كه‌مایه‌تیه‌یل ڕز یه‌كمن له‌ قوربانیه‌یل عیراق ئمڕوو

شفق نيوز

چوینكه‌ له‌ شوون ته‌عداكردن له‌بان كڵێساى سیده‌ النجاه‌، ئى په‌لاماره‌یله‌ زیاتره‌وبوین، و دویا ته‌عدایش په‌لامارداین باره‌گاى كوومه‌ڵه‌ى ڕووشنهویرى ئاشوور پانیپاڵ بوى له‌ ناوڕاس به‌غدا له‌ لایه‌ن گرووپیگ چه‌كدار و قه‌ڵبوقوڵب كردن كتابخانه‌گه‌ى و وشكانن و شیوانن ئه‌سپاو و غه‌رازه‌یل ناوى.

له‌ى باوه‌ته‌ پاسكال وه‌ردا ژنه‌ چالاك له‌ بوار كوومه‌ڵگاى شارسانى له‌ په‌یوه‌ندییگى وه‌ل ماڵپه‌ڕ شه‌فه‌ق ئویشى: هویچ چاره‌سه‌ریگ خاس و ده‌سپیشخه‌رییگ جددى دانه‌نریاس ئه‌را وسانن ئه‌وه‌گ عیراقیه‌یل وه‌گشتى و تایبه‌تى كه‌مایه‌تیه‌یل تویشى تیه‌ن". و هووكاره‌گه‌یشى ئه‌را ئه‌وه‌ برده‌وه‌ ك:" سسى و كه‌مته‌رخه‌مى له‌ كاركردن و ئه‌داى داموده‌زگایه‌یل ئاسایشى و وه‌تایبه‌تى تووڕ هه‌واڵگرى یا ئستخباراتى ك یه‌كیگ له‌ ئه‌ركه‌گانى ئه‌وه‌سه‌ كاربكه‌ید ئه‌را نه‌هیشتن ڕوى داین ته‌عدا و ئۆپه‌راسیۆنه‌یل تیرۆریستى وه‌رج له‌وه‌گ ڕوى بیه‌ن".

ئه‌وه‌یشه‌ ڕووشنه‌وكرد ك :" كوومه‌ڵه‌ى ئاشوور پانیپال ده‌زگایگ مه‌ده‌نیه‌و په‌یوه‌ندى وه‌ بڵاوكردن كه‌له‌پوور ڕووشنهویرى سریانى دیرید، و هه‌ر له‌ سه‌رده‌م ڕژیم وه‌رینه‌وه‌ تا ئى وه‌خته‌یله‌، و هویچ په‌یوه‌ندییگ وه‌ چشتیگه‌و نه‌یرید ك ناوى مه‌یه‌ و ئه‌و ته‌عدا ك كریابان ئى كوومه‌ڵه‌ هویچ مه‌هانه‌یگ نه‌یرید ته‌نیا ئه‌وه‌ نه‌ود ك سه‌روه‌ تایفه‌ى مه‌سیحیه‌".

له‌ هه‌مان وه‌خت ئه‌دا و كاركردن نوێنه‌ره‌یل مه‌سیحى له‌ ئه‌نجوومه‌ن نوێنه‌ره‌یل عیراق وه‌ كز وه‌سفكرد چوینكه‌" یانه‌ كێشه‌و گیروگرفته‌یل مه‌سیحیه‌یل له‌ ژیر گومه‌زى په‌رله‌مان ده‌رنه‌وڕینه‌" وه‌گووره‌ى قسه‌یلى.

جه‌ختیش له‌بان ئه‌وه‌ كرد ك :"ڕیكخریایه‌یل ناوده‌وڵه‌تى هه‌س داواى دابینكردن مقه‌یه‌تى كردن كه‌ن له‌و ته‌عدا و ئۆپه‌راسیۆنه‌یل تیرۆریستیه‌ ك ده‌ید له‌ مه‌سیحیه‌یل عیراق".

هه‌ر له‌ هه‌مان باوه‌ت په‌یجووریكه‌ر له‌ كاروبار كه‌مایه‌تیه‌یل سعد سلوم له‌ په‌یوه‌ندییگى وه‌ل ماڵپه‌ڕ شه‌فه‌ق ئویشى:"كه‌مایه‌تیه‌گان روى وه‌ڕوى مه‌ترسیه‌یل گه‌ورایگ بوینه‌ له‌ى وه‌خت حازریه‌ و زوورمى ڕووڵه‌یلیان له‌ عیراق كووچكردن" و پیشبینى یا توقع ئه‌وه‌یشه‌كرد ك "ئه‌وانه‌یشه‌ ك مه‌ننه‌سه‌وه‌ وه‌ى زوى كووچ بكه‌ن".

