راى گشتى له‌كه‌دار مه‌كه‌ن

شفق نيوز

جوور ره‌فتار و هه‌ڵسوكه‌فت و داب و نه‌ریته‌یل، ك سه‌ره‌كیترین چشت له‌وانه‌یش چوینیه‌تى مقه‌یه‌تیكردنه‌ له‌ڕاز خیزان وه‌تایبه‌ت ئه‌و ناكووكى و جیاوازیه‌یله‌ ك له‌ناونى براو خوه‌یشكه‌یل ڕوى ده‌ێد یا له‌ناونى ڕوڵه‌و باوگ و داڵگى.

بیگومان ئه‌و میرات جوانیشه‌ جیواز بوود ئه‌را بازنه‌یگ گه‌وراتر و له‌ئاست بنه‌ماڵه‌یگ  له‌ئامووزاو خاڵوه‌یل و شایه‌ت له‌یه‌یش گه‌وراتر بوود ئه‌را ئاست عه‌شره‌ت. ئیمه‌ گشتمان زانیم ك جیاوازى فره‌یگ دروس بوود له‌ناونى خیزان له‌گشت جه‌هان و شایه‌ت ئى جیاوازیه‌یلیشه‌ په‌ره‌ بسینێد ئه‌را ئاست مه‌ترسیداریگ ، وه‌لى كه‌سه‌یل داناو خاوه‌ن ماریفه‌ت له‌و خیزانه‌یله‌ هه‌وڵ ئه‌وه‌ ده‌ن ئه‌و جیاوازیه‌ نه‌چووده‌ ده‌یشت ماڵه‌گه‌یان و مقه‌یه‌تى له‌ڕاز خیزان خوه‌یان كه‌ن و باس نهێنى خیزان له‌ده‌یشت ناكه‌ن له‌هه‌ر باریگ ، ته‌نانه‌ت له‌وه‌رده‌م قه‌وم و خیش خوه‌یانیش یا له‌ناو مه‌ردم بیگانه‌و ئه‌شره‌ت.

ئاره‌زوو ئه‌وه‌ دیرێم ئه‌گه‌ر له‌ى كاره‌ سه‌ربكه‌فیم و ئه‌و میراته‌ له‌ناو بازنه‌یل فراوانتر مقه‌یه‌تى له‌لیان بكردایم وه‌تایبه‌ت ئه‌وه‌ك په‌یوه‌سه‌ وه‌جیاوازیه‌یل سیاسیمان چ له‌ناونى حزب و فراكسیۆنه‌یل یا له‌ناونى هه‌رێم و بڕیگ له‌لایه‌نه‌یل حكوومه‌ت یه‌كێتى یا له‌ناونى پاریزگایه‌یل و لایه‌نه‌یل تر، ئه‌ویش وه‌جووریگ باوه‌ڕ داشتوود وه‌مقه‌یه‌تیكردن راز ماڵ و خیزانه‌ گه‌وراگه‌مان وه‌تایبه‌ت ئه‌وانه‌ك كه‌فنه‌ سه‌ماكردن له‌بان ئاواز ناكوكیه‌یل و ئه‌وانه‌ك تیر وه‌شنن له‌لاشه‌ى پرووسه‌ى سیاسى یا ره‌سانن و روونامه‌گه‌رى و هه‌میشه‌ هه‌وڵ ئه‌وه‌ ده‌ن نه‌فت بكه‌نه‌ بان ئاگر تا زیاتر بڵیزه‌ بگرێد و گشت پرووسه‌یگ سیاسى بسزنیدو جاریگ تر حوكم دكتاتۆریه‌ت بایده‌و ئه‌را ئى وڵاته‌ ك هیمان خوین و ئه‌سر چه‌و له‌تى چوڕیه‌ێد تاڕووژ ئمڕوو!

