ژن له‌ ئيسه‌ی كومه‌ڵگا

شفق نيوز

ئه‌وسا پيشينه‌يل وتيان ژن ژيانه‌، وه‌لی ئيسه‌ مه‌ردمان فريه‌يگ منای ژنه‌يل ئه‌كه‌ن و ره‌فتار و هه‌ڵسووكه‌فتی وه‌ تاوان دژه‌ ئنسانيه‌ت تاريف ئه‌كه‌ن له‌ دونيايگ پڕ كيشه‌وگرفت ده‌رسكرد، ئه‌وسا مه‌گه‌ر ساڵمانيگيگ جاريگ بژنه‌فتيايم فڵانه‌ ژن توورياگه‌و روی له‌ماڵ باوانی كردگه‌، وه‌لی ئيسه باوانی وه‌زوور تورننه‌ی و په‌لكيشی ئه‌كه‌ن وه‌ره‌و مه‌نزڵگای پڕ ئه‌نگه‌مه‌و كيشمه‌كيش نائنسانی خوه‌يان و حوكم ئاگر و ئاسن ده‌رهه‌ق هاوسه‌ره‌ بيچاره‌گه‌ی ئه‌يه‌رنه‌ كار!!

گشت ئی هه‌وڵ و كرده‌وه‌يله‌ له‌چه‌و رووژگار كويه‌ن گه‌شه‌كردن فريه‌يگ وه‌ خويه‌و ديه‌و ئاشكراس ك سه‌مت ئازادی له‌لای ژنه‌يل په‌ڕ و باڵ ده‌ركردگه‌و هيز و توانای پياو وه‌پی خاكه‌سار كرياگه‌و كاريگه‌ری فريه‌يگيش ناسه‌ بان نه‌ريت كوومه‌ڵگاو مه‌رز هه‌ڵسووكه‌فتيشی ئالشت كردگه‌و ده‌سڵات خوه‌ی وه‌ زوور له‌تی دامه‌زرانگه وه‌ تايبه‌ت كومه‌ڵگايه‌يل خوه‌رئاوايی و پيشكه‌فتگ‌، مانای ئه‌وه‌سه‌ فريه‌ كه‌س هان له‌و باوه‌ڕه‌ ك ئمبراتۆريه‌ت ژن له‌ ئيسه‌ی كومه‌ڵگا پيشكه‌فتن فريه‌يگ وه‌خويه‌و ديه‌.

ئمجا ئاده‌ميزاد رووشنهويرهويچ وه‌ختيگ دژ ئازادی و ئاسووده‌يی و سه‌رفرازی و پله‌و پايه‌ی ژنه‌يل نيه‌، وه‌لی له‌ هه‌مان وه‌خت لايه‌نگر مه‌رام ناپه‌سه‌ن و ره‌فتار ناوه‌جی و ناڕه‌وايی ژنه‌يليش نيه‌ له‌باوه‌ت خراوی وه‌كارهاوردن مه‌رامه‌يلی ئه‌را دروسكردن كيشه‌و شيوانن ژيان ئارام.

هه‌ر وه‌و خاتريشه‌ دوينيم له‌ كومه‌ڵگای كورده‌واری خوه‌مانيش تا راده‌يگ ژن خه‌ريكه‌ گام نه‌يد وه‌ره‌و ئه‌و دونيای ئازاديه‌ ك بتويه‌نيد ژيانيگ ژنسالاری له‌لی دروس بكا ئه‌را هه‌قه‌وكردن ئه‌و رووژگاره‌يل پياوسالاريه‌ ك وه‌ خه‌م و ناڕه‌حه‌تی له‌لی گوزه‌ر كردياد و هه‌ر له‌وه‌ر ئه‌وه‌يش وه‌رده‌وام خوازياره‌ وه‌رگری له‌ مافه‌يل بكريه‌يد.

كه‌ريم جه‌وهه‌ر

ج . أ