ئه‌وه‌یشه‌ ڕووشنه‌وكرد ك:"هووكار كووچكردن كه‌مایه‌تیه‌یل فره‌س و له‌ نواى گشتیان: نه‌وین ئاسایش و مقه‌یه‌تى كردن ده‌ستوورى و كزى لایه‌ن ته‌شریعى له‌ پاراستن مافه‌یلیان".

ئاماژه‌یش وه‌وه‌دا ك :" عیراق هه‌وه‌جه‌ى ها وه‌ هه‌ڵسیان فكرییگ له‌ هه‌ردوگ لایه‌ن سیاسى و كوومه‌ڵایه‌تى ئه‌را ڕوى وه‌ڕوى بوین ئه‌و مه‌ترسیه‌یله‌ ك تویش كه‌مایه‌تیه‌یل تیه‌ید، ئه‌ویش وه‌ ته‌شریعكردن قانوونه‌یلیگ له‌ په‌رله‌مان ك تایبه‌تمه‌ندیه‌یلیان بنه‌یده‌ وه‌رچه‌و، و له‌ناو مه‌نهه‌جه‌یل په‌روه‌رده‌ باوه‌ته‌یلیگ سه‌باره‌ت وه‌ى كه‌مایه‌تیه‌یله‌ بنوسیه‌ید، تاگه‌ر نه‌وه‌یل نوو بزانن یانه‌ به‌شیگ دانه‌وڕیاین له‌ ڕووڵه‌یل ملله‌ت عیراق".

ئه‌وه‌یشه‌ ڕووشنه‌وكرد ك :" عیراق هه‌وه‌جه‌ى ها وه‌ نوێنه‌رایه‌تى سیاسى  زیاتریگ  ئه‌را كه‌مایه‌تیه‌یل، و وه‌رگردن پۆسته‌یل حكوومى".

ئاماژه‌یش وه‌وه‌دا ك:" عیراقیه‌یل هانه‌ بان ئه‌و باوه‌ڕه‌ ك عیراق وڵات فره‌یى مه‌زه‌وى و دینى و نه‌ته‌وه‌ییه‌، و هێز و قه‌وه‌ته‌گه‌ى له‌ فره‌ییگه‌یه‌وه‌ سه‌رچاوه‌ گرید، و نیه‌تویه‌نن له‌ژیانیگ تاكه‌ بوعد و تاكه‌ ڕووشنهویرى بژیه‌ن، و هه‌ركه‌سیگیش ئه‌وه‌ بتواید، عیراق كه‌یده‌ بیاوانیگ چك و چووڵ".

له‌بان ئه‌وه‌یشه‌ جه‌خت كرد ك :" نه‌وین كه‌مایه‌تى له‌ عیراق و وه‌تایبه‌تى تایفه‌ى مه‌سیحى سه‌ره‌تاى وه‌بیاوان بوین ڕووشنهویرى و ژیاریه‌".

له‌لاى خوه‌یه‌و فه‌رمانده‌ى هه‌واڵگرى یا ئستخبارات داخلیه‌ لیوا حسین كمال له‌ په‌یوه‌ندییگى وه‌ل ماڵپه‌ڕ شه‌فه‌ق ئه‌و ته‌عه‌دا له‌بان كوومه‌ڵه‌ى ئاشوورى مه‌حكوومكرد و ئه‌وه‌یشه‌ ڕووشنه‌وكرد ك :"ئاشووریه‌یل به‌شیگ دانه‌وڕیاین له‌ ملله‌ت عیراق و یه‌كیگن له‌ پیكهاته‌یل ئه‌سڵمه‌ن و دێرین و وه‌رگرى كردن له‌لیان ئه‌رك گشت لایگه‌".

ئاماژه‌یش وه‌وه‌دا ك :"وه‌زاره‌ت داخلیه‌ خه‌ریك ته‌حقیقكردنه‌ ئه‌را ئاشكراكردن ئه‌و په‌لاماره‌ و جیوه‌جیكه‌ره‌یلى".

زیاتریش وت:" ئه‌و ده‌وریه‌یشه‌ ك له‌نزیك ئه‌و شوونه‌ بوى ته‌حقیق وه‌لیه‌و كریه‌ید و خریه‌یده‌ وه‌رده‌م وه‌رپرسیارى ئه‌گه‌ر ئه‌وه‌ دیاردا ك له‌ ئه‌ركه‌یل خوه‌یان كه‌مته‌رخه‌مى كردنه‌".

شایان باسه‌ ك دكتۆر صلاح عبدالرزاق پارێزگار به‌غدا ئه‌وه‌ ئاشكراكرد ك لوجنه‌یگ ته‌حقیقى پیكهاوردیه‌ له‌باوه‌ت ئه‌و ته‌عدا ك كوومه‌ڵه‌ى ئاشوور پانیپال تویشى هات.