ڕیكخریایه‌یل مه‌ده‌نى هه‌ق هاوڵاتیبوین وئاشكراكردن چاره‌نویس كورده‌یل فه‌یلى داوا كه‌ن

شفق نيوز

ئه‌و تاوانه‌یله‌ ك ده‌رهه‌ق كورده‌یل فه‌یلى ئه‌نجام دریان، و له‌هه‌مان وه‌خت داوایش كردن هه‌ق هاوڵاتیبوین دوباره‌ بدریه‌یده‌ ئه‌و كورده‌یل فه‌یلیه‌ ك ئى هه‌قیانه‌ خوریایه‌ و هه‌میش هاوردنه‌وه‌ى ئه‌و ماڵ و موڵكه‌یلیانه‌ ك چه‌پاوكریان و ئاشكراكردن چاره‌نویس ڕووڵه‌یل بى سه‌روشوون كریایان.

تارق عادلى سه‌رۆك ناوه‌ند ئسلامى ڕیكخریایه‌یل كوومه‌ڵگه‌ى مه‌ده‌نى له‌ په‌یوه‌ندییگى وه‌ل ماڵپه‌ڕ شه‌فه‌ق له‌ى باوه‌ته‌ وت :" ڕژیم وه‌رین له‌ هویچ چشتیگ دادپه‌روه‌ر یا عادڵ نه‌وى ته‌نیا له‌وه‌ نه‌ود ك وه‌شیوه‌یگ یه‌كسان زوڵم وزووركرد له‌ ڕووڵه‌یل ملله‌ت عیراق، وه‌لى وه‌ل ئه‌وه‌یشه‌وه‌ زوڵمیگ گه‌وراتر چه‌سپانه‌ بان چین كورده‌یل فه‌یلى وه‌شیوه‌گ ك دویریانه‌و خست له‌ بواره‌یل ژیان سیاسى و ئابوورى و كوومه‌ڵایه‌تى". و جه‌ختیش له‌بان ئه‌وه‌كرد ك :"كورده‌یل فه‌یلى توبش سه‌ركوتكردن دولایانه‌یگ هاتن له‌ئاكام هه‌ردوگ ئنتماى نه‌ته‌وه‌یى و مه‌زه‌وییان".

عادلى ئه‌وه‌یشه‌ دوینى ك :"په‌رله‌مان عیراق كه‌مته‌رخه‌مى كرد و دویاكه‌فت له‌ ده‌رخستن كێشه‌ى كورده‌یل فه‌یلى وه‌دریژى ئه‌و ماوه‌ له‌ شوون ڕمیان ڕژیم وه‌رین، و بایه‌ت بوى وه‌ل ئۆپه‌راسیۆنه‌یل ئه‌نفال و كیمیاواران شار هه‌ڵه‌بجه‌ و سه‌ركوتكردن ڕاپه‌ڕینه‌ شه‌عبانیه‌گه‌ ناوى باوردا".

شایان باسه‌ ك په‌رله‌مان عیراق له‌ نیشتنه‌گه‌ى یه‌كشه‌ممه‌ى وه‌رین قه‌بوولكرد ك كێشه‌ى كورده‌یل فه‌یلى بخریه‌یده‌ كارنامه‌ى نیشتنه‌گه‌ى ڕووژ 4 / 4 / 2011 ك هاووه‌خته‌ وه‌ل ڕه‌د بوین ساڵیاد 31 ساڵه‌ى ده‌ركردن و وه‌زوور كووچوه‌پیكردن هه‌زاران خێزان كورد فه‌یلى ئه‌را ئیران.

سه‌رۆك ناوه‌ند ئسلامى ڕیكخریایه‌یل كوومه‌ڵگه‌ى مه‌ده‌نى ئه‌وه‌یشه‌ ڕووشنه‌وكرد ك :"كورده‌یل فه‌یلى هانه‌ یه‌كم ڕز ئه‌و چین و لایه‌نه‌یله‌ ك شایسته‌ى ئه‌وه‌ن قه‌ره‌بوو یا ته‌عویز بكریه‌ن له‌وه‌ر چه‌پاوكردن ماڵ و موڵكیان و بى سه‌روشوون كردن ڕووڵه‌یل جایڵ و جوانیان". و زیاتریش وت ك :"ئى چینه‌ له‌ چینه‌یل تره‌ك كوومه‌ڵگه‌ى عیراقى كه‌متر نیه‌ ك تویش ئه‌نفال و كیمیاواران هاتن له‌ كوردستان و سه‌ركوتكردن شیعه‌ له‌ باشوور".