له‌یرا دویر له‌و جیاوازى و جه‌نگه‌ قسه‌یله‌ ك ئمڕوو ڕوى ده‌ن، وه‌لى مه‌ردمان فره‌یگ هه‌ر له‌ر باكوور تا باشوور عراق خه‌بات كردن و قوربانى دان له‌وه‌ر خاتر ئازادى و قورتاربوین له‌رژیم سته‌مكار و له‌وه‌ر خاتر بنیاتناین عراق دیموكراسى و یه‌كگرتگ ك گشت مه‌ردم له‌تى یه‌كسان بوون له‌ڕوى هه‌ق و ئه‌ركه‌یل له‌ژیر چه‌تر ئه‌و یاسا ك گشتى به‌شدارى له‌داناینى كردو جوور سه‌رچه‌وه‌و حوكم و ده‌ستوور هه‌میشه‌یى رازى بوین وه‌پى، یه‌یش ماناى ئه‌وه‌ نیه‌ جیاوازى نه‌یاشتویم له‌ناو یه‌كترى، به‌ڵكوو فره‌جار جیاوازى بووده‌ مایه‌ى پیشكه‌فتن زیاتر، ئنجا ئیمه‌یش چوینكه‌ هه‌وڵ ده‌یم و كار كه‌یم بیگومان تویش غه‌ڵه‌ت و جیاوازییش تیه‌یم، وه‌لى وه‌گووره‌ى ئه‌و غه‌ڵه‌ت و جیاوازیه‌یله‌ بایه‌سه‌ له‌بانمان ئه‌وه‌ له‌هویرمان نه‌چوود ك گشتمان هایمنه‌ ناو یه‌ك كه‌شتى و ئه‌و قه‌وڵه‌یله‌ ك دریا ملله‌ت جیوه‌جى بكریه‌ن له‌ڕوى ئنسانى و دیموكراسى و له‌هه‌مان وه‌خت له‌و چشتیله‌ هاوبه‌ش بویمن ك خزمه‌ت ره‌سنێده‌ كیشه‌ بنه‌ڕه‌تیه‌گه‌مان، ك ئه‌ویش بنیاتناین عراقیگ پیشكه‌فتگ و مه‌ده‌نى و دیموكراسیه‌.

ئنجا هه‌رچه‌نى سیاسیه‌یل و حزبه‌یلیان و ئه‌وانه‌كیش ده‌س له‌گه‌نڕه‌فتارى دیرن جیاوازى نیشان بیه‌ن له‌ژیر قوبه‌ى په‌رله‌مان یا شوونه‌یل تر، بیگومان ئه‌و ده‌زگایه‌یله‌ دامه‌زریاگه‌ ئه‌را ئه‌وه‌ك چه‌یڵه‌ له‌تى ئه‌را سه‌رۆكیگ یا حزب سه‌ركرده‌ بكوتێد، به‌ڵكوو له‌سه‌ره‌تاوه‌ باره‌گایگ بوى ئه‌را گوزارش له‌بان هویروڕاى و دید و جیاوازى و ریككه‌فتنه‌یل، هه‌ر له‌وه‌ر خاتر ئه‌وه‌یش دادگاى یه‌كێتى دامه‌زرانیم ئه‌را چاره‌سه‌ر ناونى جیاوازه‌یل ئه‌گه‌ر شكه‌ست خواردن له‌فه‌لسه‌فه‌ى گونجیان، له‌وه‌رجه‌ ئه‌وه‌یش ده‌ستوور هه‌میشه‌یى وڵات دانایم ك هه‌ق گشتلایگمان دابین بكا، هه‌ر له‌وه‌ر ئه‌وه‌یش ئویشیم: ئه‌ى نویسه‌ره‌یل ئازاد و رووژنامه‌نویسه‌یل دڵسووز و ڕه‌ساننكاره‌یل وه‌فادار و گشت ئه‌وانه‌ك قه‌ڵه‌م و شاشه‌و مایكرۆفۆن جوور چه‌ك یا هووكاریگ ئه‌را بنیاتناین تیه‌رنه‌ كار، بیلا هه‌وڵ سه‌قامگیرى و ئاسایش و ئاشتى بیه‌یم و ڕیشگ ترس و توقانن له‌بنا دراریم و له‌كه‌دار ڕاى گشتى نه‌كه‌یم و خوسه‌و كینه‌ت په‌خش نه‌كه‌یم له‌ناونى خوه‌مان و ڕاز خوه‌مان له‌لاى بیگانه‌و ده‌یشت خیزان خوه‌مان باس نه‌كه‌یم تا لایه‌ن سێیم ده‌س خوه‌ى نه‌وه‌شنێد و نه‌فت نه‌كه‌ێده‌ بان ئاگرا. بیلا سیاسیه‌یل جیاواز بوون، وه‌لى ئیوه‌ هه‌وڵ مه‌یه‌ن ئه‌و جیاوازى و ڕازه‌یله‌ بڵاوه‌و بكه‌ین، چوینكه‌ ئیمه‌ گشتمان روڵه‌ى یه‌ك خیزانیم ئه‌ى نویسه‌ر و رووژنامه‌نویس و ره‌ساننكاره‌یل، هه‌ر له‌وه‌ر ئه‌وه‌یش تا تویه‌نیم ده‌سمیه‌تیان بیه‌یم ئه‌را چاره‌سه‌ركردن قه‌یرانه‌یل تا بتویه‌نیم ئاشتى و ئارامى باریمنه‌و.

 

كفاح مه‌حموود كه‌ریم

 

ج