كورد له‌ناونی سه‌فه‌ر و گله‌وخواردن..!
شايه‌د كورد ته‌نيا مللـه‌ت بان ئه‌و هه‌ساره بوود ك تا ئيسه ئاشنایه‌تی وه‌ل سه‌قامگیری نه‌يرێ و مينێده مه‌له كووچه‌رییه‌گان! ئه‌چێده كويه‌و گلهو ئه‌خواد، په‌رشوبڵاو ئۆردوگايه‌یل ئيران و توركیا ئه‌دێ و گلهو ئه‌خواد، ئه‌را باشوور عراق دويره‌و خريه‌ێد و گلهو ئه‌خواد، وه‌سواری مه‌رگ ڕه‌سێده ئه‌وروپاو گلهو ئه‌خواد، ئه‌وانه‌يش ك ناتويه‌نن بيه‌نه‌و هه‌میشه هانه هویر گله‌وخواردن و جه‌سه‌یان ها ئێره، وه‌لی روحیان ها ئه‌وره، له‌باوه‌ش نیشتمان مه‌نيه‌سه جی.
وه‌دريژایی مێژوو، نیشتیمان ئيمه هه‌ر له‌بان شه‌پۆله هاروهاجه‌گان بويه‌و ئه‌را ساتێگیش ئارامى وه‌خوه‌یه‌و نه‌یه، وتم كورد مينێده مه‌له كۆوچه‌ریه‌گان، وه‌لی ئه‌و له‌يه‌كچينه‌يله شايه‌د وه‌ته‌واوى له‌جی خوه‌ی نه‌ود، چونكه باڵنده‌گان وه خواست خوه‌یان سه‌فه‌ر كه‌ن و هه‌وه‌جه وه ڤیزاو پاسپۆرت هیچ وڵاتێگ نه‌يرن و لوغم و تێلدڕ كه‌وشه‌نه نه‌فره‌تیه‌گان نيه‌تاسنێده‌يان، وه‌لی كورد كه‌ی وه خواست و ئیراده‌ی خوه‌ی پشت كرديه‌سه نیشتمان و بڕیار سه‌فه‌ر داس..!؟
نه وه‌ئاره‌زووی خوه‌ی په‌نا ئه‌را تفه‌نگ بردو چی ئه‌را كويه‌و نه شه‌یدای ئۆردوگاو خێوه‌تگاگانیش بوى، نه خوازیار بوى له‌ژێر ناو (عائیدون) ناچار بكريه‌ێ له‌سايڕكی داره‌خورما سه‌رخه‌و بشكنێ و له‌جياتى ئاو سازگار شاخ و داخ وڵات خه‌ڕگاو سويه‌ر باشوور بخوه‌ێد یا سوار ئیڤاگان ئه‌نفال بكريه‌ێ و دوياجاریش ئه‌را ئه‌وه‌گ نه‌كه‌فێده دام راوچییه‌يل په‌نا ئه‌را كۆڕه‌و بواد!..
له‌لای تاك په‌رشوبڵاو و ئاواره‌ی كورد مه‌یل ئه‌ڵاجه‌ويگ هه‌س ئه‌را گله‌وخواردن، وه‌شيوه‌یگ باوه‌ڕ نيه‌كه‌م له‌لای مللـه‌ته‌یل تر ئه‌و مه‌یله بوود، كورده‌یل ده‌يشت وڵات هه‌میشه خه‌و وه‌ئه‌وه‌وه دوینن، ئاشتی و ئارامی و سه‌قامگیری ئه‌وره توان، وه‌شيوه‌یگ ك ئاواييگ ئاوه‌دانه‌و بكريه‌ێد، كارخانه‌یگ تازه دروس بكريه‌ێ، پرۆژه‌يگ رێ وبان بچێده بوار جيوه‌جيكردن، كوچگ بنه‌وای نه‌خوه‌شخانه‌یگ دابنريه‌ێ، سه‌عاتێگ كاره‌با زیاێ بكا و خشتێگ زیاتر بخريه‌ێده بان دیوار باڵه‌خانه‌ی وه‌دامه‌زرياگه‌ییكردن حوكمڕانی له‌هه‌رێم، ئه‌وان دڵیان وه‌پی خوه‌ش بوود و نگه‌رانی و نائارامی یان نيه‌مينێ.
