ئیزگه‌ى"مه‌حمود قه‌جه‌ر"

شفق نيوز

 

كه‌سه‌یلیگ فریه‌یگ هه‌ن خوه‌زگ وه‌ ژیان كویه‌ن كورده‌وارى و یادگاریه‌یل ئه‌وساى ئه‌و شووڕش خه‌باتكارى پڕ وه‌دڵ و گیانه‌ خوازن له‌وه‌ختیگ هیز پێشمه‌رگه‌ وه‌ گشت باوه‌ڕیگه‌و هه‌وڵ بى وچان دیادو لویله‌ى تفه‌نگ و شریقه‌ى بڕنه‌و دڵه‌رزه‌ هاورده‌ هیز دوشمن و داگیركار.

ئمجا له‌وه‌ختیگ ئیزگه‌ى ده‌نگ كوردستان له‌ ناوچه‌ى گه‌رمه‌سیر دامه‌زریاو ده‌نگه‌ خوه‌ش و زوڵاڵه‌گه‌ى یاوه‌ر نامیق و كاك خه‌لیل و بێژه‌ره‌یل تر له‌ پاڵ چه‌م"قوره‌توو"و له‌ ئاوایى"مه‌حمود قه‌جه‌ر"ه‌و ئومید و رووشنایى و جموجويل فيشتر خستیاده‌ مه‌ردم كورد ئه‌را ئه‌وه‌گ فيشتر هوير له‌ مه‌سه‌له‌ی ئازادی و وه‌رگری بكه‌ن، دى ئاشكرا بوی ك شووڕش كورد و خه‌بات چه‌ن ساڵه‌ى وه‌زاى نیه‌چوودو هه‌ر رووژیگ تیه‌ید وه‌ ئه‌زره‌ت بڕه‌سیم و له‌ ساى ئازادى بژیه‌یم.

له‌ساڵ 1974 ئیزگه‌یگ له‌ ناوچه‌ى گه‌رمه‌سیر خانه‌قین واز كریا وه‌ناو ئیزگه‌ى"مه‌حمود قه‌جه‌ر"له‌ نزیك كه‌ل بێشكان و باوه‌هاى، وه‌رپرس كاروبار ره‌سانن ئه‌و ئیزگه‌"عه‌بدولوه‌هاب تاڵه‌بانى"بوى و وه‌رپرس هونه‌ریه‌گه‌یشى ئه‌ندازیاریگ بوى وه‌ناو "كاك ناسح ".

له‌ڕاسى ئى ئیزگه‌ دڵخوه‌شییگ بوى ئه‌را مه‌ردم ده‌ورگرد ناوچه‌گه‌ ك وه‌ هه‌ردوگ زووان كوردى و عه‌ره‌بى هه‌واڵه‌یل و به‌رنامه‌یلى بڵاو كردیاد، هه‌ر وه‌و خاتریشه‌ هیزیگ له‌ پێشمه‌رگه‌ى"به‌مۆ" تایبه‌ت كریا ئه‌را مقه‌یه‌تیكردن و پاسه‌وانى ئیزگه‌ى مه‌حمود قه‌جه‌ر، چوینكه‌ فریه‌ نزیك بوى له‌ مه‌رز ئیران وه‌تایبه‌ت له‌ قه‌سر شیرین و سه‌رپیه‌ڵ زه‌هاو.

ئه‌وسا ناوچه‌ى خانه‌قین له‌ روى ریكخستن و پارتایه‌تیه‌و سه‌ر وه‌"لق په‌نج پارت دیموكرات كوردستان"بوى، ئمجا دامه‌زرانن ئى ئیزگه‌ له‌ مه‌حمود قه‌جه‌ر سه‌ر وه‌ ناحیه‌ى قۆره‌توو فیشتر تویڕه‌ى دوشمن كرد ك له‌ هه‌ر ده‌رفه‌تیگ زه‌فه‌ر له‌ خه‌ڵك ناوچه‌گه‌ باریدو تووپواران ئاوایه‌یلیان بكا، وه‌لى جى داخه‌ ئه‌و ئیزگه‌ى دڵخوه‌شه‌كه‌ره‌ عومر كه‌میگ داشت و تیه‌نگى دڵه‌ كورده‌ ماڵه‌یل وه‌ تواوى وه‌پى نه‌شكیاو كاروان نه‌ڕه‌سیه‌ مه‌نزڵ و سه‌رله‌نوو دویاى سه‌رنه‌گرتن ریككه‌فتننامه‌ى ئازار مه‌ردم كوردستان جاریگ تر ئاواره‌و ده‌روه‌ده‌ر بوین و پلانه‌ سیه‌گه‌ى جه‌زایر نه‌یشت خه‌و كورده‌یل بایده‌ دى و ئاوایى مه‌حمود قه‌جه‌ریش جوور ئاوایه‌یل تر كوردستان كه‌فته‌ وه‌ر كاولكارى داگیركه‌ر و ئه‌و ئیزگه‌ى كوردییشه‌ جوانه‌مه‌رگ كریا.

جه‌ماڵ ئه‌ركه‌وازى