نرخ عراق وه‌ دابه‌شبوينی بوياده‌ سێ ئه‌وه‌نه‌ی ئيسه‌

شفق نيوز

له‌ وڵاتيگ ژيه‌يم رۆڵ له‌تی له‌ داناين مه‌رزه‌ جوگرافيه‌گه‌ی يا هه‌ڵوژانن سيستمه‌ سياسيه‌گه‌ی نه‌يريم، به‌ڵكوو وه‌ مێژوويی دانرياگه‌و دامه‌زرياگه‌ له‌لايه‌ن داگيركه‌ر و گشت هه‌وڵيگمان ته‌نيا وه‌ردامييگه‌ ئه‌را ديد هه‌ڵه‌يگ ك نزيكه‌ی ١٠٠ ساڵ وه‌رده‌وام بوی له‌ وه‌تاڵانداين حاڵ وماڵ له‌ وڵاتيگ ك ئه‌وساو ئيسه‌يش خه‌رج ئاسايشی و سه‌ربازيه‌گه‌ی ساڵانه‌ له‌ چه‌ن ئه‌وه‌نه‌ی خه‌رجه‌يل ئاوه‌دانكردن و بنياتناينی فيشتره‌.

له‌يوا دابنه‌يم ك هه‌زاران و سه‌دان ساڵه‌ كورد و عه‌ره‌ب هاوسای ئاشتيخواز بوينه‌و له‌ سه‌رده‌م دامه‌زرانن عراق بوينه‌ هاوبه‌ش له‌ هه‌مان نيشتمان، ك يه‌يش وارده‌ له‌ حاڵه‌ت ئاسايی، له‌شوون دامه‌زرانن عراق و نه‌مه‌ندن رژيم پاشايه‌تييش، ك قسه‌يگ هه‌س ك گوايا كورد ئاشق ئی رژيم تازه‌ بوينه‌و ته‌نانه‌ت تا كووتايی حوكم عه‌بدولكه‌ريم قاسميش شايه‌ت ئی مه‌سه‌له‌ له‌بان خوه‌شه‌ويسييان بچه‌سپيه‌ێد، له‌ سه‌رده‌م عه‌بدولسه‌لام عارفيش كورد حورمه‌ت له‌و ده‌وڵه‌ته‌ نان و له‌ سه‌رده‌م ئه‌لبه‌كريش وه‌ ناچاری وه‌رگه‌ی ئه‌و رژيمه‌ گرتن و له‌سه‌رده‌م سه‌داميش خريانه‌ وه‌ره‌ده‌م سياسه‌ت ئاگر و ئاسن، دی هويچ ئوميدێگ ئه‌را هاوردنه‌وه‌ی ئحساس وه‌ هاووڵاتيبوين نه‌مه‌ند و ده‌رئه‌نجاميش سه‌ده‌يگ له‌ رووژگار ئحسا وه‌ به‌ختوه‌ری نه‌كردن و ته‌نيا كورد له‌ وه‌خته‌يل ته‌نگی تواسيان و له‌ خوه‌شی بيبه‌شيان كرديان، ئمجا ئه‌و ئشقيشه‌ ك باس له‌لی كرديم ئاڵشت بوی ئه‌را ژان و ئه‌گه‌ريش نه‌فت عراق وه‌گشتی بفرووشيم ئه‌و ژانه‌ شفا نايه‌ێد و ئی كيشه‌ی ريشه‌ييه‌ چاره‌سه‌ر ناكاو كورديش خريانه‌ خانه‌ی فه‌رامووشكردن له‌وه‌ر جيوه‌جيكردن مه‌ندنه‌وه‌ی عراق يه‌كگرتگ له‌شوون ٢٠٠٣، وه‌لێ ره‌فتارو كرده‌وه‌ی حكوومه‌ته‌يل يه‌ك له‌شوون يه‌ك له‌ماوه‌ی ١٣ ساڵ گوزه‌يشت باريگ ئه‌را خه‌ريته‌ی هه‌رێم ديه‌وه‌و نرخی بويه‌ دو ئه‌وه‌نه‌ی خه‌ريته‌ی گشت عراق و باوه‌ڕيگيش هه‌س ك ئويشێد"ئه‌گه‌ر عراق دابه‌ش بوياتاد ئه‌وه‌ نرخه‌گه‌ی سێ ئه‌وه‌نه‌ی ئه‌وه‌ بوی ك له‌چوارچيوه‌ی يه‌كگرتگی وه‌ی حاڵه‌و بمه‌ندياد.

