ئه‌را هه‌رچشتى گه‌ردید ها له‌ى خه‌زینه‌

شفق نيوز

ویڵه‌و گه‌ردیگه‌ شوون ئه‌و چشته‌یله‌ ك وه‌باوه‌ڕ خوه‌ى بوونه‌ مایه‌ى به‌خته‌وه‌رى ئه‌ڕاى. خواست ئاده‌میزاد له‌وه‌ر خاستركردن ژیان و پیشكه‌فتنه‌و هویچ وه‌ختیگیش ئى هویره‌ له‌سه‌رمان جیا نیه‌وگه‌وه‌، ماناى ئه‌وه‌سه‌ بابزانیم له‌شوون چه‌ گه‌ردید و كامه‌سه‌ خواست و ئه‌زره‌ته‌یلد؟ تواید بڕه‌سیده‌ چه‌؟ تواید كى بوید؟ تواید چه‌ بوید..؟

وه‌بى دودڵى ئه‌وه‌ك توایده‌ى ئیسه‌ ده‌سنیشانى بكه‌، هه‌رچه‌نى داواكارى و خواسته‌یلد گه‌ورا بووگ، وه‌لى ئه‌را وه‌دیهاوردنیان ڕه‌خد نه‌چووگ، چوینكه‌ توایم ناونیشان خه‌زینه‌یگ به‌یمنه‌پید ك گشت ئه‌و چشته‌یله‌ ها له‌تى، بیگومان كلیل ئه‌و خه‌زینه‌یش ها ده‌س خوه‌دو ته‌نیا ئه‌را خوه‌د واز بووگ. ماناى ئه‌وه‌سه‌ ئیسه‌ بچووه‌ وه‌رده‌م جامه‌ك و ته‌ماشاى ئه‌و خه‌زینه‌ بكه‌.

گرنگ یاموهم نیه‌ ره‌نگ قاپیه‌گه‌ى و جوانى ڕوپووشه‌گه‌ى چوینه‌و گرنگ نیه‌ خه‌ڵك چ شوونیگید و ڕه‌گه‌ز و نه‌ته‌وه‌د چه‌س. خه‌زینه‌ یا گه‌نجینه‌یگ دیرید و دڵنیابه‌ له‌ گه‌ورایى و ده‌وڵه‌مه‌نیه‌گه‌ى و ته‌نیا خاوه‌نیشى هه‌ر خوه‌دید و ته‌نیا خوه‌د تویه‌نید له‌قاپى ئه‌و خه‌زینه‌وه‌ بچیده‌ ناو ئه‌را ئه‌وه‌ك گشت چشته‌یل خاس و گرانقیمه‌تى باریده‌ ده‌یشت. ماناى ئه‌وه‌سه‌ بچووه‌ ناو دویرگه‌ یا جه‌زیره‌یل گه‌وراى ده‌رویند و تا تویه‌نید بگه‌رد له‌وه‌ر خاتر ئه‌وه‌ك توایده‌ ده‌سد بكه‌فیگ و بزان خه‌زینه‌گه‌د گشت ئه‌و چشته‌یله‌ ها له‌تى ك مه‌ردم دیرنه‌ى؟ شایه‌ت چشته‌یل نرخداریگیش له‌تى بووگ له‌ خه‌زینه‌ى هویچ كه‌سیگ تر نه‌وگ، ئنجا باریانه‌ كار تا له‌مه‌رز خه‌زینه‌ بانه‌ ده‌یشت و نرخ و قیمه‌ت راسه‌قینه‌ى خوه‌یان وه‌ربگرن. ئنجا هه‌میشه‌ ئه‌وه‌یش له‌ هویرد بووگ ته‌نیا كه‌لینیگ ك ها له‌ناو خه‌زینه‌گه‌د وه‌خته‌، ئه‌گه‌ریش له‌وه‌خت خوه‌ى نه‌ف له‌هه‌ر نه‌خت یا عومله‌یگ وه‌رنه‌گرید شایه‌ت له‌كیسد بچووگ و له‌و كه‌لایى یا كه‌لینه‌وه‌ بكه‌فیده‌ خواره‌وه‌، وه‌لى ئه‌گه‌ر هه‌وڵ داید باریده‌ى ده‌س ئه‌وه‌ بیگومان خوه‌د و كه‌سه‌یل تریش له‌لى قانجاز دوینین، هه‌ر له‌وه‌ر ئه‌وه‌یش هس وه‌ گرنگى یا ئه‌همیه‌ت خوه‌د بكه‌و بگه‌رد له‌ناو دویرگه‌ یا جه‌زیره‌و باخه‌یل ئاوه‌دان ده‌رویند، ك هه‌ر بایه‌سه‌ چه‌ن داریگ به‌ردار بووگ و له‌ به‌ره‌گه‌ى نه‌خواردوید، یه‌یش له‌وه‌ختیگ  ك خوه‌د و كه‌سه‌یل تریش دویر نیه‌ هه‌وه‌جه‌ وه‌پى داشتوین.

هه‌ر له‌وه‌ر ئه‌وه‌یش هس وه‌ وجوود خوه‌د بكه‌و ئه‌وه‌یش بزان ك هویچد كه‌متر نیه‌ له‌وانه‌ك ناویان له‌تاریخ توومار كریاگه‌و خزمه‌ت كردنه‌و له‌وه‌ر كاره‌یل خاسیان هه‌میشه‌ یادیان كریه‌یگ و ناویان هه‌ر زنگه‌.

هویچ وه‌ختیگ ده‌روین خوه‌د فه‌رامووش مه‌كه‌و بزان ك ئه‌گه‌ر وه‌ل ده‌روین خوه‌دا گونجیاگ بوید، ئه‌وه‌ بیگومان تویه‌نید جه‌وه‌ڵیش جیواز بكه‌ید، ئنجا هه‌وڵ بیه‌ به‌هره‌مه‌نى و توانایه‌یلد باریده‌ كار و له‌هه‌مان وه‌خت گام گه‌وراى خودسازى ئه‌ڵگر و شایه‌ت رووژیگیش بایگ چه‌وه‌ڕى شوون ده‌س رووشند بكه‌یم.