گووش له‌ دڵد بگر و له‌ مه‌ژگد بفام

شفق نيوز

له‌وه‌خت هويره‌وكردن خاس، دڵمان وه‌ ئارامی ئه‌كووتيد و خاس كار ئه‌كا، وه‌لی له‌وه‌خت هويره‌وكردن خراو دڵمان شيويه‌يد و نائارامييگ له‌ دڵمان دروس ئه‌دێ و ئحساس ناخوه‌شيگ له‌ش و ده‌روينمان وه‌ ته‌مامی داگير ئه‌كا، ئمجا له‌يرا ئه‌وه‌ ده‌ركه‌فيد ك خاسی يا خراوی كاركردن دڵمان په‌يوه‌ندی راسه‌وخۆ ديريد وه‌ ئه‌وه‌ك مه‌ژگمان خه‌ريكيه‌.

مانای ئه‌وه‌سه‌ ئيمه‌ ئه‌تويه‌نيم كار بكه‌يمنه‌ بان دڵمان له‌ڕی مه‌شقكردن وه‌ هويره‌وكردنمان ك فيشتر خاستر بوون له‌وه‌ر خاتر هاتن ئحساس خوه‌ش و خاستر، چوينكه‌ ئحساس خوه‌ش دڵ و ده‌روينمان پڕ ئه‌كا له‌ ئارامی و له‌شمان ئه‌ڕه‌سنيده‌ خاسترين ئاست كاركردن وه‌بی هويچ ناڕه‌حه‌تييگ.

هه‌ر وه‌و خاتريشه‌ بايه‌سه‌ له‌باند خوه‌د هووكاره‌ی ئه‌وه‌ بكه‌يد ك ئاگادار بويد له‌وه‌خت سه‌رهه‌ڵداين هه‌ر هويره‌وكردنيگ و له‌ هه‌مان وه‌خت ده‌سڵاتيش داشتويد له‌ ئالشتكردنی له‌ حاڵه‌تيگ ئه‌گه‌ر زانستيد خه‌ريكه‌ ئحساس ناخوه‌ش و خراويگ وه‌پيد ئه‌وه‌خشيد.

كيشه‌ نيه‌، ئيوه‌ ئه‌تويه‌نن وه‌ بوونه‌ی هه‌ڵمژين هه‌ناسه‌يگ قويله‌و له‌ڕی لويتدانه‌و هه‌ناسه‌گه‌دان بچێده‌ به‌ش خوارگ سويه‌يلدان و ١٠ چركه‌ بيلنه‌ی و دوياخريش هه‌ناسه‌د وه‌ربيه‌ ده‌يشت و تا په‌نج بشمار با سويه‌يلد به‌تاڵ بوون له‌ هه‌وا تا هه‌ناسه‌يگ تر هه‌ڵمژيد، دی وه‌و شيوه‌ ئحساس ئاراميگ ئه‌را ئه‌ياد ئه‌گه‌ر له‌بان له‌يوا هه‌ناسه‌يله‌ وه‌رده‌وام بدێد و له‌شوون ئه‌وه‌يش خاوبوينه‌وه‌يگ ئه‌ياده‌ تويشد ك زويتر هس وه‌پی نه‌كرديده‌.

ئمجا هه‌نای ك هس كريد خه‌ريكه‌ له‌شد خاوه‌و ئه‌دێ، بويشه‌ خوه‌د..من ئی هويره‌وكردنه‌ ناخوازم و زه‌ره‌د وه‌پيم ئه‌ڕه‌سنيد، دی ده‌سوه‌جی ئه‌تويه‌نيد هويره‌وكردنه‌گه‌د ئاڵشت بكه‌يد وه‌ يه‌كيگ خاستر، وه‌ی شيوه‌يشه‌ ئه‌تويه‌نيد ك هه‌ر وه‌ختيگ تويش هه‌رهويره‌وكردنيگ هاتيد له‌ مه‌ژگد له‌يوا ته‌كنيكيگ بكه‌يده‌ خووييگ ئه‌را خوه‌د وه‌خاتر له‌ناوبردن هويره‌وكردنه‌يل خراود و دی ئه‌وسا هس وه‌ خاسی دڵ و ئه‌و ئاراميه‌ ئه‌كه‌يد ك ماوه‌يگه‌ ئه‌زره‌تمه‌نيد ئه‌رای.

عه‌بدوڵڵا ته‌وفيق

ج . أ