"ئاڤاز"فه‌يليه‌يل خسته‌ مه‌حه‌ك تاقيكردن

شفق نيوز

له‌ی ماوه‌ی دوياخره‌ بايه‌سه‌ ئاماژه‌ وه‌ باوه‌تيگ ئاگاداری ده‌زگای جه‌هانی(ئاڤاز)بكه‌يم له‌باوه‌ت گه‌ردين له‌ شوون چاره‌نويس ١٥ هه‌زار له‌ شه‌هيده‌يل بی سه‌روشوون كورد فه‌يلی، ك يه‌يش دويای داواكاری يه‌كيگ له‌ رووڵه‌يل ئی پيكهاته‌ له‌ گاميگ ك ده‌سميه‌ت ريكخرياگيگ جه‌هانی دا ئه‌را خستنه‌ڕوی كيشه‌گه‌مان وه‌ شيوه‌يگ ك بگونجيه‌يد وه‌ل رينمايه‌يل كومه‌ڵگای ناوده‌وڵه‌تی له‌ وه‌ختيگ ك يه‌كه‌وگرتگه‌ وه‌ل پشتگووشخستن و دويره‌وخستن ناوخوه‌يی.

من له‌يوا دوينم ك ئی گامه‌ مه‌زه‌نه‌يگه‌ ئه‌را خاوه‌ن كيشه‌گه‌ و ئه‌وانه‌ك باوه‌ڕ وه‌پی ديرن له‌ رووڵه‌يل ملله‌تمان يا دووسه‌يل و خاوه‌ن وژدانه‌يل. له‌لايگ تريشه‌و ئه‌و ريكخرياگه‌ خاوه‌ن تايبه‌تمه‌ندييگه‌ ك هويچ مه‌هانه‌يگ له‌لای رووڵه‌يل پيكهاته‌گه‌ نه‌يليد وه‌گشت جووره‌ رينمايی و هوير و باوه‌ڕيان له‌ به‌شداری نه‌كردنيان، ئمجا وه‌ بوونه‌ی ناونيشان ١٥ هه‌زار شه‌هيد و وجوود شماره‌يگ فريه‌ی وه‌كاربه‌ره‌يل لاپه‌ڕه‌يل ماڵپه‌ڕ په‌يوه‌نديه‌يل كومه‌ڵايه‌تی له‌لايه‌ن رووڵه‌يلمان وه‌تايبه‌ت ئه‌وانه‌ك باس له‌و راسيه‌يله‌ ئه‌كه‌ن ك له‌تی ژيه‌يم ئه‌ڵڵاجه‌وی بوی ك دويای وه‌سه‌رچگن رووژه‌يليگ ته‌نيا شماره‌ی كه‌ميگ ئمزای ئه‌و ئعلانه‌ كردن و دوير بوی له‌و شماره‌ی خواسته‌ ئه‌را ته‌كانداين وه‌ مه‌سه‌له‌گه‌.

ئيمه‌ له‌ڕی هه‌وڵ دياريكردن شماره‌ی شه‌هيده‌يلمان توانای ئه‌وه‌ ديريم قه‌واره‌و ئاست و مه‌زڵوميه‌ت خوه‌مان بچه‌سپنيم و له‌ڕی گشت كه‌ناڵه‌يل وه‌رده‌سيش وه‌ شيوه‌يگ شه‌رعی ئه‌تويه‌نيم له‌ی چوارچيوه‌ی دويره‌وخستنه‌ ده‌ربچيم، وه‌لی جی داخه ‌جوور جاران دوينيم ك خاوه‌ن كيشه‌يلمان كاريگه‌رييان كزه‌ له‌ی مه‌سه‌له‌ وه‌ بوونه‌ی كه‌مئه‌زموونی و نه‌وين پشتگيری و هه‌ڵسووكه‌فت و ره‌فتاره‌و، ك ئيسه‌يش دوينيم هويچ گرينگييگ نايه‌نه‌ ئی مه‌سه‌له‌ ك شايه‌ت كيشه‌گه‌مان بڕه‌سنيده‌ ئاسو ناوبانگی جه‌هانی. ئمجا ئه‌وه‌يش ناشاريه‌يده‌و ك شماره‌ی كه‌ميگ له‌ مه‌ردم خه‌م ئی مه‌سه‌له‌و مه‌ينه‌تيه‌يلمانه‌ ئه‌خوه‌ن و ئی گاميشه‌ جدديه‌ ئه‌را ئيمه‌و هه‌وڵيگيشه‌ ئه‌را دراوردن كيشه‌گه‌مان له‌ جوگرافيه‌ی له‌هويره‌وبردن و فه‌رامووشكردن و شايه‌ت كه‌سه‌يليگيش ناڕازی بوون وه‌ ئه‌وه‌ك ئی هه‌واڵه‌ وه‌پيان نه‌ڕه‌سيه‌، ك وه‌و خاتريشه‌ خواسته‌ ئه‌وانه‌ك زانن ئاگادار باقی مه‌ردمه‌گه‌ بكه‌ن.

هه‌ر له‌وه‌ر ئه‌وه‌يش ئويشيم دروس نيه‌ ك پيكهاته‌يگ خاوه‌ن هه‌زاران بيسه‌روشوون بدێ له‌ قوربانيه‌يل و توانای ئه‌وه‌ نه‌ياشتوون به‌شداری له‌ گرده‌وكردن ئمزای داواكرياگ بكه‌ن له‌ هه‌ڵمه‌تيگ وه‌خاتر گه‌ردين له‌ شوون چاره‌نويس شه‌هيده‌يل بيسه‌روشوونمان.

عه‌لی حسێن فه‌يلی

ج . أ