سێف‌ مێخه‌كڕێژ له‌‌جیاتى ڤالانتاین

شفق نيوز

له‌‌ ناو كورده‌‌وارى باو بویه‌‌‌ و وه‌‌خت خوه‌‌ى له‌‌ ناوچه‌‌ى موكریان جوور نیشانداین خوه‌‌شه‌‌ویسى ئه‌‌را دووس له‌‌ ناونى عاشقه‌‌یل دروسكریاگه‌‌، فره‌‌جاریش ئه‌‌و عاشقه‌‌یله‌‌ وه‌‌خاتر نه‌‌ڕه‌‌سینیان وه‌‌یه‌‌ك ئه‌‌ى سێفه‌‌ جوور یادگارى ئه‌‌را یه‌‌كترى دروس كردنه‌‌، چوینكه‌‌ وه‌‌مێخه‌‌ككردن سێف عومر دریژیگ ده‌‌ێده‌پى، ئه‌‌و سێفه‌‌ هه‌‌مان سێف سروشتیه‌‌، وه‌‌لى وه‌‌ختیگ ك‌ مێخه‌كڕێژ ‌كریه‌‌ێ، بیس ڕووژ تامانگیگ وه‌‌پى چوود تا وشكه‌‌و ‌بو‌ود‌، وه‌‌ختیگیش وشكه‌‌و بوى‌، وه‌‌ ده‌‌یان ‌و سه‌‌دان ساڵ جوور خوه‌‌ی ‌مینێده‌‌ى‌ و له‌‌لایگتریش له‌‌ ئاكام تێكه‌‌ڵبوین بوو خوه‌‌ش سێفه‌‌گه‌‌ وه‌‌ل عه‌‌تر مێخه‌كه‌‌گه‌‌ بوو فره‌‌خوه‌‌شیگ له‌‌لیان تیه‌‌ێگه‌‌دى ك یادگارییه‌‌یل یار خه‌ێده‌‌و هویر دووس.

 

