كه‌له‌ی مردگيگ ژيان مير سه‌عيد ئالشت كرد!

شفق نيوز

دياره‌ مير سه‌عيد له‌ شوون هه‌ڵوژانن ژيان ئاسايی و فه‌قيری ناسناويگ تر ئه‌رای په‌يا بويه‌و تائيسه‌يش وه‌و ناسناوه‌ ناسرياگه‌، چوينكه‌ دويای وازهاوردنی له‌ میرايه‌تى و هه‌ڵوژانن ڕی ده‌وریشایه‌تى و خوداپه‌رسى ده‌س كرده‌سه‌ قه‌وشه‌رفرووشی وه‌خاتر گوزران و ژيان رووژانه‌ی خوه‌ی خيزانی و هه‌ر وه‌و خاتريشه‌ وه‌"قه‌وشه‌رفرووش"ناسريا.

ئمجا له‌ی باوه‌ته‌و گيو موكريانی ئويشيد: ئى میره‌ ته‌نيا كوڕ و تاقانه‌ى باوگى بویه‌و له‌ناو خوه‌شترین بار و گوزرانيگ ژیاگه‌و ڕووژانه‌يش‌ وه‌گه‌رد وه‌زیره‌یل باوگی خه‌ریك ته‌فری و گه‌شتكردن و گه‌ردین بویه‌و ڕووژیگ له‌ڕووژان ڕیگه‌یان كه‌فته‌سه‌ بان قه‌ورسانیگ و چه‌وى كه‌فته‌سه‌ كه‌له‌‌سه‌ر ئاده‌میزادیگ مردگ ك ته‌نیا هه‌ر سقانه‌گه‌ بویه‌، پرسیار له‌وه‌زیر كردگه‌و وته‌سه‌پی ئه‌یه‌ چه‌س؟ ئه‌ویش وته‌سه‌پى ئه‌یه‌ كه‌له‌ى ئاده‌میزاد مردگیگه‌.

میر ئویشیده‌ وه‌زیر ئایا ئیمه‌یش له‌یوا وه‌پیمان ئه‌ياد و ئاقبه‌تمان له‌يواسه‌؟، وه‌زیريش ئویشید: به‌ڵى گه‌وره‌م هه‌ر ئاده‌میزادیگ بمرید ئه‌یه‌ ئاقبه‌تيه‌و چه‌نه‌ها پاشاو میر و ده‌وڵه‌مه‌نيش ئه‌يه‌ چاره‌نويسيان بويه‌.

ئمجا میر ئویشیده‌ وه‌زیر ئایا منیش مرم؟ ئه‌ویش جواوی ئه‌ياد و ئويشيده‌پی: به‌ڵى هه‌ر وه‌ختى واده‌ى مردند باید مرید، دى ئه‌و كه‌لاك و مه‌سه‌له‌و قسه‌كردنه‌ كاریگه‌رى كرده‌سه‌ بان هویر و باوه‌ڕ میر سه‌عیدو يه‌كسه‌ر ده‌س كرده‌سه‌ گیرستن و گله‌و خواردگه‌ ئه‌را ماڵ و بڕیار داگه‌ واز له ‌میرایه‌تى خوه‌ى بارید.

مير هاوسه‌ره‌گه‌ی خوه‌ى چڕید و ئویشیده‌پى من واز له‌ى ژیان خوه‌شه‌ ئه‌یه‌رم و سه‌ر ئه‌ڵگرم و كه‌فمه‌ ڕى خوداپه‌رسى، چوینكه‌ ناخوازم هه‌ق هويچ كه‌سيگ بایده‌ زگم و زوڵم له‌مه‌ردم بكه‌م، تنیش ئه‌گه‌ر وه‌لما ئه‌یه‌ید بفه‌رماو ئه‌گه‌ریش نایه‌ید و تواناى گوزه‌ركردن ژیان تازه‌ى من نه‌یرید با له‌یه‌كترى جیاوه‌ بویمن.

دی وه‌و جووره‌ میر و هاوسه‌ره‌گه‌ى شوون و ماواى خوه‌یان هیلنه‌جى و ڕوى ئه‌كه‌نه‌ شار فارقین و له‌ورا میر سه‌عید ده‌س ئه‌كاده‌ زه‌مبیل فرووشی وه‌و شيوه‌ ژیان برده‌سه‌ سه‌ر و دویاخریش هه‌ر وه‌نه‌دارى و كه‌مده‌سی له‌و شاره‌ مردگه‌و ماڵئاوايی يه‌كجاری له‌ دونيا كردگه‌.

جه‌ماڵ ئه‌ركه‌زای