له‌ یاد كاره‌سات هه‌ڵه‌بجه‌

شفق نيوز

 

هه‌رچه‌نى ئى تاوان فریه‌ گه‌ورا كاره‌ساتیگ بى وینه‌ ئه‌را مه‌ردم هه‌ڵه‌بجه‌و خه‌ڵك كوردستان دروسكرد، وه‌لى وه‌ل ئه‌وه‌یشا روخسار راسكانى فاشیسته‌یل به‌غدا وه‌ جه‌هان ناسى و هه‌ر له‌و ساتیشه‌و به‌عس و رژیمه‌گه‌ى سه‌ره‌تاى كووتایى خوه‌یان نه‌خشانن و بیجگه‌ ئه‌وه‌یش وه‌رچه‌رخان گه‌وراگیش بوى له‌ مێژوو ملله‌ته‌گه‌مان و جمشت شووڕشكاریه‌گه‌ى، چوینكه‌ دى نه‌كریا كیشه‌ى ئى ملله‌ته‌ ك له‌ژیر په‌رده‌ى به‌رژه‌وه‌ندى ده‌وڵه‌ته‌یل پشتگووش خریا نادیده‌ بوودو هه‌ر له‌یوا وه‌ شاریاگ بمینیده‌و.

له‌ڕاسى و له‌ ئاكام گه‌ورایى ئه‌و تاوانه‌ تویه‌نریه‌ید مێژوو ملله‌ته‌گه‌مان له‌ وه‌رجه‌و له‌ شوون كیمیاواران هه‌ڵه‌بجه‌ دیارى بكریه‌ید، چوینكه‌ له‌وساوه‌ مه‌سه‌له‌ى كورد و هه‌قه‌یل ره‌واى ك چه‌نه‌ها ده‌یه‌ بوى جوور كیشه‌یگ ناوخوه‌یى عراق تاریف كریاو دى نه‌كریا وه‌و جووره‌ ره‌فتار وه‌لیا بكریه‌ید.

هه‌ڵه‌بجه‌ وژدان ئنسانیه‌ت له‌قان و كورد و كیشه‌ى كوردیش ئاشنا كرده‌ جه‌هان جوور ئه‌وه‌ك سه‌رۆك بارزانى فه‌رمایش كرد: كلیل به‌خت كورد واز كرد.

دوشمنه‌یل كورد خوازیار بوین هه‌ڵه‌بجه‌ له‌بان نه‌خشه‌ى جه‌هان بكوشننه‌و، ئمجا ئه‌وانه‌گ خوازیار ئى كاره‌ بوین ره‌سینه‌ سزاى خوه‌یان و ئیسه‌ هانه‌ زیڵدان مێژوو و هه‌ڵه‌بجه‌یش وه‌ سه‌ربه‌رزانه‌ گام وه‌ره‌و ئاینده‌ى گه‌شیگ ئه‌نه‌یدو تاج سه‌ركه‌فتن نه‌یده‌ سه‌ر.

له‌ 13/ 3/ 2014 مه‌دالیاى سه‌روه‌رى و وه‌ پاریزگاكردن كریا یه‌قه‌ى هه‌ڵه‌بجه‌، ك یه‌یش كه‌مترین دیاریه‌ ئه‌را ئه‌و شار قاره‌مانه‌، ئیسه‌یش قوناغیگ تر له‌ مێژوو ئه‌و شار كویه‌نه‌ ده‌س وه‌پى ئه‌كاو ئاڵشتكردنى له‌لایه‌ن حكوومه‌ت هه‌رێمه‌و ئه‌را پاریزگا وه‌ یه‌كه‌مین گامیگ ئه‌را قه‌ره‌بووكردن سه‌بوورى و قوربانیداین بى وینه‌ دانریه‌ید.

ئیسه‌ دى وه‌خت ئه‌وه‌سه‌ هه‌ڵه‌بجه‌ بووده‌ شاریگ نموونه‌یى و گشت چشتیگ وه‌ گووره‌ى توانا له‌لایه‌ن حكوومه‌ت هه‌رێم و گشت حزبه‌یل كوردستانیه‌و ئه‌راى بكریه‌یدو ئه‌را ئه‌و شار خوه‌شه‌ویسه‌ داوا كریه‌ید ك هویچ حزبیگ وه‌ ته‌نیا ئه‌را خوه‌ى هساو نه‌كاو هه‌ڵه‌بجه‌ نه‌خریه‌یده‌ ناو كیشمه‌یكش سیاسى و حزبایه‌تیه‌و، چوینكه‌ ئه‌وه‌ شاریگه‌ مایه‌ى شانازى گشتمانه‌و بایه‌سه‌ گشتمان خزمه‌تى بكه‌یم تا بتویه‌نیم وه‌یه‌كه‌و زه‌خمه‌یل چه‌ن ساڵه‌ى ساڕیژ بكه‌یم.

سه‌لام عه‌بدوڵڵا

ج . أ