له‌‌باره‌ى ناو ئه‌‌و ڕووژه‌‌‌ ك‌ وه‌ جه‌‌ژن سێف مێخه‌كڕێژ ناونریاس‌، له‌‌ سه‌رده‌‌مه‌‌یل كویه‌‌ن له‌‌فره‌‌تر مه‌‌ته‌ڵه‌یل عاشقانه‌‌ وه‌‌ختایگ دویه‌‌تیگ دووس كوڕیگ بیاشتاد و نه‌‌تویه‌‌نستیاد گوزارشت له‌‌و هس و سووزه‌‌ بكردیاتاد په‌‌نا بردیه‌‌سه‌ڕا سێفیگ و له‌‌شوون مێخه‌كڕێژكردنى ئه‌‌را یاره‌‌گه‌‌ى كلى كردگه‌‌ جوور ئاماژه‌یگ ئه‌را نیشانداین خوه‌‌شه‌‌ویسى، له‌‌حاڵه‌‌تیگتریش وه‌‌ختیگ ئه‌‌و دو دو‌وسه‌‌ له‌‌یه‌‌كتر تووریانه‌‌ هه‌‌ر له‌ڕێ پێشكه‌‌شكردن سێف مێخه‌كڕێژ‌ جوور ئاماژه‌‌یگ ئه‌‌را ئاشتى و ئاشته‌وبوین‌ گوزارشت له‌‌لیكردنه‌،‌ وه‌‌یخاتره‌‌ له‌‌وه‌‌ر ڕووشنایى ئه‌‌و رویداگه‌‌یله‌‌ ئه‌‌را زینگه‌‌وكردن ئه‌‌و شێواز‌ جوان نیشانداین خوه‌‌شه‌‌ویسى و دووسداشتنه‌‌ ئه‌و ناوه‌‌ ئه‌‌را ئه‌‌و رووژه‌‌ هه‌‌ڵوژاننه‌‌. سێف مێخه‌كڕێژ چه‌‌مكیگ ڕووژهه‌‌ڵاتیه‌‌ و وه‌‌گوره‌ى چه‌‌ن لێكۆلینه‌وه‌‌ و شیه‌‌وكردنیگ مێژوویى ك له‌‌باره‌ى ئه‌‌و چه‌مكه‌‌ ئه‌‌نجام دریاس سێف مێخه‌كڕێژ له‌‌ جه‌‌ژن ڤالانتاین ك نه‌‌ریتیگ ڕووژئاوییه‌‌ كویه‌‌نتره‌‌ و مێژووه‌‌گه‌ى ئه‌‌را سه‌رده‌‌م زه‌‌رده‌‌شتیه‌‌یل گله‌‌وخوه‌‌ێد؛ وه‌‌یخاتره‌‌ جوور كلتووریگ و مێژوویگ هه‌‌قه‌‌ شانازى وه‌‌وه‌‌ بكه‌‌یمن ك‌ ملله‌‌ته‌‌یل رووژهه‌‌ڵات وه‌‌تایبه‌‌ت ئیمه‌‌ى ملله‌‌ت كورد‌ خاو‌ن ئه‌‌و ڕووژه‌‌یمنه‌‌ و بایه‌‌ته‌‌ ئه‌‌را وه‌‌نه‌‌ته‌‌وه‌‌یى كردن و وه‌‌جه‌‌هانیكردن ئه‌و رووژه‌‌ ته‌‌قلا بكه‌‌یمن ك یه‌‌یشه‌‌ ئه‌‌رك بان شان ده‌‌زگایه‌‌یل ڕه‌‌ساننه‌‌ ك ئه‌‌را سه‌رله‌‌نوو زینگه‌وكردن ئه‌‌ى نه‌‌ریت جوانه‌ له‌‌ پرۆگرامه‌‌یل تایبه‌‌تیگ بخه‌‌نه‌‌وه‌‌ر باس ئه‌را ئه‌‌وه‌‌گ جایه‌‌ڵ و جوانه‌‌یلمان ئى نه‌‌ریته‌‌ بزانن و بناسن و شانازى وه‌‌پیه‌و بكه‌‌ن، هه‌‌میش نویسه‌ره‌‌یل و ڕووشنهویره‌یلیش وه‌‌ نویساننه‌‌یلیان تویه‌‌نن كاریگه‌‌رى فره‌‌یگ له‌‌بان زینگه‌‌وكردن نه‌‌ریته‌‌گه‌‌ داشتوون‌‌؛ له‌‌لایگتره‌‌و لایه‌‌نه‌‌یل په‌‌یوه‌‌ندیدار و ڕێكخراوه‌‌یل كومه‌‌ڵگاى مه‌‌ده‌‌نى و له‌‌ گشتیان گرنگتر وه‌‌زاره‌‌ت ڕووشنهویرى هه‌‌رێم كوردستان و دام و ده‌‌زگایه‌‌یل سه‌ر وه‌‌ وه‌‌زاره‌‌ته‌‌گه‌‌ تویه‌‌نن نه‌‌خش گرنگیگ له‌‌ ناسانن ئى چه‌مك ده‌‌وڵه‌‌مه‌‌نه‌‌ وه‌‌ كومه‌‌ڵگایه‌‌یل ڕووژهه‌‌ڵاتى وه‌‌ گشتى و كومه‌‌ڵگاى كوردى وه‌‌تایبه‌‌ت داشتوون، چوینكه‌‌ تا نه‌‌ریتیگ ڕه‌‌سن له‌‌یجووره‌‌ له‌‌ ڕووژهه‌‌ڵات هه‌‌س ك وه‌‌سه‌دان ساڵ له‌‌ نه‌‌ریتیگ جوور ڤالانتاین ڕووژئاوایى كویه‌‌ن تره‌‌، هه‌‌وه‌‌جه‌‌ وه‌‌وه‌‌ نه‌‌یریمن ك داب و نه‌‌ریته‌یل بیگانه‌‌ هاورده‌‌ بكه‌‌یمن و بنه‌‌یمنه‌‌یان شوون داب و نه‌‌ریته‌‌یل ڕه‌‌سنمان.

 

ن: ئاراس جه‌واد