جه‌نگ جه‌هانی یه‌كم وكورد

شفق نيوز

؛ وه‌راسی له‌ی جه‌نگه‌ شه‌روشور زورم ولاته‌یل جه‌هان گرده‌ وه‌ر و تاوانه‌یل گه‌ورایگ له‌ی جه‌نگه‌ ئه‌نجام گرد و ( ڤولتیر ) ناحه‌قی نه‌یوه‌ ك وه‌تگه‌ : میژوو بریتیه‌ له‌ تومار كردن تاوانه‌یل به‌شه‌ریه‌ت ؛ وه‌لی زورم میژوو نیوسه‌یل هانه‌و باوه‌ره‌ ك جه‌نگ  وتاوان زیاترله‌ روژئاوا ریوداگه‌‌ جورجه‌نگ ٥٠٠ ساله‌ی فه‌ره‌نساوبه‌ریتانیه‌ ؛ وجه‌نگ ٣٠ ساله‌ی تایفی وره‌گه‌زی له‌ ئه‌لمانیه‌ و وه‌رجله‌ ئه‌وه‌یش ناوه‌ ناوه‌ جه‌نگ ترسناك ریوداس . له‌سه‌ره‌تای سه‌رده‌ی په‌نجمیش ئه‌وروپازیاترله‌ ناوچه‌یلترجه‌هان گه‌شه‌ كردیوگ ونیازوه‌ بازاره‌یلی ئه‌را فروشتن كالاگانی داشت وئی هوكاره‌و چه‌ن هوكاریگترده‌س دانه‌ یه‌ك وجه‌هان بیوه‌ دوبه‌شه‌و به‌ش یه‌كم یاته‌وه‌ر یه‌كم له‌ ئه‌لمانیه‌و نه‌مساو ودیواخریش ده‌وله‌ت عوسمانی و ولاته‌یل هاوپه‌یمانیش ك به‌ش دیوم بیون له‌ به‌ریتانیه‌ وفه‌ره‌نسه‌ وسربیه‌و روسیه‌ و تا ئه‌ندازه‌یگیش ئه‌مریكا پیك هاتیوگ ؛ به‌لی جه‌هان وه‌ودو كه‌رتیه‌ مه‌نه‌ی تاوه‌ختیگ له‌ روژ ٢٨ حوزه‌یران ١٩١٤ له‌سه‌ردانه‌گه‌ی ئه‌رشیدوك فرانسیس فردیناند جینشین پادشای نه‌مساوهاوسه‌ره‌گه‌ی ئه‌را سه‌راییڤو‌ ك له‌لایه‌ن خوه‌ندكاریگ سربی وه‌ناوپرنسیب ك سه‌روه‌ ریكخراو ( لیوسیه‌یل ) بیو ته‌قه‌ له‌ لی كریاوخوه‌ی وهاوسه‌ره‌گه‌ی كوژیان و وه‌ی خاتره‌ جه‌نگ جه‌هانی یه‌كم له‌ ٢٨ ته‌موز ١٩١٤ ده‌س وه‌پی كردو له‌شیون ٣ مانگ ئمبراتوری عوسمانییش خوه‌ی داپال ئه‌لمانیه‌ وكه‌فته‌ ناوجه‌نگ ؛ ده‌سه‌لات ئه‌و سه‌ردمه‌ی ده‌وله‌ت عوسمانی وه‌ده‌س ئتحادیه‌گان وه‌سه‌روكایه‌تی ئه‌نوه‌رپاشا بیون ؛ ئتحادیه‌گان زیاتر ریكخراویگ تورانی علمانی بیو وله‌سال ١٩٠٨ تا ١٩٠٩ ئنقلاب كردنه‌ بان سولتان عه‌بدولحه‌مید وسولتان محه‌مه‌د ره‌شاد له‌شیونه‌گه‌ی نانه‌ ته‌خت وهه‌روه‌ناوحوكم عوسمانی بیو؛ وه‌نه‌ ده‌سه‌لات وه‌ده‌س ئتحادیه‌گان بیو . یه‌كم كاردانه‌وه‌ یاعه‌كس لعه‌مه‌ل به‌ریتانیه‌ ئه‌را ئه‌و گامه‌ی عوسمانیه‌گان ئه‌وه‌ بیو هیزه‌یلیگ له‌ ناوچه‌ی خه‌لیج داشت وهاوپه‌یمانی وه‌هیزیش وه‌ل ئال سعودو وه‌هابیه‌گان داشت و وه‌ل شه‌ریف مه‌ككه‌یش هه‌رهاوپه‌یمان بیوو هیزه‌یل به‌ریتانیه‌ له‌ به‌حره‌ین ئاماده‌ بیوو هه‌رچه‌ن روژیگ له‌ شیون ئه‌وه‌ ناوچه‌ی فاوداگیركردن و وه‌ره‌و به‌غدا حه‌ره‌كه‌ت كردن وفه‌توای جهادیش له‌لایه‌ن شیخ ئسلام ده‌رچی وعه‌ره‌به‌یلیش بیونه‌ دوبه‌ش له‌یه‌ك جیا وبه‌شیگیان پشتگیری به‌ریتانیه‌ كردیان ك ئه‌وانه‌یش عه‌لمانیه‌یل وناسیونالزمه‌یل عه‌ره‌ب بیون وه‌لی نه‌تیوه‌نستن مه‌ردم فه‌ره‌یگ له‌ دژیازد عوسمانیه‌یل گرده‌و بكه‌ن تائاخری له‌ناونی ماكماهون وشه‌ریف مه‌ككه‌ ریكه‌فتنیگ ئه‌نجام گرد وجه‌زیره‌و قودس وشام له‌ عوسمانی سه‌ننه‌و دریا به‌ریتانیه‌ وفه‌ره‌نسه‌ وهه‌رله‌و وه‌خته‌ قودس وه‌یه‌كجاری له‌ ده‌س موسه‌لمانه‌یل چیوله‌ پاداش ئه‌وه‌ سوریه‌و ئوردون وعراق ك ئه‌و وه‌خته‌ له‌هه‌ردو ولایه‌ت موسل وبه‌سره‌ پیك هاتیاد دریا كوره‌یل شه‌ریف مه‌ككه‌ مه‌لك عه‌بدولاو مه‌لك فه‌یسه‌ل وزه‌ید وله‌شیون ئه‌وه‌ ئوردی به‌ریتانیه‌ له‌ سال ١٩١٨ ره‌سیه‌ شارموسلیش وه‌لی له‌بان ئاموژگاریه‌یل حكومه‌ت ئه‌و ولاته ئه‌را ناوچه‌یل كوردستان نه‌هات وده‌وله‌ت عوسمانی خوه‌ی دا ده‌سه‌و وئیكه‌ش ریككه‌فتن نامه‌ی مودرس له‌ناونیان ئمزاكریاو دیواخریش ده‌وله‌ت عراق دامه‌زریاو ولاته‌یل ته‌وه‌ر یامحوه‌ر كوتایی وه‌پی هات وئمبراتوری عوسمانی كوت كوت كریاو كوردستانیش وه‌لیا كریا چوارپارچه‌وئه‌وه‌ خه‌یرجه‌نگ جه‌هانی یه‌كم ئه‌را كورد بیو .