ئه‌گه‌ر گشت وه‌رزه‌یل وه‌هار بویاتاد

شفق نيوز

 

هه‌ر له‌ زویه‌و قسه‌یگ هه‌س ك ئویشید فه‌یلیه‌یل دى جوور جاران نایه‌نه‌و و زوى واز له‌ هه‌ر پابه‌ندییگ ئه‌یه‌رن له‌هه‌ر پرۆژه‌یگ سیاسى یا چشتیگ تر له‌و جووره‌ ك هه‌وه‌جه‌ وه‌ دید ئاینده‌و سه‌بر داشتوود. دویاى 9 ساڵ له‌بان دامه‌زرانن شه‌فه‌ق هویچ به‌ڵگه‌یگ نادوینم وتارمان وه‌ره‌و دویره‌وخستن له‌ ركابه‌رى ناشه‌ریفانه‌ بواد، ئه‌را نموونه‌: تن ئه‌گه‌ر گرنگى وه‌ شیوه‌زار و زووان داڵگى خوه‌د نه‌یه‌یدو باوه‌ڕ وه‌پیان نه‌یاشتوید و قسه‌ وه‌ل پێكهاته‌گه‌ى خوه‌دا نه‌كه‌ید مه‌گه‌ر ته‌نیا له‌ڕێ زووان كه‌سه‌یل تر، ئایا ئى جووره‌ حاڵه‌تیگ مزگانى خوه‌شى و قورتاركردن ئه‌یاده‌ باقى ئه‌وه‌گ له‌ زووان و مێژوو و كلتوورمان مه‌ندگه‌سه‌و؟ ئایا ئه‌یه‌ ئه‌و ره‌فتاره‌سه‌ ك قورتارمان ئه‌كا له‌و ده‌رده‌سه‌رى و مه‌ینه‌تیه‌یله‌؟ مه‌هانه‌ چه‌س ئه‌را ئى چشته‌یله‌و چوین بایه‌سه‌ داواى هه‌ق مه‌زڵومیه‌ت بكه‌یم ئه‌گه‌ر ئه‌یاكه‌مان زوڵم له‌ئه‌واكه‌مان بكا؟ مه‌حاڵه‌ هویچ ده‌زگایگ ره‌سانن بتویه‌نێد بووده‌ خاوه‌ن ئه‌و مه‌سه‌له‌ ك رووڵه‌یل پێكهاتگه‌مان له‌ده‌ورى جه‌م بوینه‌ وه‌بێ وجوود بڕێگ پابه‌ندى و رێڕه‌و. ئایا ئه‌وه‌ خاستر نییه‌ نه‌وه‌یل تازه‌مان بگریمنه‌ خوه‌مان و بیلیمنه‌یان جوور سه‌رچه‌وه‌ى هێزیگ بوون و فه‌یلیه‌یل شانازى وه‌پیه‌و بكه‌ن؟ ئیمه‌ ئویشیم هێمان هه‌وڵداین له‌ شه‌فه‌ق وه‌رده‌وامه‌ له‌ ئه‌وسا فیشتر و وه‌هه‌وڵیگ به‌رزتر ك وه‌ل ئه‌وه‌یشا پێشكه‌فتن ئاشكرایگ به‌رهه‌م هاوردگه‌ وه‌ل ده‌سكه‌فته‌یل دیارى و فیشتر له‌ جاران.

بیگومان ئیمه‌ هایم وه‌ل گه‌شه‌كردن به‌هره‌و پێشكه‌فتن رووڵه‌یلمان له‌بوار كاره‌یل ره‌ساننمان و تویه‌نیم بوشیم و تواناو باوه‌ڕ وه‌ ئه‌وه‌ نه‌یریم ك خوسه‌مان له‌ مه‌ندنه‌وه‌ى كارمه‌نده‌یلمان بیه‌ێد، به‌ڵكوو وه‌ سه‌ختى فره‌یگه‌و مه‌شق بڕێگ له‌ كارمه‌نده‌یلمان دایمنه‌ تا ئه‌لف باى ره‌سانن یاێ بگرن، هه‌ر له‌وه‌ر ئه‌وه‌یش نه‌بایه‌د ئه‌و راسیه‌ له‌ هویره‌و بچوود ك شه‌فه‌ق یه‌كه‌مین خوه‌ندنگایگ بویه‌ رووڵه‌یل پیكهاتگه‌مان گرتگه‌سه‌ خوه‌ى و گرنگى وه‌پیان داو ژن و پیاوه‌یلى ره‌سانه‌ ئاست به‌رزیگ له‌ جه‌هان رووژنامه‌گه‌رى و ره‌سانن و رووشنهویرى هه‌ق به‌شداریكردن وه‌جه‌م له‌ ده‌روینیان كاڵى له‌ ئاست كێشه‌گه‌مان و یه‌یش وێنه‌ى جوانیداریگ نیشاندا له‌بان ره‌ساننكاره‌یل تر كورد فه‌یلى ئه‌را كه‌سه‌یل تر.

له‌ نویه‌مین ساڵیاد دامه‌زرانن شه‌فه‌ق وه‌گشت ئاشكرایگه‌و ئویشم: تا رووژ ئمڕوو وه‌ لایه‌ن كه‌مه‌و هویچ لایه‌نیگ نه‌ویه‌ خزمه‌ت ئى شیوه‌زووانه‌ بكا چ له‌ڕوى نویسانن یا ژنه‌فتن و ئى پێكهاته‌ وه‌شیوه‌یگ وه‌رده‌وام ئاشنا بكاو نزیكایه‌تى بخاده‌ ناونى چین و كوومه‌ڵگاگه‌مان جوور ئه‌وه‌ك شه‌فه‌ق ئه‌نجامى دا.

ئمڕوو ئیمه‌ ساڵیاد دامه‌زرانن ده‌زگاى شه‌فه‌ق كه‌یم و بویه‌ شماره‌یگ دیار و ئاشكرا له‌ ئاسمان ره‌سانن عراقى و باسى وه‌جوانى ئه‌كریه‌ید، ئیمه‌یش ئیسه‌ له‌گشت وه‌ختیگ فیشتر خوه‌شاڵیم وه‌ سه‌ركه‌فتن هه‌وڵ خێزان شه‌فه‌ق، چوینكه‌ وه‌ گووره‌ى باوه‌ڕ و ریڕه‌ومان كار كه‌یم و ئى جورئه‌ته‌ وه‌ده‌س هاوردیمه‌و ئاماده‌یم له‌یه‌یش فیشتر باریمنه‌ ده‌س و خوازیار فیشتریم له‌جاران.

جاریگ تر پیرووزبایى له‌ خوه‌م و گشت دامه‌زرنه‌ره‌یل و كارمه‌نده‌یل شه‌فه‌ق كه‌م وه‌گشت به‌شه‌یلیه‌و، ده‌سخوه‌شى له‌لیان كه‌م ئه‌را وه‌فادارى و دڵسووزى و هه‌وڵه‌یل وه‌رده‌وام و ریڕه‌و ئنسانیان، مێژوو كورده‌یل فه‌یلى ته‌نیا ئه‌وه‌سه‌ ك وه‌ حورمه‌ت و شانازیه‌و كاره‌یل شه‌فه‌ق له‌وه‌رچه‌و بگرێد وه‌ ئه‌وه‌ك هویچ لایه‌نیگ تر له‌ پێكهاتگه‌مان ئى كار شه‌فه‌قه‌ نه‌كردگه‌ تا رووژ ئمڕوو.

عه‌لى حسێن فه‌یلى

ا. ج