ئه‌وان بزركنێ و ئیمه‌ شه‌رمه‌زار

شفق نيوز


یه‌ له‌ فه‌رهه‌نگ  خه‌م و  فه‌رهه‌نگ  خوه‌شى ژیان ئیمه‌ جى نه‌كه‌فتگه‌ ك  وه‌بان گشت كیشه‌یل و مایوسیه‌یل بایه‌د كار بكه‌یمن ، ت بویشى ئه‌وانه‌ى ك هانه‌ رز چه‌وه‌رێ هیمان ده‌س وه‌ نزاى ئه‌و ئومیده‌  بوون  ك له‌ ژیر ئى خووڵه‌كووه‌  بلێسه‌ى ئاره‌زووێگ  چه‌و واز بكا  وه‌ شانه‌ى سروه‌ێگ  ئى وڵات هشگ  ئه‌ڵاتگه‌ له‌  ده‌س بى خه‌وه‌رى و فه‌راموشیه‌یلمان نه‌جات بیاد ؟! وه‌رژه‌یه‌ و تا ئیرنه‌ نه‌شنه‌فتمه‌  ك داراێگ  جامێگ  ئاو بیاده‌ ده‌س ئى فه‌رهه‌نگ  تیه‌نى و میه‌نى وه‌ر  خور سزیاگ  لا خوارگ كوردستان ك بیكه‌س و  پا پیا  له‌ بیاوانه‌یل كه‌فتیه‌سه‌ رێ.
نه‌شنه‌فته‌ و نه‌دیمه‌  شاعرێگ  یا نویسه‌رێگ  ئى میلكانه‌ چاپ دوباره‌ و سێ باره‌ى كتاوه‌یلى  تیوڵ به‌ختى  ماچ بكا و ده‌نگ   خوه‌شى ئه‌ڵالێ!! ئویشنه‌مان   گیان خوه‌دان ،  وه‌خت  خوه‌دان، دارو نه‌دار  خوه‌دان بسوزنن تا  له‌ى وڵات هه‌ڵه‌ت شعرو  و له‌ى ده‌یشت هامارى تاریخه‌ ،  رووح باپیره‌یلمان شاد بوون  و  له‌ ناو قه‌ور بیكه‌سى ئارام بخه‌فن !! فره‌ ساڵه‌ برێ  جایڵ و جوان سه‌رخوه‌ش  وه‌ بى نام ونشان،  وه‌ هممه‌ت به‌رزو بڵن مانیشت و كه‌ور كویه‌و قه‌سه‌م سه‌خت بیستون و ناز حه‌مرین، له‌ى دیم و ئه‌و دیم سنوور و مه‌رز ، جه‌م بسانه‌ تا  وه‌ تیشگ فه‌رهاد له‌ كویه‌ى خه‌فڵه‌ت،  ئى شیوه‌ زارشیرین زوانه‌ و ئى فه‌رهه‌نگو كه‌لتوور نازداره‌و  ئى  تاریخ خاك له‌ بان نیشتگه‌  بتاشن ، تا ئى په‌یامه‌ بره‌سنن؛  هۆ مه‌ردمه‌گه‌ ؛ شوورش كه‌ربه‌لا  لێره‌ چه‌و واز  كردگه‌ ! هه‌م له‌ نوو  په‌یمان وه‌ ده‌سه‌یل بى په‌یمان  و  وه‌فا خوازه‌یل  بى وه‌فا  رێ له‌ باوه‌رداره‌یل ئى فه‌رهنگو زوانه‌  به‌سانه‌!!    به‌ش وه‌حاڵ خومان فره‌ چه‌وه‌رێ كردیمن، هاناى فره‌ كه‌سدایمن و  تویه‌م ئومید فره‌ێگ  وه‌شانیمن و دوباجار جام چه‌وه‌رێَمان پڕ بى وه‌لى هممه‌ت ئه‌وانه‌ نه‌هاته‌ خه‌وه‌ر ك   هممه‌تمان باڵه‌و دان!
ئه‌و وه‌خته‌یله‌ كه‌م نین ك  مه‌ردم دویرو نزیك له‌  سه‌ردان فه‌رهه‌نگو زوانمان شۆك بینه‌و بزركیانه‌ و  ئیمه‌ شه‌رمه‌زار  !! چوین   ئى میلكان  قه‌شه‌نگه‌   چنه‌ فه‌قیره‌   باوه‌ت  جى شانازى  كه‌م دیرێ!!
فره‌ وه‌خته‌ له‌وه‌ ره‌سیمنه‌سه‌و   ك ئه‌وه‌ ك فه‌رهه‌نگو كه‌لتوور ملله‌ته‌یل  زینگ  هیلێ ته‌نیا ده‌وڵه‌ته‌یل نیه‌ ك ئیمه‌  ملله‌تێگ بى ده‌وڵه‌تیمن، یه‌ڵكم وه‌رژه‌ ده‌وڵه‌ت  یه‌ كار و واجب  گشت مه‌ردمه‌ و بایه‌د شان وه‌ شان حكومه‌ته‌یل له‌تى به‌شدارى بكه‌ن !! ئویشن  (زه‌كات)  ناونى داراو نه‌دار كه‌م ئه‌كا و (خومس) شیعه‌ نه‌جات ئه‌یاد،  وه‌لى نازانیمن چه‌ تویه‌نێ  خاوه‌ن ئى فه‌رهه‌نگو كه‌لتوور بى خاوه‌نه‌  له‌  خوارگ كوردستان خه‌و زڕ  بكا؟!  بیلا له‌ مه‌ردم تر هوكاره‌ بویمن جوور په‌یمانگاى باڵاى موسیقا له‌ موسكو ك  وه‌رژه‌ 150 ساڵ وه‌ كومه‌ك و هاوكارى چه‌ن ده‌وڵه‌مه‌نێگ  رووسى مه‌زریاو له‌و رووژه‌ تا ئمروو ، فیشتر له‌ 200  هونه‌رمه‌ند ناودار پیشكه‌ش وه‌ جهان كردگه‌.  دى بیلا نه‌یشیمن چوین ملله‌تێگ  رزگار ئه‌كه‌یمن له‌ وه‌ختێگ  توانا نێریمن شعره‌یل شاعرێگ  له‌ مردن نه‌جات بیه‌یمن !!