ژن بیشكه‌ى ئاده‌میزادییه‌ته‌

شفق نيوز

 

له‌نگه‌ر ژیان په‌یوه‌سه‌ وه‌ خوه‌شه‌ویسى، سه‌رچه‌وه‌ى ئى هس پیرووزیشه‌ ژنه‌یلن، بیشكه‌ى ئاده‌میزادییه‌تیش ئه‌وان له‌قننه‌ى. له‌وه‌ختیگ ك جه‌هان وه‌ نیرینه‌ چه‌و واز كرد، وه‌بى ژن تیه‌ریكستان بوى، هه‌ر له‌وه‌ر ئه‌وه‌یش یه‌زدان ژنه‌یل هاورده‌ وجوود.

چاره‌نویس ئاده‌میزاد و نه‌خشه‌ى پیشخستن هه‌ر وه‌ژنه‌یل سپاریا، كلیل جمجویل و ده‌ركه‌فتن خوه‌ربوین و ئازادى له‌ڕى ژنه‌یله‌و هه‌ڵهات و خوه‌شى وه‌خوه‌یانه‌و دین، هه‌ر وه‌و خاتریشه‌ ئویشیم هه‌ق نیه‌ له‌ ئاست كه‌م وكوڕى و مه‌ینه‌تیه‌یلیان ده‌سبه‌سیاگ بویمن.

ئیمه‌ بایسه‌ له‌وه‌ر خاتر نه‌ف و به‌رژه‌وه‌ندى خوه‌مان ئى دیم ئاده‌میزادییه‌ته‌ وه‌ شاریاگ و تیه‌ریكى نه‌یلیمه‌و، بایه‌سه‌ وه‌ ده‌س وازیگ بچیمنه‌ پیرییانه‌و، ئایا كه‌ى ره‌واس رووژانه‌ چه‌نه‌ها رووح په‌پووله‌یى له‌ ئاگر نه‌زانین گڕبگرن و هه‌ڵقرچیه‌ن، كى هووكار ئى كاره‌یله‌سه‌؟ چاره‌سه‌ر رویداگه‌یل چوینه‌؟ ریكخریاگه‌یل له‌ى باوه‌ته‌و چه‌ كردنه‌؟ حكوومه‌ت تا چه‌نیگ تویه‌نستگه‌ گه‌شه‌ده‌ر و بڕیاربه‌خش پیرووز كاره‌یل ژن بوود؟

ئه‌یانه‌و چه‌نه‌ها پرسیار تر رووژانه‌ یه‌قه‌مان گرن و له‌یوا له‌لیمان ئه‌كه‌ن ك فیشتر وژدانمان بجووشیه‌یدو بچیمنه‌ پیرى زه‌خم و گریه‌كووره‌و ئى ده‌رده‌یل مه‌ترسیداره‌و چاره‌ى كیشه‌یلى بكه‌یم.

بایه‌سه‌ بزانیم و یتویه‌نیم دیارى دیم راسكانى خوه‌مان بكه‌یم و بناسیمه‌ى و نه‌چیمنه‌ قه‌ره‌ى ئه‌قڵیه‌ت كویه‌ن و نه‌وه‌ى دویارووژمان نه‌یه‌یمنه‌ ده‌س چاره‌نویس نه‌زانى و نادیاره‌و.

هه‌ر وه‌و خاتریشه‌ هه‌ر كه‌سیگ له‌ ئیمه‌ بایه‌سه‌ له‌لاى خوه‌یه‌و پشتگیرى له‌ هه‌قه‌یل ژن بكاو داكووكى له‌ ره‌نجه‌یلیان بكا، تا بتویه‌نن دویرگه‌یگ له‌ جوانى و پیرووزى...هه‌رێمیگ له‌ خه‌بات و ده‌ستووریگ باریمنه‌ وجوود ك ژن له‌تى باڵاده‌س بوود و مه‌رزه‌یل بشكنن و ئاده‌میزاده‌یل وه‌گشت چین و لایه‌نه‌یلیانه‌و ئاڵاى خوه‌شگوزرانى به‌رزه‌و بكه‌ن و رووشنایى زانست و داب ونه‌ریته‌یل دادگه‌رانه‌ سه‌رتاپاى دونیا بپووشید و بیشكه‌ى وجوود ز سه‌رفرازیمان ك كوردستانه‌ بووده‌ سه‌رچه‌وه‌ى سه‌ربه‌رزى و خوه‌ر داد و هه‌ق ژنه‌یل له‌یراوه‌ هه‌ڵبایدو شه‌وقى گشت ملله‌ته‌یل جیاواز و وڵاته‌گه‌مانیش بگریده‌و.

ستار ئه‌حمه‌د

ج . أ