستان ك به‌شیگه‌ له‌ عراق، ئنجا ئاساییه‌ ئه‌وه‌ك هه‌وڵ ئه‌را كار جددى و په‌یاكردن ئاسایش و بنیاتناین و په‌ره‌داین داو بوار فریه‌یگ دا ئازادى، متمانه‌ى هاووڵاتى وه‌ده‌س بارید.

له‌ساى ئى هه‌مگه‌ ده‌سكه‌فته‌یله‌ له‌یوا دوینم وه‌رجه‌ ئه‌وه‌ك پارت دیموكرات كوردستان له‌ى هه‌ڵوژاردنه‌یله‌ سه‌ربكه‌فید، چوینكه‌ پارتى دروسكه‌ر ئى باره‌ بویه‌ له‌ كوردستان، دوینم له‌لاى گشت ئه‌وانه‌یش ك سه‌ردان هه‌رێم ئه‌كه‌ن سه‌ركه‌فتگه‌، هه‌ر له‌ هاووڵاتیه‌یل عراقى بگر تاره‌سیده‌ هاووڵاتى ده‌وڵه‌ته‌یل هاوساو جه‌هان له‌وه‌ختیگ وه‌چه‌و خوه‌یان دوینن و به‌راوردى كه‌ن وه‌ل وڵاته‌یل خوه‌یان. ئنجا له‌لاى ده‌نگده‌ر كوردستانى "پارتى" به‌یده‌و له‌وه‌ر خاتر هووكاریگ ئاسایى ك ئه‌ویش ئه‌وه‌سه‌ مه‌ردم ئاسایش و پیشكه‌فتن هه‌ڵوژنن جوور ئه‌وه‌ك زویتر ئه‌نجامیدان و به‌ره‌گه‌ى دینه‌ چه‌و ئیسه‌یش هه‌ر وه‌و جووره‌ ئه‌و هه‌ڵوژاننه‌ دوباره‌وه‌ ئه‌كه‌ن وه‌خاتر زه‌مانه‌تكردن ئیسه‌و ئاینده‌ى كوردستان، ئنجا ئه‌گه‌ر خوازیار فیشتر به‌خته‌وه‌رى و ئاسایش و سه‌قامگیرى و هاوردنه‌وه‌ى هه‌قه‌یل زه‌فتكریاگ بوون له‌گشت بواریگه‌و، بایه‌سه‌ پارتى هه‌ڵوژنن، چوینكه‌ پارتى سه‌ركه‌فت و سه‌رله‌نوو سه‌رئه‌كه‌فید له‌ هه‌ر هه‌ڵوژاردنیگ ك به‌رژه‌وه‌ندى ملله‌ت كوردستان له‌تى بوود وه‌گشت پیكهاته‌یلیه‌و.

عه‌لى حسێن فه‌یلى

ج . أ