شۆڕش گوڵان پێشكه‌فتنخواز و ده‌سكه‌فته‌يلی

شفق نيوز

بتویه‌نریه‌ێد كورد له‌ناو بوریه‌ێد، ئه‌را یه‌یش‌ فره‌ وه‌پی نه‌چی ك بڕیار شۆڕش دریا و خوه‌ی ڕێکخستنه‌وه‌یگ وه‌هێز ده‌س وه‌پى کرد، له‌دویاێ‌ هه‌وڵدانیگ نیشتمان په‌روه‌رانه‌، هه‌ر دو سه‌رکرده‌ی قاره‌مان، سه‌رۆك مه‌سعود بارزانی و هه‌میشه‌ له‌ یاد كاك ئیدریس جوانه‌مه‌رگ ک‌ په‌یوه‌ندی وه‌ کادره‌یل و هه‌ڤاڵه‌یل و پێشمه‌رگه‌ قاره‌مانه‌گان‌ کردن،‌ ئه‌یه‌یش له‌ کووتایی مانگ نیسان و له‌ ماوه‌ یا فه‌تره‌ى مانگ مایس ساڵ 1975 بوى، ئه‌را ئه‌وه‌گ وه‌ زویترین وه‌خت بتویه‌نن وه‌رپه‌رچ دوژمنه‌یل و ناحه‌زه‌یل بیه‌نه‌و‌ و‌ ئه‌و ڕاسیه‌ بسه‌لمنن ک‌ کورد زینگه‌و قه‌ت نیه‌تيه‌ێده‌ خوار ئاڵاگه‌مان، وه‌رجله‌ سه‌رهه‌ڵدان شۆڕش، په‌یوه‌ندی ‌وه‌ که‌وادره‌ پێشکه‌فتگه‌گان له‌ بوار سیاسی و سه‌ربازی له‌ پارتی کریا، له‌وانه‌ هه‌ڤاڵه‌یل ( جه‌وهه‌ر نامیق، ئازاد به‌رواری، که‌ریم سنجاری، سامی عبدالرحمن ، فازڵ میرانی ، عارف ته‌یفور، محه‌مه‌د ڕه‌زا، ته‌حسین ئه‌تروشی، نه‌قیب عبدالله‌ صدیق و مولازم صاڵح پیداوی). دویاتر له‌ مانگ ته‌ممووز شێرکۆ عه‌لی و‌ هه‌ڤاڵه‌یل تریش په‌یوه‌ندی کردن‌، هه‌ميش په‌یوه‌ندی وه‌ به‌ڕێز عه‌لی عبدالله‌ و بڕێگ له‌ هه‌ڤاڵه‌یل تر کریا، وه‌ى خاتره‌‌ پارتی بڕیاردا ئه‌را ماوه‌یگ سه‌رکردایه‌تییگ وه‌ختى دابمه‌زرنیگ ئه‌را پارت ديموكرات كوردستان ک وه‌ناو (قیاده‌ موه‌قه‌ته) ناسریا، به‌یان دامه‌زرانن ئه‌ى سه‌رکردایه‌تی وه‌ختيیه‌ له‌ 10/12/1975 ئاشکرا کریا و بڵاو کریا‌وه. له‌دویاى خوه‌ى ئاماده‌کردن ته‌واو و دراسه‌تکردن گشت باوه‌ته‌یل ناوخوه‌یی و ده‌ره‌کی و ئاماده‌کردن که‌وادر و هێز پێشمه‌رگه‌ ک‌ هه‌ر پێشمه‌رگه‌گان شۆڕش ئه‌یلوول بوین، دڵ گشت کوردیگ دڵسووز له‌ گشت پارچه‌یل کوردستان شاده‌و بوى، دویاى ئه‌وه‌ له‌ به‌روار26/5/1976 شۆڕش گوڵان دژ وه‌ ڕژيم دیکتاتۆرى عێراق ده‌س وه‌شانن له‌ بنکه‌یل سه‌ربازی دوژمن له‌لايه‌ن هێزێگ ئازاى پێشمه‌رگه‌ له‌ نزیک حاجی ئۆمه‌ران ده‌س وه‌پی كرد و ئه‌ى ڕویداگه‌ زوى ده‌نگ داره‌و و گشت کوردیگ وه‌پی زانست ک‌ شۆڕش به‌رپا بویه‌، ئه‌ى‌ خه‌وه‌ره‌ دڵ ملله‌ت كورد شاده‌و کرد، چوینکه‌ یه‌ یه‌که‌م ته‌قه‌ی هه‌ڤاڵه‌یل بارزانی نه‌مر بوى، له‌دویاى ئه‌و غه‌در و خیانه‌ت گه‌ورا ك ده‌رحه‌ق وه‌ ملله‌ت كورد كریا، یه‌که‌م شه‌هیدیش هه‌ر له‌هه‌مان ڕووژ شه‌هيد بوی ک‌ شه‌هید سه‌ید عبدالله ‌نبی حاجی ئۆمه‌رانی بوى ک هێزه‌گه‌ وه‌سه‌رپه‌رشتی خوه‌ی بوى، دوژمن هه‌ڵگيرسيان شۆڕش وه‌ى خێرایی‌ و وه‌ى توانا ‌تویش شۆک هاتوید، وه‌لى وه‌ ئیمکانیه‌ت که‌متر له‌ جاران و بارودوخ ناو‌خوه‌ییش سه‌ختتر بوى له‌ جاران، وره‌ی مه‌ردمه‌گه‌‌ فره‌ داوه‌زیاوید، دوژمن هێزه‌یل گه‌ورا‌ و فره‌یگ له‌ کوردستان جیگیر كردوید، مه‌ردم ئه‌را  باشوور عێراق ته‌رحیل کریاوین، دام و ده‌زگای ئه‌من و ئیستخبارات و جاسوسه‌يل، کوردستان پووشانوین،  ڕووژگار خه‌بات فره‌ سه‌خت تر بوى له‌ جاران، وه‌لى ئیراده‌ی پێشمه‌رگه‌يل پارتی و بارزانی له‌ى هه‌مگه‌ى وه‌ربه‌س سه‌خته‌ وه‌هێزتر و قاره‌مانانه‌تر بوی و ڕه‌گ و ڕیشه‌ی پارتی و خوه‌شه‌ویسی ئه‌را بارزانی نه‌مر له‌ قویلایی گشت کوردیگ چقیاوید، شۆڕش ده‌س وه‌پی كرد و له‌دويای ماوه‌يگ سه‌خت له‌بان دوشمنه‌يل سه‌ركه‌فت و ده‌سكه‌فته‌يل فره‌يگ وه‌دیهاتن.