چه‌سپانن برايه‌تی له‌ناونی پيكهاته‌يل ملله‌ت خه‌رجی فيشتر و باريگ قورستره‌ له‌ هساو زه‌ره‌ده‌يل له‌ڕوی مه‌ردمی و مادديه‌و، له‌ دونيای پيشكه‌فتگيش ئه‌را گشت پرووژه‌يگ هساويگ ئه‌كريه‌يد چ ئه‌را قانجاز چ زه‌ره‌د، ئمجا هه‌رچه‌نی فيشتر له‌ ٢٠% له‌ بودجه‌ی عراق تايبه‌ت كرياگه‌ ئه‌را فيشتر له‌ يه‌ك مليۆن كه‌س چه‌كدار وه‌گشت شيوازه‌يلی له‌ فه‌رمی و نافه‌رمی وه‌ل ئه‌وه‌يشا ئيمه‌ له‌ خه‌ته‌رناكترين وڵاتيگ ژيه‌يك له‌ڕوی ئاسايشی له‌گشت جه‌هان، ك بيجگه‌ جه‌نگ دژ گرووپه‌يل ترۆريستی و له‌وانه‌يش داعش له‌ هه‌مان وه‌خت عراق هه‌ر له‌ زويه‌و نه‌چيه‌سه‌ ناو جه‌نگيگ پيرووز و بيجگه‌ جه‌نگه‌يليش ك فريه‌ن و له‌ژير ناونيشانه‌يل ناپه‌سه‌ن، گشتمانيش ئاگردوی ئه‌و جه‌نگه‌يله‌ بويمنه‌و له‌ زه‌ره‌د و له‌ بودجه‌يل ئه‌را سه‌ندن تانگ و ده‌بابه‌و چه‌كه‌يل كوشنده‌، و فريه‌جاريش راسه‌وخۆ له‌ڕوی مه‌دفه‌ع و قوربانيه‌يل بويمنه‌و ئمڕوويش سه‌رله‌نوو له‌ بودجه‌ی ئاسايشی و به‌شيگ له‌ عراق نه‌ك وه‌گشتی، چوينكه‌ هيزه‌يل پێشمه‌رگه‌ی وه‌رگريكه‌ر له‌ خاك هه‌رێم كوردستان هويچ به‌شيگ له‌و بودجه‌ نه‌يرن باس بكريه‌ێدو به‌غدايش ته‌نيا حكومه‌تيگه‌ ئه‌را ماوه‌ی سێ ساڵه‌ جوور به‌شيگ له‌ هاووڵاتيه‌يلی هه‌رێم كوردستان له‌ بودجه‌ بيبه‌ش كردگه‌.

ئمڕوو جه‌هان چيه‌سه‌ ناو قوناغ تازه‌و ئه‌گه‌ريش به‌رژه‌وه‌ندی به‌غدا ته‌نيا دابينكردن ناسنامه‌ی ناپوخت و مقه‌يه‌تيكردن يه‌كێتی خاكه‌گه‌يه‌ ئه‌را ملله‌تيگ نايه‌كگرتگ و كه‌ش ژيان له‌ی وڵاته‌ وه‌ فايرۆس ره‌ته‌وكردن و دويره‌وخستن پيس بويه‌، ئه‌وه‌ به‌رژه‌وه‌ندی كورد ك له‌ ملله‌ته‌يل ئاشتيخوازه‌ له‌ناوچه‌گه‌و له‌وه‌خته‌يليگه‌ ك خواسته‌ خه‌بات بكه‌ن له‌تی دژ تاونه‌ی داعش، ئه‌وه‌ بايه‌سه‌ له‌ هه‌مان وه‌خت له‌ سه‌روه‌خوه‌يی و وجوودی خه‌بات بكه‌ن و خه‌رج جيابوينه‌وه‌يشی فريه‌ كه‌مه‌و وه‌ به‌راورد وه‌ل مه‌ندنيان له‌ژير ده‌سڵاتيگ وه‌ ئه‌قڵيه‌ت مه‌ركه‌زی و بی وه‌رپرسيارێتی و ته‌نانه‌ت وه‌ راپرسی ماف بڕيار چاره‌نويسيش ناتويه‌نيم ره‌زامه‌نی به‌غدا وه‌ده‌س باريم ئه‌را كووتاييهاوردن وه‌خته‌يل ژيان پڕ ژان ناچاری.

عه‌لی حسێن فه‌يلی