له‌لاى خوه‌یه‌و ساره‌ دلێمى سه‌رۆك ڕیكخریاى (سیرا‌و) له‌ په‌یوه‌ندییگى وه‌ل ماڵپه‌ڕ شه‌فه‌ق له‌ى باوه‌ته‌ وت ك :"ساڵیاد ده‌ركردن كورده‌یل فه‌یلى ساڵیادیگ پڕ له‌ ژانه‌ له‌ دڵ و ده‌روین گشت ڕووڵه‌یل ملله‌ت عیراق". و جه‌ختیش له‌ بان ئه‌وه‌ كرد ك :"ڕیكخریایه‌گه‌ى دژ ئه‌وه‌سه‌ ك ئى ئۆپه‌راسیۆنه‌یله‌ دوباره‌وه‌ بوون دژ وه‌ هه‌ر هاوڵاتییگ یا هه‌ر چینیگ له‌ چینه‌یل كوومه‌ڵگه‌".

دلێمى ئه‌وه‌یشه‌ داواكرد ك :"كورده‌یل فه‌یلى قه‌ره‌بوو بكریه‌ن له‌بان ئه‌و زه‌ره‌ده‌یل ماددى و مه‌عنه‌ویه‌ ك تویشیان هات و چاره‌نویس ڕووڵه‌یلیان ئاشكرا بكریه‌ید و مینه‌ى ته‌رمه‌یلیان بكریه‌ید". و له‌بان ئه‌وه‌یشه‌ جه‌ختكرد ك :"گشت چینه‌یل كوومه‌ڵگه‌ى عیراقى هه‌ق هاوڵاتیبوین داشتوون و له‌ ژیانیگ ئازاد و سه‌روه‌رانه‌ بژیه‌ن".

هه‌ر له‌ هه‌مان باوه‌ت عه‌بد جاسم ساعدى سه‌رۆك كوومه‌ڵه‌ى ڕووشنهویرى له‌ په‌یوه‌ندییگى وه‌ل ماڵپه‌ڕ شه‌فه‌ق له‌بان ئه‌وه‌ جه‌خت كرد ك :" ساڵیاد ده‌ركردن و كووچوه‌پیكردن كورده‌یل فه‌یلى هیمان دڵ و ده‌روینم پڕكردیه‌ ژان، چوینكه‌ ئه‌و هه‌ڵمه‌ته‌یل زاڵمانه‌ وه‌چه‌و خوه‌م دیم و وه‌لیه‌و ژیام و دیمه‌نه‌یل ناشرین فره‌یگ له‌ خه‌یاڵم مه‌نیه‌ له‌باوه‌ت ئه‌و ڕه‌فتاریل وه‌حشیانه‌ ك ڕژیم وه‌رین دژ وه‌ كورده‌یل فه‌یلى ئه‌نجامى دا".

ئه‌وه‌یشه‌ ڕووشنه‌وكرد ك:"گرنگى گه‌ورایگ هه‌س ئه‌را قه‌ره‌بووكردن كورده‌یل فه‌یلى و بایه‌ته‌ وه‌شیوه‌یگ قانوونى بوود تا بتویه‌نن وه‌ڕاسى دوباره‌ ئاوێته‌ و تێكه‌ڵاى كوومه‌ڵگه‌ بوون و مه‌سه‌له‌ى هاوڵاتیبوین گشتلاگر بوود و بایه‌ته‌ ئعتبار و شانیه‌ت ئه‌و لایه‌نه‌یله‌ بدریه‌یده‌وه‌ ك ڕژیم وه‌رین ئه‌زیه‌ت ڕه‌سانه‌ پیان".

ئه‌وه‌یشه‌ ڕووشنه‌وكرد ك وه‌رگردن بڕیاریگ سیاسى وه‌ قه‌ره‌بووكردن كورد فه‌یلى له‌و زه‌ره‌د و زیان ماددى و مه‌عنه‌ویه‌ ك تویشى هاتن، یه‌كیگه‌ له‌ هه‌قه‌یل ڕه‌وایان، چوینكه‌ ئه‌وه‌گ تویش ئى چینه‌ هات له‌ ده‌ركردن و كووچوه‌پیكردن وه‌زوور و له‌یه‌ك جیاوه‌كردن ئه‌ندامه‌یل یه‌ك خیزان و زندانى كردن و كوشتنیان، چشت كه‌م و ئاسانیگ نه‌وى، و وه‌جینۆساید دریه‌یده‌ قه‌ڵه‌م، له‌وه‌ر ئه‌وه‌ بایه‌ته‌ ئه‌نجوومه‌ن نوێنه‌ره‌یل قانوونیگ له‌ى باوه‌ته‌ ده‌ربكه‌ید.

شایان باسه‌ ك دادگاى باڵاى تاوان عیراقى له‌ 29 / 11 / 2010 حوكمه‌یل خوه‌ى ده‌رهه‌ق 15 توومه‌تبار له‌ سه‌ران ڕژیم وه‌رین ده‌ركرد ك ده‌سداشتنه‌ له‌ كوشتن و ده‌ركردن و كووچوه‌پیكردن كورده‌یل فه‌یلى و ئه‌و تاوانه‌یله‌ وه‌ جینۆساید له‌ قه‌ڵه‌م دا.

ئا: ياسر عماد

ت: ماجد سوره‌مێرى