كویزه‌گه‌ نه‌شكیا

شفق نيوز

ئۆپه‌راسیۆن دجله‌و ئه‌و ئه‌قڵیه‌ته‌ ك پشتگیر ئه‌و  ئۆپه‌راسیۆنه‌سه‌.

 

خه‌ریك بوى كویزه‌ى ئاینده‌ى هاوبه‌ش بشكیه‌یدو  ئه‌را یه‌كجارى عراق بووده‌ دوزه‌خه‌گه‌ى جاران و ده‌وران حكوومه‌ته‌یل شۆفێنى و دى چشتیگ نه‌مینید وه‌ ناو عراق تازه‌.

 

ئه‌گه‌ر په‌لامار سه‌ربازى روى بیاتاد، ئه‌وه‌ گرینگ نه‌وى ك گورز له‌لى دریاو زه‌ره‌د مه‌یدانى كه‌فته‌وه‌رى، چوینكه‌ بنه‌ڕه‌ت مه‌سه‌له‌گه‌ ئه‌وه‌سه‌ دڵ هه‌ردوگلا وه‌ تایبه‌ت دڵ كورد له‌یوا شكیا مه‌گه‌ر ده‌ورانیگ تر چشتیگ بقه‌ومیه‌ید دڵ شكیاگ خاسه‌و بكا.

 

نزیكه‌ى 10 ساڵه‌ كورد وه‌ل عراقیه‌یل دیموكراسیخواز ره‌نج فه‌رهاد ده‌ن و كوچگ     بیستوین تاشن و سه‌رمایه‌ ئه‌ڕاى كه‌ڵه‌كه‌ كه‌ن. ئى هه‌وڵ و ته‌قلا له‌ وه‌هار 2003 له‌ 9/3/2003 له‌وه‌خت ئازادكردن عراق ده‌س وه‌پیكردو له‌ وه‌هار ئاینده‌ بووده‌ 10 ساڵ ته‌واو له‌ ره‌نج و ته‌قلاداین.

 

ئه‌وه‌ بوى 10 ساڵ وه‌ 10 رووژ دریا واوه‌و له‌یه‌یش بازنه‌گه‌ى مالكى زوورمینه‌ كه‌فیده‌ به‌شى، شایه‌ت به‌شه‌گه‌ى كوردستان هه‌ر ئه‌وه‌نه‌ى(17%)ه‌گه‌ى بوود. ئایا چه‌ بكه‌یم ئه‌را خاسه‌وكردن باره‌گه‌و ئه‌را مقه‌یه‌تى له‌ مه‌سه‌له‌ى كورد و كوردستان؟

 

وه‌رجه‌ گشت چشتیگ بایه‌سه‌ كورد پایه‌یل خوه‌ى له‌ حكوومه‌ت عراق بته‌و بكاو نه‌فه‌وتنیده‌ى ، چوینكه‌ نه‌یاره‌یل خوازیارن ئیمه‌ ئه‌و ده‌سكه‌له‌یله‌ له‌ ده‌س بیه‌یم و له‌ كیشمه‌كیش سیاسى هویچ له‌وه‌رده‌س نه‌یاشتویم.

 

ئمجا بایه‌سه‌ وتار ئاشتیخواز سیاسى تیكه‌ڵ بكه‌یم وه‌ل وتار هه‌قه‌یل ره‌وا، وه‌ جووریگ ك نه‌ له‌ترس هه‌ڕه‌شه‌یش هه‌قه‌یل ره‌وا بشاریمنه‌وه‌و  نه‌ زووان داواكاریمانیش له‌یوا زبر بوود دووسه‌یلمان بتارنید و مه‌هانه‌ به‌یده‌ ده‌س نه‌یاره‌یلمان تا مه‌ردمان خوه‌یان له‌ دژمان هان بیه‌ن، به‌ڵكوو بایه‌سه‌ وتار هه‌قه‌یلمان ئاشكراو زووانه‌گه‌یشى كه‌مه‌نكیش بوود.

 

وه‌ل ئه‌وه‌یشا بایه‌سه‌ بزانیم ئى گرژیه‌ چه‌نیگ قویل بوود و چه‌نیگیش وه‌خت بووه‌ید هه‌ر ته‌واو بوود. گشت ته‌نگییگ كووتایه‌گه‌ى ده‌رفه‌ته‌ ئه‌را وه‌دیكردن كه‌لین و كه‌م و كوڕیه‌یل و داناین به‌رنامه‌ ئه‌را قوناغ ئاینده‌، ك یه‌یش به‌شه‌گه‌ى كورده‌، ئنجا به‌شه‌گه‌ى هاوبه‌شه‌ عه‌ره‌به‌یلیش خوه‌یان زانن.

 

دى ئى جاره‌ ئه‌وه‌ بوى كویزه‌گه‌ نه‌شكیا، ك شایه‌ت یه‌یش دویا ده‌رفه‌ت بوود( ك یه‌یش خودا خوه‌ى زانێد).

 

ستران عه‌بدوڵڵا

ج. ا  ‌