پيری يا نه‌مه‌ندن ئه‌رك؟

شفق نيوز

ئيمه‌ هه‌ر وه‌ختی ئه‌ركمان نه‌مه‌ند ك رووژانه‌ی ئه‌نجامی بيه‌يم، دی ئه‌و وه‌خته‌ مه‌ترسی پيربوين راسكانی ها وه‌رده‌ممان. جوور ئه‌وه‌ك زانيم مه‌ژگ هه‌ميشه‌ هه‌وه‌جه‌ وه‌ ئه‌وه‌ ديريد ك رووژانه‌ چه‌ن ئه‌ركيگ جيوه‌جی بكا ئه‌را ئه‌وه‌ك هس وه‌ گرينگی خوه‌مان و وجوود نه‌خشيگ بكه‌يم له‌ ژيانمان، ئمجا جوور ئه‌وه‌ك چوين مناڵ رووژانه‌ هه‌وه‌جه‌ وه‌ چه‌نه‌ها ئه‌رك ديريد ك وه‌پی بسپاريه‌يد و ئه‌نجامی بيه‌يد ئه‌را ئه‌وه‌ك بدێده‌ هووكاريگ ئه‌را گه‌شه‌كردن مه‌ژگ و كه‌سايه‌تی خوه‌ی و باوه‌ڕ وه‌ وجوود خوه‌ی بته‌وتر بدێ، هه‌ر وه‌و شيوه‌يشه‌ ئاده‌ميزاد له‌ گشت قوناغه‌يل تر ژيانی هه‌وه‌جه‌ وه‌ جيوه‌جيكردن ئه‌ركه‌يل ديريد.

له‌ شيواز ژيانيگ تازه‌ ك چه‌نه‌ها ساڵه‌ له‌ ئۆرپاو له‌ وڵاته‌يل تر پيشكه‌فتگ كار ئه‌رای كرياگه‌، ئاده‌ميزاد وه‌ساڵاچگ وه‌ جووشه‌ ئه‌را ئه‌نجامداين چالاكی و رووژانه‌ هه‌وڵ ئه‌وه‌ ئه‌ياد ئه‌رك بويچگ يا گه‌ورايگ داشتوود چ ديده‌ن ره‌فيقه‌يلی يا كاركردن له‌ باخ ماڵه‌گه‌ی يا چشت سه‌ندن يا به‌شداريكردن له‌ ريكخرياگيگ بكا، ك گشت ئه‌يانه‌ كه‌م تا فريه‌ خانه‌يل مه‌ژگ چالاكه‌و ئه‌كه‌ن و هويری له‌ژيان و مردن خاستره‌و ئه‌كا.

فريه‌يگ له‌وانه‌ ك كيشه‌ يا ئه‌ركيگ نه‌يرن، رووژانه‌ هاوكاری ريكخرياگ و سه‌نته‌ر و ئه‌و شوونه‌يله‌ ئه‌كه‌ن ك ئه‌وان ئه‌تويه‌نن ئه‌زموون خوه‌يان له‌ورا باس بكه‌ن و نه‌ف بڕه‌سننه‌ كومه‌ڵگا، ك فريه‌جاريش ئی كاره‌ وه‌بی هويچ به‌خشيش يا مووچه‌يگ ئه‌كريه‌يد.

هه‌ر له‌وه‌ر ئه‌وه‌يش كه‌سيگ خانه‌نشين ك وه‌و كاره‌ بڕيگ هاوكاری پيشكه‌ش ئه‌كاده‌ كومه‌ڵگا گرينگه‌ له‌لای ك بزانيد وه‌و كاره‌يله‌ كه‌سه‌يليگ نه‌ف وه‌رئه‌گرن و نه‌خشيگ ديريد، ك يه‌يش مانايگ ئه‌ياده‌ ژيان له‌لای وه‌ساڵاچگه‌يل و هس ئاسووده‌يی و خوه‌شگوزه‌ری له‌لای فيشتر ئه‌كا.

جوور ئه‌وه‌ك زانيم ئاده‌ميزاد له‌ خوه‌شی و ئاسووده‌يی كه‌متر نه‌خوه‌ش ئه‌كه‌فيد و وه‌رگری جه‌سه‌يشی بته‌وتر و عومريشی دريژتر ئه‌دێ، مانای ئه‌وه‌سه‌ با گشتمان هانده‌ر پيره‌يلمان بويم ك شان وه‌شان جايه‌ڵ جوانه‌يل له‌كار بوون و نه‌خشيان وه‌زای نه‌چێد ئه‌را ئه‌وه‌ك مه‌ژگيان له‌ چالاكی نه‌وسيه‌يد و باوگ و داڵگه‌يلمان له‌و عومر كه‌مه‌ زوی نه‌يلنه‌مانه‌ جی.

عه‌بدوڵڵا ته‌وفيق

ج . أ