ئه‌ڵاجه‌ويه، كوردێگ نيه‌ونید بويشێ ك ئه‌گه‌ر مردم بسزننه‌م و خۆڵه‌كووه‌گه‌ميش بخه‌نه ناو ده‌ریا یا بخه‌نه‌ى ناو شيشه‌یگه‌‌و ئه‌را ئه‌وه‌گ شوون فره داگیر نه‌كا، یا بويشێ: ئێره‌يش هه‌ر خاك خوداس و وه‌ختێگ مردم له‌یه‌كێگ له‌قه‌ورستانه‌يل ئيره خاكم بكه‌ن.
تاك كورد له ده‌يشت وڵات وه‌ختێگ نه‌خوه‌ش ئه‌كه‌فێ، یا وه‌ختێگ وه‌خاتر گه‌ورايی عومرى له دوياسه‌فه‌ر نزیكه‌و ئه‌دێ، یا له‌سه‌ره‌مه‌رگ، دوياجار وه‌سیه‌ت ئه‌كا بوه‌نه‌وه‌ى ئه‌را ئه‌وره(نيشتمان)، ئه‌ی مه‌گه‌ر ئه‌يه خوه‌شه‌ویستی نیشتمان و مه‌یل گله‌وخواردن نییه؟!
ده‌گمه‌نن ئه‌وانه‌گ وه (خه‌یاڵ گله‌وخواردن) سه‌ر ناخه‌نه بان سه‌رین، كوردستانیه‌يل ده‌يشت وڵات چنه هویره‌و كه‌ن، ئه‌ی له‌وره، له‌ناو وه‌ڵات، چوين ته‌ماشای ئه‌و كائنه‌يله‌‌و وه چ چه‌وێگ ته‌ماشایان ئه‌كريه؟ ئایا له‌پرۆژه‌ی حوكمڕانی هه‌رێم كوردستان كه‌فتنه‌سه كوو..؟ ئایا پرس ئه‌و سه‌رمایه‌ى به‌شه‌ری گه‌ورا ته‌نیا جارێگیش بويه‌سه ميوان گرده‌وبوين و گفتوگووه‌یل پارله‌مان..؟ له‌عیراق وه‌زاره‌تێگ تایبه‌ت وه‌ناو (وزارة الهجرة و المهجرين) هه‌س و وه‌دوياياچوين ئه‌را كه‌یس ئاواره‌يل ئه‌كا ولێكۆڵينه‌وه له‌باره‌ی كێشه‌و گرفته‌یليان ئه‌كا‌و له‌وه‌خت خواست و هه‌وه‌جه ئاسانكاری ئه‌رايان ئه‌كا، وه‌لی له‌كوردستان وه‌زاره‌تێگ تایبه‌ت، ده‌زگاو دامه‌زرياگيگ په‌یوه‌ندیدار وه‌كوردستانیه‌یل ده‌يشت وڵات وجوود نه‌يرێ، ئه‌را ئه‌وه‌گ له‌وه‌خت سه‌ردان یا گله‌وخواردن له‌رێ ئه‌و دامه‌زرياگه پرۆژه‌و پێشنیارو داواكاریه‌یليان بخه‌نه وه‌رده‌م لایه‌ن په‌یوه‌ندیدار و هس وه‌بێ كه‌سی و (هه‌میشه ئاواره‌یی) نه‌كه‌ن!..
كورستانیه‌یل ده‌يشت وڵات گلهو بخوه‌ن یا نه، له‌ێره بوون یا له‌وره، به‌شێگ دانه‌وڕياگ نیشتیمانه‌گه‌ی خوه‌یانن و هسيگ قويل نه‌ته‌وه‌یی داگیریان كردگه و له‌لیان جیاوه نادێ، له‌ئاست هه‌ر چوار پارچه‌گه‌يش وزه‌و تواناى فره‌يگ له‌بواره جیاجیاگان ديرن و ئاماده‌ن بيه‌نه‌و و له باڵه‌خانه‌ی حوكمڕانی وڵاته‌گه‌ی خوه‌یان به‌شداری بكه‌ن و رۆڵ كاراو ئه‌رێنی بوينن، وه‌لی داموده‌زگايه‌یل ئه‌وره چه‌نيگ ئه‌را ئه‌و مه‌سه‌له ئاماده‌یی ديرن!
ئایا وه‌خت ئه‌وه نه‌هاتگه ده‌سه‌ڵات خۆزماڵی وه‌جدی هویر له‌پرس ئه‌و سه‌رمایه‌ى به‌شه‌ری گه‌ورا بكاده‌و و جوور به‌شێگ ئۆرگانیك و دانه‌وڕياگ له مه‌سه‌له‌ی ره‌وای مللـه‌ته‌گه‌مان ته‌ماشای بكا..؟!
قادر وه‌رتی
