خراوترين ساڵ له‌ چه‌وه‌ڕی به‌ره‌كه‌ت

شفق نيوز

له‌ ٢٠١٤ مووڵه‌ته‌يل وه‌به‌رهاوردن ٦ مليار دۆلار كه‌م كرد، ئه‌و پرووژه‌يليشه‌ ك مووڵه‌ت وه‌پيان درياويد به‌شيگيان وسيان و وه‌به‌رهاوه‌ره‌يليش خوه‌يان كيشانه‌وه‌و جوور مه‌زه‌نه‌يش فيشتر له‌ يه‌ك مليار دۆلاريش زه‌ره‌د كه‌فته‌ وه‌ر كه‌رت تايبه‌ت.

له‌ ساڵ ٢٠١٤ فيشتر له‌ ٣٠٠ كومپانياو قونته‌راتكار ئفلاس بوين و كه‌فتنه‌ ژير قه‌رز فريه‌يگ و كارمه‌ند و كارگه‌ره‌يليش له‌ بی پويلی و بی بودجه‌يی كله‌وكردن ئه‌را ماڵ ك ئه‌وانيش وه‌ نزيكه‌ی ٢٠٠ هه‌زار كه‌س مه‌زه‌نه‌ ئه‌كريه‌ن.

يه‌يش بيجگه‌ ئه‌وه‌ك ئه‌و قه‌يرانه‌ بويه‌ هووكار كزه‌وكردن كار فيشتر له‌ ٤٠٠ هه‌زار كه‌س تر له‌ بواره‌يل جياجيای بازرگانی و پيشه‌يی. ئمجا هه‌رچه‌نی جی شانازيه‌ ئه‌را وه‌به‌رهاوه‌ر و سه‌رمايه‌داره‌يل و كه‌رت تايبه‌ت ك بڕ يه‌ك مليار دۆلار قه‌رز دانه‌ حكوومه‌ت هه‌رێم كوردستان ئه‌را دابه‌شكردن مووچه‌ی فه‌رمانبه‌ره‌يل، وه‌لی حكوومه‌ت ٢ مليار دۆلار كه‌رت تايبه‌ت و قونته‌راتكاره‌يل قه‌رزاره‌و ئمساڵ حكوومه‌ت وه‌گشتی ٧ مليار دۆلار قه‌رز كردگه‌.

هه‌ر ئمساڵيش جه‌نگ داعش يه‌قه‌مان گرت، بيجگه‌ ئه‌وه‌ك زره‌د فريه‌يگ ئابووری ره‌سانه‌ پيمان، وه‌ل ئه‌وه‌يشا زه‌ره‌د فريه‌يگيش ئنسانی له‌ليمان دا و سه‌دان پێشمه‌رگه‌مان شه‌هيد بوين و له‌ هه‌مان وه‌خت بويه‌ هووكار ئه‌وه‌ك نزيكه‌ی مليۆنيگ ئاواره‌ روی له‌ كوردستان بكه‌ن و فيشتر بار ئابووريمان قورس بكه‌ن.

ئيسه‌يش له‌ شوون ئه‌و هه‌مگه‌ فشار و زه‌ره‌ده‌يل گه‌ورا ك له‌ی ساڵه‌ رويدا، وه‌لی وه‌ل ئه‌وه‌يشا ئوميديگ ده‌ركه‌فت و حكوومه‌ت هه‌رێم كوردستان و عراق له‌ی دوياخره‌ له‌بان چه‌نه‌ها مه‌سه‌له‌ی ئابووری و نه‌فت ره‌سينه‌ ريككه‌فتن، ك يه‌يش له‌يوا له‌ليمان ئه‌كا له‌ چه‌وه‌ڕی به‌ره‌كه‌ت ساڵ ٢٠١٥ بويمن ئه‌را ئه‌وه‌ك چاره‌سه‌ر قه‌يران دارايی په‌يا بدێ و كار بكه‌فيده‌ بازاڕه‌يل و حكوومه‌ت و وه‌رپرسه‌يل ئی وڵاتيشه‌ له‌و هه‌مگه‌ غه‌ڵه‌ته‌يله‌ بڕه‌سنه‌و ك له‌ ساڵ ٢٠١٤ روی وه‌ڕوی وڵاته‌گه‌ بويه‌و، كورد وه‌ته‌نی له‌و كه‌فتنه‌ نه‌ف وه‌ربگرن.

شوان به‌رزنجی

ج . أ