له‌ چه‌وه‌ڕێكردن كۆنگره‌ی نیشتمانی

شفق نيوز

وه‌خاتر ناكووكیه‌يل سیاسی و مه‌زهه‌بی ناونى لایه‌نه‌ سیاسیه‌گانیش سه‌رجه‌م ئه‌و پرۆژه‌يل خاسسازی و نیشتمانى ك‌ پێشكه‌ش كريانه‌ و لایه‌نه‌گان له‌بانى رێككه‌فتنه‌ له‌ دوياجار شكست هاوردگه‌ و دوواره‌ ئاڵۆزی دويره‌وكه‌فتن‌ له‌ناونى لایه‌نه‌گان دروس بويه‌,ئه‌يه‌يش بويه‌سه‌ مه‌مه‌ر په‌ككه‌فتن پرۆسه‌ی خزمه‌تگوزاری و بونیاتناين وڵات.

ده‌سوه‌رداين له‌ كاروبار عێراق له‌لایه‌ن وڵاته‌یل هاوسا و خوه‌یكيشاننه‌وه‌ی هێزه‌یل ئه‌مریكا له‌ عێراق كێشه‌یل قويلتر كردگه‌.سه‌ربار ئه‌يانه‌يش نزیكه‌وبوين شۆڕشه‌یل به‌هار عه‌ره‌بی له‌ سنووره‌یل عێراق وه‌شێوه‌یگ ئاشكرا بێ متمانه‌یی و نادڵنیایی له‌ ناونى لایه‌نه ‌سیاسی و مه‌زهه‌بیه‌گان دیاره‌, وه‌تایبه‌ت له‌ناونی سوننه‌ و شیعه‌ وه‌رده‌وام هانه‌ كه‌مين یه‌كتری,وه‌رانوه‌ر وه‌ كوردیش وه‌هه‌ردوو لایه‌ن هه‌ر خه‌ریك پیلان و په‌راوێزخستن كوردن, سه‌ره‌ڕای ئه‌و هه‌مگه‌ دژایه‌تی كردن ئاشكراو شارياگه‌ ك وه‌رانوه‌ر وه‌ كورد ئه‌كريه‌ێ هه‌رچه‌ن كورد هه‌میشه‌ له‌ هه‌وڵ و ته‌قالای رێكخستنه‌وه‌ و ئاشتكردنه‌وه‌ی لایه‌نه‌ ناكووكه‌گان بويه‌, ئه‌ى هه‌ڵوێسته‌يليشه‌‌ فره‌جار بويه‌سه‌ جى ره‌خنه‌ له‌ليگرتن له‌ سه‌ركردایه‌تی سیاسی كورد له‌لایه‌ن مه‌ردم كوردستان. گشت ئه‌و كێشه‌يله‌ ك‌ له‌ گوزه‌يشته‌ و ئيسه‌ هه‌س‌ وه‌تایبه‌تی دويای ره‌سانن فیدراڵیه‌ت هه‌ردوو پارێزگای (سه‌ڵاحدین و دیاله‌)  و ده‌رچوين بڕیار ده‌سگیر كردن تارق هاشمی باردوخ عێراق وه‌ره‌و خراوتر هه‌نگاو نا,وه‌ هه‌ميش بایكۆتكردن گرده‌وبوين ئه‌نجوومه‌ن نوێنه‌ره‌يل و وه‌زیره‌يل له‌ لایه‌ن لیست عێراقیه‌ ناكووكیه‌گان زیاتر قويله‌و كردگه‌, له‌دويایين لێدوانیش لیست عێراقیه‌ ئعلان كردگه‌ ك‌ یا بايه‌د سه‌رۆك حكوومه‌ت ئاڵشته‌و بوود یا ئه‌و حكوومه‌ته‌ هه‌ڵبوه‌شيه‌ێده‌و‌, لایه‌نگره‌یل لیست هاوپه‌یمانی نیشتمانيیش مكوڕن له‌بان دادگایی كردن تارق هاشمی له‌ به‌غداد, وه‌و مانا ك قه‌یرانه‌گه‌ قويلتره‌ له‌وه‌گ ناكووكه‌يل وه‌ ئاسانی بڕه‌سنه‌ چاره‌سه‌رێگ كووتایی, وه‌يخاتره‌ سه‌رجه‌م ئه‌و كێشه‌يله‌ و چه‌نه‌ها كێشه‌ی تر كارگێڕی له‌ وه‌رِێه‌وبردن وڵات چنه‌ كرد ك‌ سه‌رۆك (مام جه‌لال) پێشنیار به‌سان كۆنگره‌یگ نیشتمانی بكا و گشت لایه‌نه‌ سیاسیه‌گانیش هانه‌ بان ئی باوه‌ڕه‌ ك‌ ئه‌و پێشنیار تاڵه‌بانیه‌ به‌شێگ له‌كێشه‌يله‌گه‌ چاره‌سه‌ر ئه‌كا.

ئيسه‌ گشت لایه‌ن و هێزه‌يل سیاسی عێراق خه‌ريك خوه‌ی ئاماده‌كردنن ئه‌را به‌سان كۆنگره‌ی نیشتمانی ك‌ بڕیاره‌ وه‌ى نزیكه‌يله‌ بوه‌سريه‌ێ, ئه‌را يه‌يش هه‌ر لایه‌نيگ پرۆژه‌ و به‌رنامه‌ی خوه‌ی ديرى‌.

له‌دويايین گرده‌وبوينه‌یل په‌رله‌مان عێراق یه‌ك هه‌ڵوێستی و هاوڕایی لیسته‌ كوردیه‌گان جووش و خرووشێگ تر داره‌و‌ وه‌ سه‌ركردایه‌تی سیاسی كورد, ئه‌يه‌يش ئه‌دێده‌ بنه‌مایگ خاس ئه‌را ئه‌وه‌گ كورد وه‌یه‌ك پرۆژه‌ی وه‌هێز و یه‌كگرتگ به‌شداری ئه‌و كۆنگره‌‌ بكا و قورسایی و سه‌نگ خوه‌ی نيشان بياد و ئه‌و په‌یاميشه‌ بڕه‌سنێده‌ لایه‌نه‌يل عه‌ره‌بی ك‌ وه‌بێ كورد پرۆسه‌ی سیاسی عێراق شكست ئه‌يه‌رێ و بايه‌د پابه‌ند ڕێككه‌فتنه‌يل و ده‌ستوور عێراق بوون.

 

جه‌عفه‌ر جه‌وهه‌ر خدر