 

ده‌ستکه‌فته‌یل شۆڕش گوڵان

 

وه‌ختایگ باس له‌ ده‌ستکه‌فته‌یل شۆڕش گوڵان كه‌یمن وه‌ مانای ئه‌وه‌س ك باس شۆڕشه‌‌یل وه‌رجله‌ ئه‌وه‌یش ‌که‌یمن، جوور شۆڕش ئه‌یلوول مه‌زن، چوینکه‌ شۆڕش گوڵان دریژه‌ده‌ر شۆڕش ئه‌یلووله‌، یه‌کیگ له‌ ده‌سکه‌فته‌یل فره ‌گه‌وراى‌ شۆڕش گوڵان ئه‌وه‌ بوی‌ ک‌ وه‌ى شۆڕشه‌ تویه‌نریا وه‌رگری له‌ مه‌نین ملله‌تیگ بکریه‌ێد ک‌ دوشمنه‌یل تواستیان له‌ناوی بوه‌ن و له‌ جوگرافیا و مێژوو بسڕنه‌مانه‌و‌، و خاڵیگ تر‌ کورد ئه‌را گشت دونیا ئسبات كرد ک‌ واز له‌ حه‌ق ڕه‌وای خوه‌ى نیه‌تیه‌رێد و سه‌ر ئه‌را دوژمن نیه‌چه‌منیگ، ئه‌را گشت جه‌هانیش ئسبات كرد ک‌ کێشه‌ی کورد وه‌ زه‌بر ئاگر و ئاسن و ئه‌نفال و كیمیاواران و.... هتد، چاره‌سه‌ر نیه‌كریه‌ێد به‌ڵکه‌م له‌‌ ڕیگه‌ی ئاشتیانه‌ و دیموکراتیانه‌ چاره‌سه‌ر كریه‌ێد، ده‌سکه‌فت فره‌‌ گه‌ورای شۆڕش، ئازاد کردن کوردستان بوى له‌ ڕاپه‌ڕینه‌ مه‌زنه‌گه‌ی ساڵ 1991 وه‌ که‌رکووک دڵ کوردستانیشه‌و، ك ئه‌ى پرۆسه‌ى ئازادكردنه‌ وه‌ل پارته‌يل تر هاوپه‌یمان بوى له‌ کوردستان. هه‌ڵوژاردن په‌رله‌مان کوردستان و دامه‌زرانن حکوومه‌ت هه‌رێم و ئاوادانه‌وکردن کوردستانه‌ ویرانه‌گه‌مان ک 4500 ئاوایی کاول کریاوید، وه‌هێزکردن په‌یوه‌ندیه‌یل وه‌ل وڵاته‌یل جه‌هان، به‌شداریکردن له‌ ڕمانن ڕژیم گووڕ وه‌ گووڕ دیکتاتۆریه‌ت له‌ عێراق له‌ ساڵ 2003 و چه‌سپانن فیدرالیه‌ت له‌ عێراق و دامه‌زرانن هه‌رێمیگ فیدرالی پێشکه‌فتگ، یه‌کیه‌تی و ته‌بایی وه‌هێز وه‌ل ئه‌حزاب کوردستان و پێکهاوردن لیستیگ وه‌هێز وه‌ناو لیست هاوپه‌یمانی کوردستانی ئه‌را گشت هه‌ڵوژاردنه‌یل عێراق له‌ ده‌سكه‌فته‌يل گرنگ و گه‌ورای شۆڕش گوڵان بوی، ئه‌یه‌ بیجگه‌ له‌وه‌گ ک‌ سه‌رکرده‌ى شۆڕش گوڵان، ئیسه‌ سه‌رۆک هه‌رێم کوردستانه‌ ک‌ بویه‌سه‌‌ مایه‌ى شانازی گشت کوردیگ، سه‌رۆک كابینه‌ى گوزه‌یشته‌ى حکوومه‌ت کوردستان جیگر سه‌رۆك پارت ديموكرات كوردستانه‌‌، ک‌ جى ڕه‌زامه‌نی گشت لایگه‌ وه‌ کاره‌گانی له‌ ڕی ملله‌ت و نیشتمان، بیجگه‌ له‌ سه‌ده‌ها که‌وادر پارتى ك پله‌ و پایه‌ی به‌رز دیرن له‌ حکوومه‌ت عێراق و کوردستانیش، ئه‌یه‌و ده‌یه‌ها ده‌سکه‌فت گرنگ تر ک‌ وه‌‌ چه‌ويگ پڕ له‌ شانازی ته‌ماشایان كریه‌ێد. ئيسه‌یش شۆڕش هه‌ر وه‌رده‌وامه‌ ئه‌را ئاوه‌دانه‌وکردن و ڕه‌سین وه‌ ئاره‌زووه‌ پیرۆزه‌گانمان له‌ ئاینده ‌و ئه‌را دابینکردن دویاڕووژیگ به‌خته‌وه‌ر ئه‌را ئیسه‌ و نه‌وه‌یل دویاڕووژ. ئه‌گه‌ر ملله‌تیگ لێوا‌ ئیراده‌ى‌ پووڵایینیگ و ئه‌ى جووره‌ شۆڕش‌ و سه‌رکرده‌ و پێشمه‌رگه‌یليگ نه‌یاشتوود، نیه‌ڕه‌سیگه‌ ‌ ئه‌ی هه‌مگه‌ى سه‌روه‌ریه‌ ک‌ ئیسه‌ له‌ کوردستان هه‌س‌، چوینکه‌ دوژمن هویچ نه‌مه‌ن وه‌رانوه‌ر وه‌ کورد نه‌كه‌ێد، له‌ ئه‌نفال، جینۆساید، ته‌عریب، كووچ وه‌پی كردن وه‌ زوور و گشت جووره‌ چه‌کیگ ك وه‌کارى هاورد ‌تا  بڕه‌سێده‌ چه‌ک قه‌ده‌غه‌کریاگ ناوده‌وڵه‌تيیش، وه‌لى له‌ ئاكام‌ ئیراده‌ی کورد سه‌رکه‌فت، دوژمنه‌یلیش ڕسوا کریان و بوینه‌ په‌ن زه‌مانه‌،  ئه‌ى شۆڕشه‌ ئیراده‌ی پۆڵایین ملله‌تیگ بوى وه‌رانوه‌ر وه‌ پیلانه‌ سیه‌گان دوژمنه‌یل.

له‌ ياد 35 ساڵه‌ی هه‌ڵگيرسيان شۆڕش گوڵان پێشكه‌فتنخواز، سه‌ر ڕێز و نه‌وازش ئه‌را ڕوح پاك سه‌رجه‌م شه‌هيده‌يل ڕێ ئازادی ملله‌ته‌گه‌مان چه‌منيمن له‌ نوای گشتيان بارزانی نه‌مر و كاك ئيدريس هه‌ميشه‌ له‌ياد و هه‌زاران سه‌ڵام له‌ گوڵان و پێشمه‌رگه‌يل دلێری.

ئاراس جه‌واد